Hipap Tugeta Long “Midol Bilong World”

Waswe, enitaem iu herem disfala toktok “Te Pito o Te Henua”? Long firstfala languis bilong Easter Island wea hem Rapa Nui, hem minim “Midol Bilong World.” Wanem nao mekem wanfala hipap long there barava spesol?

STAP seleva, interesting, and difren. Pipol iusim toktok hia for storyim Easter Island, or Rapa Nui wea hem hom nem bilong datfala ples. Tru nao hem wanfala island wea stap seleva long South Pacific Ocean. Hem 3,790 kilometer from taon bilong Santiago, long Chile. Hem kamap wanfala province bilong Chile long September 9, 1888.

Thrifala volcano wea no active nao formimap datfala island wea sheip olsem wanfala triangle, wea big bilong hem 166 square kilometer. Disfala island, olsem planti nara Pacific island, hem top part nomoa bilong olketa bigfala maunten wea stap andanit long sea. Olketa markem datfala island olsem wanfala natural monument. Pipol savve gud long datfala island from hem garem olketa spesol ston statue, wea nem bilong olketa hem moai.a

Witim wei wea Easter Island barava luk naes and garem olketa ples saed long history, hem garem tu planti difren kaen kaikai. Hem garem olketa frut olsem pineapple, avocado, pawpaw, and naenfala difren kaen banana grow long there. And olketa kasem from sea planti difren kaen fish and olketa nara kaikai from sea.

Long Easter Island weather hem no hot or cold tumas, planti taem hem rain and garem olketa rainbow, wea mekem olketa visitor garem fresh air for brithim and lukim olketa samting wea luk naes. Distaem, samting olsem 3,800 pipol stap long there. Olketa laen dadi bilong pipol wea stap long there, olketa from Polynesia and Europe, Chile, and samfala nara kantri. Planti handred tourist from Europe and Asia savve visitim datfala island, wea hem wanfala important wei wea olketa kasem selen.

Firstaem for Plantim Olketa Kingdom Seed

Datfala 1982 Yearbook of Jehovah’s Witnesses hem sei: “Long bifor mifala garem nomoa wanfala pablisa long Easter Island. Wanfala missionary sista long [Chile] branch helpem hem long spiritual wei thru long wei for raetem leta. Nomata hem go bak long Chile, mifala garem record bilong pipol long datfala island wea kasem Wastaoa long mail. Mifala sapraes fogud taem mifala kasem wanfala telephone kol long April 1980 from wanfala man wea laek savve wanem taem for celebratem Memorial. Then bihaen, insaed datfala sem year wanfala hasband and waef from Valparaiso, wanfala taon long Chile, muv go long there and conductim olketa Bible study witim pipol wea interest. Firstaem for olketa garem Memorial meeting long disfala island hem long April 1981, wea 13-fala pipol attend. Iumi hapi tumas from ‘gud nius’ kasem disfala ples wea stap farawe.”

Bihaen, long January 30, 1991, branch sendem wanfala hasband and waef wea spesol pioneer, Dario and Winny Fernandez, go long datfala island. Brata Fernandez sei olsem: “Mifala flae long aeroplane for faevfala hour for kasem disfala ples long earth wea stap farawe, wea garem kastom wea fulap witim planti samting wea man no minim.” Olketa stretawe organizem olketa meeting and preaching waka witim help bilong wanfala lokol brata and wanfala sista wea just arrive tu witim tufala pikinini bilong hem. Olketa lukim hao Jehovah sapotim olketa, nomata olketa famili member putim hevi long olketa, pipol garem feeling wea ova tumas for religion bilong olketa, and living wea followim kastom bilong Polynesia. Brata and Sista Fernandez no spesol pioneer distaem, bat olketa stap yet long datfala island, and olketa bringimap son bilong tufala wea born long there. Distaem olketa garem 32 hapi Kingdom pablisa. Samfala long olketa bilong Rapa Nui, and samfala kam stap or muv go long there for serve long ples wea need hem big for olketa wea talemaot Kingdom.

Redyim Olketa Samting for Circuit Assembly

From Easter Island and South America stap farawe from each other, thrifala taem insaed long year kongregeson savve kasem olketa video kaset abaotem spesol assembly day, circuit assembly, and distrik convention program. Bat long end bilong year 2000, Branch Komiti long Chile ting raonem idea for olketa garem assembly bilong olketa seleva. Gogo, olketa disaed for garem circuit assembly long November 2001, and olketa invaetem samfala brata and sista from difren part bilong Chile for attendim disfala spesol taem. Bikos long schedule bilong olketa aeroplane olketa garem assembly long Sunday and Monday.

