Waswe, Iumi Shud Prea Long Olketa Angel for Help?

WASWE, hem stret for prea long olketa angel long taem bilong trabol? Planti pipol ting hem stret for duim olsem. For tok stret, New Catholic Encyclopedia sei: “Man prea go long . . . olketa angel . . . bat hem only for olketa nao tok for iumi go long God.” Waswe, iumi shud prea go long olketa angel for olketa tok for iumi go long God?

Word bilong God talem nomoa nem bilong tufala faithful angel bilong God, Michael and Gabriel. (Daniel 8:​16; 12:1; Luke 1:​26; Jude 9) From nem bilong tufala stap insaed long Bible, iumi luksavve hao each angel hem wanfala spesol spirit person wea garem nem, no samting wea garem strong or paoa nomoa. Bat, olketa nara angel no laek talem nem bilong olketa. Olsem example, taem Jacob askem wanfala angel wea visitim hem for talem nem bilong hem, hem no laek talem. (Genesis 32:29; Judges 13:​17, 18) Bible no garem list long nem bilong olketa angel, from diswan hem stopem olketa man for givim praise wea no fitim long olketa.

Wanfala waka bilong olketa angel hem for talem olketa message bilong God go long olketa man. For tok stret, olketa firstfala Greek and Hebrew word wea olketa transleitim “angel,” minim “man for talem message.” Bat, olketa angel no duim waka for tekem olketa prea bilong olketa man go long throne bilong Most Hae. God disaed for pipol prea stret go long hem thru long nem bilong Son bilong hem, Jesus Christ, wea sei: “Nomata wanem samting iufala askem long Father insaed long nem bilong mi, hem bae givim long iufala.”​—⁠John 15:16; 1 Timothy 2:⁠5.

Jehovah God hem standbae evritaem for lisin long iumi sapos iumi prea long hem long stretfala wei. Bible promisim diswan: “Jehovah hem stap klosap long olketa wea kolem hem, long evriwan wea kolem hem long trufala wei.”​—⁠Psalm 145:⁠18.