Kwestin From Reader

Bihaen Flood, Noah sendem go aot from ark wanfala kurukuru wea tekem kam bak wanfala “leaf bilong olive.” Wea nao datfala kurukuru faendem datfala leaf?

Bible talem iumi hao “wata hem barava kavarem earth gogo nomata evri haefala maunten wea stap anda long skae olketa kava evribit.” (Genesis 7:19) Taem wata bilong flood start for katdaon, Noah sendem go aot wanfala kurukuru wantaem insaed wan week for thrifala week. Long mek-tu taem, kurukuru hia hem tekem kam bak ‘wanfala niu leaf bilong olive tree long mouth bilong hem, and from datwan Noah hem savve wata hem finis from earth.’—Genesis 8:8-11.

Tru, iumi distaem hard for savve hao long nao olketa difren part long earth stap andanit long wata, from Flood hem changem lukluk bilong earth long datfala taem. Nomata olsem, luk olsem wata mas kavarem klosap evri ples for longfala taem wea fit for killim dae planti tree. Bat, samfala mas laef yet, dastawe taem wata hem finis olketa niu shoot start for grow.

The New Bible Dictionary hem sei olsem abaotem olketa olive tree: “Sapos olketa katem, olketa niu shoot savve kamap from rut bilong hem, so samting olsem faevfala niu branch savve grow. Olketa olive tree wea klosap dae olketa savve garem olketa niu shoot olsem tu.” The New Schaff-Herzog Encyclopedia of Religious Knowledge hem sei olsem abaotem olketa olive tree: “Hem olsem laef bilong hem no savve finis.” No eni man distaem savve sapos wata bilong flood hem salt, hem hot or cold. Dastawe, iumi no savve sure hao nao flood hem affectim olketa olive tree and olketa nara plant.

Bat, datfala wild olive tree no savve grow long olketa ples wea cold tumas, olsem long hae maunten. Hem savve grow long olketa area wea low winim 1,000 meter, wea klosap evritaem temperature bilong hem winim 10 degrees Celsius. Datfala buk The Flood Reconsidered hem sei: “Noah fit for luksavve wata gogo for finis from olketa valley taem hem lukim datfala niu leaf.” Taem Noah sendem go datfala kurukuru wan week bihaen, kurukuru hia no kam bak, wea showimaot planti narafala plant hem grow and kurukuru hia mas faendem ples for stap nao.—Genesis 8:12.