Why Nao Olketa Jehovah’s Witness Kam Olowe?

EVRIWEA long World, pipol savve abaotem Olketa Jehovah’s Witness olsem olketa wea strong long haos tu haos ministry bilong olketa. Samfala pipol no minim why nao olketa Witness kam olowe, nomata taem pipol no showim interest long message bilong olketa. Tufala leta hia from Russia bae explainim reason for diswan.

Masha wanfala 19-year-old girl long Khabarovsk hem talemaot: “For tok stret, long bifor, mi haed evritaem from Olketa Jehovah’s Witness.” Bat, bihaen hem readim samfala copy bilong olketa magasin wea olketa Witness pablisim, hem changem tingting bilong hem. Masha hem raet: “Evri samting wea mi readim hem barava interesting and hem teachim man staka samting, bat winim evri samting hia, hem changem tingting bilong man abaotem world. Mi isisi start for minim purpose bilong laef. “

Svetlana wea kam from taon bilong Ussuriysk, wea hem samting olsem 80 kilometer north long Vladivostok hem raet: “Mi just start no longtaem go nomoa for readim Wastaoa and Wekap! Olketa magasin hia barava important long taem bilong iumi distaem. Mi enjoyim evri article. Olketa barava interesting, garem planti information, and teachim man staka samting. Thankiu! Thankiu tumas for stap long disfala world and for duim kaen important waka olsem.”

Olketa Jehovah’s Witness raonem world barava ting strong long disfala kwestin bilong aposol Paul wea savve mekem man tingting: “Hao nao olketa bae herem sapos no eniwan preach?” (Romans 10:14) Bae hem gud tumas sapos iu lisin long olketa Witness for lelebet taem next taem olketa visitim iu. Iu tu maet enjoyim message bilong comfort wea stap long Word bilong God, Bible.