Thirti-thri brata and sista wea kasem invitation for attend hapi for travel go long datfala island for tekpart long first circuit assembly long datfala farawe ples. Bihaen olketa flae for longfala taem ovarem Pacific Ocean, olketa hapi for lukim olketa brata wea weitim olketa long airport. Olketa brata welkamim olketa and putim olketa flaoa raonem nek bilong olketa, wea hem present wea pipol long datfala island savve givim. Then olketa tekem olketa go long ples wea olketa bae stap, and bihaen olketa lukluk raon long datfala island, evriwan wea tekpart long assembly program meet long Kingdom Hall.

Man wea Olketa No Expectim, Story Abaotem Assembly

Taem olketa draev go long assembly, samfala wea kam for assembly sapraes for herem long radio priest story abaotem visit bilong olketa. Hem sei olketa tourist from South America bae visitim haos bilong pipol for story abaotem end bilong disfala world. Nomata hem encouragem pipol long church bilong hem for no lisin long olketa visitor hia, announcement bilong hem help for talemaot hao wanfala big grup bilong Olketa Jehovah’s Witness stap long datfala island. Diswan mekem pipol long island interest for savve moa abaotem olketa. Long olketa day bihaen, olketa wea kam for assembly story witim pipol long gudfala wei abaotem datfala nambawan message bilong gud nius.

Assembly Start

Long Sunday morning, olketa brata from datfala ples weit front long Kingdom Hall for welkamim olketa wea visit kam taem olketa arrive for first day bilong assembly. “Iorana Koe! Iorana Koe!” “Welkam!” Samfala sista werem kaleko bilong datfala island and putim olketa flaoa wea luk naes long hair bilong olketa wea diswan hem wei bilong pipol long Polynesia.

Bihaen naesfala music, planti handred voice join tugeta for singim song “Stand Strong, No Seksek!” wea hem firstaem for planti pipol singim disfala song wantaem long datfala island. Olketa brata long there krae taem chairman talem naesfala welkam long languis bilong Rapa Nui. Long end bilong morning session, thrifala niu Witness baptaes for showimaot dedication bilong olketa. Taem program bilong first day hem finis, evriwan feel moa klos long Jehovah and long full sekson bilong olketa brata.—1 Peter 5:9.

Preaching Long Morning

Bikos long living bilong pipol long datfala island, program long mek-tu day bilong circuit assembly start bihaen lunch taem. So, olketa wea visit kam and olketa brata long there iusim taem hia for tekpart long field ministry. Wanem nao samfala experience bilong olketa?

Wanfala olo woman wea garem eitfala pikinini talem olketa Witness hao hem no savve story witim olketa from hem wanfala Catholic. Bihaen olketa sei olketa laek story abaotem olketa problem wea evriwan feisim, olsem wei for iusim drug and trabol insaed famili, hem agree for lisin.

Taem wanfala hasband and waef wea Jehovah’s Witness visitim wanfala olo woman hem no welkamim olketa long naesfala wei. Hem talem olketa for go story witim pipol long South America wea deal long raf wei witim each other. Datfala hasband and waef talem hem hao disfala message bilong “gud nius bilong kingdom” hem for evriwan and reason bilong olketa for kam long island hem for attendim wanfala assembly wea bae helpem evriwan for mekem grow love for God. (Matthew 24:14) Olketa askem sapos hem laek laef for longfala taem long wanfala paradaes wea semsem lelebet witim datfala island bat hem bae no sik and dae. Bihaen olketa story abaotem haomas year olketa bigfala hol bilong volcano stap long datfala island, hem tingim hao laef hem short and hem ask olsem: “Why nao iumi stap laef for shortfala taem nomoa?” Hem sapraes taem hem readim Psalm 90:10.

Long dat taem, tufala Witness hia herem bigfala singaot long nextfala haos. Nomata olketa no minim wanem nao pipol hia singaotem, datfala woman talem olketa hao olketa neiba hia tok swear and olketa no laekem olketa Witness for visitim olketa. Bat, disfala woman nao nua, or first dota long famili. From dadi bilong hem dae finis, hem nao garem responsibility for disaedem wanem nao gud for famili. Front long olketa relative hia hem defendim olketa brata hia long languis bilong hem and hem hapi for acceptim olketa pablikeson wea olketa offerim. Tu-thri day bihaen, taem olketa draev go pas long olketa Witness, hem talem brata bilong hem for stopem car. Nomata brata bilong hem showimaot hem les, woman hia sei gudbae long olketa brata and sei hem hope olketa bae win long ministry bilong olketa.

Nomata samfala bilong datfala island firstaem rejectim message wea olketa Witness from South America preachim, hem klia long olketa visitor hia hao pipol long Rapa Nui kaen and showimaot fasin for fren. Planti long olketa hapi for lisin long gud nius. Long 20-fala Witness wea baptaes finis, 6-fala nao kam from datfala island. Wanfala long olketa, lanem truth from hem herehere go taem waef bilong hem studyim Bible witim olketa Witness long nara rum. Hem and waef baptaes olsem Witness distaem, and hem wanfala ministerial servant long kongregeson.

Spiritual Program Go Ahed

Bihaen lunch, program bilong mek-tu day hem start. Pipol wea interest hipap moa witim 32 brata bilong datfala island and 33 brata and sista wea kam from South America. Klosap wan handred nao lisin long program, wea insaed diswan hem pablik tok wea garem theme: “Wei wea Love and Faith Winim World.” Tru nao, evriwan wea stap long there lukim seleva trufala love wea stap midolwan pipol bilong Jehovah, nomata midolwan pipol wea garem difren kastom tu.—John 13:35.

Long taem bilong circuit assembly, olketa circuit and distrik overseer garem wanfala meeting witim olketa pioneer minister. Thrifala regular pioneer from datfala island witim olketa regular and spesol pioneer wea visit kam go long datfala meeting. Evriwan kasem bigfala encouragement.

Long next day, samfala brata long there tekem olketa wea visit kam for assembly for lukluk raon long datfala island. Olketa visitim ples for tekem ston wea pipol bifor katem olketa ston for olketa moai, olketa volcano wea pipol bifor resis long there, and tu datfala Anakena sandbis wea hem kala olsem gold, wea hem nao ples wea firstfala pipol arrive long hem.b

Lastfala taem for hipap witim olketa brata long there hem long Kongregeson Buk Study. Bihaen datfala meeting, olketa Witness long there mekem olketa guest seke taem olketa redyim kaikai for olketa. Bihaen, olketa werem kaleko bilong datfala island, and duim samfala dance. Olketa wea visit kam for assembly, witim olketa brata and sista long Rapa Nui, barava sure hao hard waka bilong olketa for redyim assembly hem win.

Evriwan wea visit kam for assembly feel klos long olketa brata and sista bilong olketa wea stap farawe, wea olketa bin stap witim for wanfala hapi week. Olketa sorre for lusim datfala island. Olketa bae evritaem tingim olketa niu fren bilong olketa and spiritual encouragement wea olketa kasem. Long airport, olketa brata long there putim long nek bilong olketa brata hia olketa nekles wea olketa wakem from olketa shell long saedsea.

Olketa wea visit kam for assembly promis olsem taem olketa go: “Iorana! Iau he hoki mai e Rapa Nui ee,” wea minim: “Gud-bae! Mi bae kam bak long iu, Rapa Nui.” Tru nao, olketa laek for go bak for visitim olketa niu fren and spiritual famili member wea stap long Easter Island, ples wea barava difren, stap seleva, interesting, and pipol showimaot fasin for fren!

[Olketa Footnote]

[Box long page 24]

Witness Long Easter Island

Samting olsem tufala year bifor datfala naesfala assembly, wanfala circuit overseer and waef bilong hem visitim datfala island and enjoyim planti naesfala experience. Olsem example, tufala sapraes fogud taem sista wea tekem tufala go long ples wea tufala bae stap talem hao tufala bin studyim Bible witim hem long south part bilong Chile taem hem teenager 16 year bifor. Bihaen datfala seed garem frut long Rapa Nui.

Datfala circuit overseer and waef bilong hem kasem tu disfala fani experience: Man wea ownim stoa for sellim olketa samting for tourist acceptim New World Translation of the Holy Scriptures and Bible study pablikeson Savvy wea Lead Go Long Laef Olawe, wea Olketa Jehovah’s Witness nao pablisim. Taem olketa go bak for visitim hem, hem sei hem no savve readim datfala Bible. Olketa givim hem Bible long French languis and no Spanish! Olketa kwiktaem stretem datfala problem, and witim help bilong olketa Witness long there hem faendaot hao Bible no hard nomoa for minim taem hem long languis bilong hemseleva.

[Map long page 22]

(For formatted text, lukim pablikeson)

EASTER ISLAND

CHILE

[Olketa Piksa long page 23]

Tufala long olketa wea baptaes long circuit assembly

[Olketa Piksa long page 25]

Saed bilong Rano Raraku volcano; insaed: Wild frut wea olketa kolem guayaba wea grow long datfala island