Liberia—Nomata War, Kingdom Waka Hem Grow
FOR WINIM tenfala year finis war hem go ahed long Liberia. Kasem midol long 2003, olketa militant faet kam kasem insaed long kapitol taon, Monrovia. Trabol hia forcem planti Jehovah’s Witness for ranawe from haos bilong olketa, and samfala mas duim diswan planti taem. Pipol go ahed for stealim olketa samting bilong olketa.
Sorre tumas, long taem bilong datfala faet long kapitol, staka thousand pipol dae. Tufala Witness midolwan long olketa, wanfala brata and wanfala sista. Wanem nao olketa nara brata duim for deal witim hard taem olsem, and wanem help nao olketa kasem?
Help for Olketa wea Garem Need
Long taem bilong datfala bigfala problem, branch office bilong Olketa Jehovah’s Witness long Liberia organizem help for olketa wea garem need. Olketa provaedem kaikai, olketa main samting wea olketa needim long haos, and medicine. Taem olketa militant kontrolem area wea olketa ship savve kam anchor long hem, kaikai start for short. Branch lukim diswan firstaem and redyim olketa supply for tu thousand Witness wea ranawe long olketa Kingdom Hall evriwea long datfala taon. Olketa brata nao sharemaot kaikai mekem hem no finis go kasem taem datfala area open moa. Branch long Belgium and Sierra Leone sendem olketa medicine long plane, and branch long Britain and France sendem olketa kaleko long ship.
Nomata olketa kasem hard taem, olketa no lusim gudfala tingting and stap hapi nomoa. Wanfala long olketa wea ranawe from haos bilong hem thrifala taem talem samting wea staka savve talem. Hem sei: “Olketa samting hia nao iumi preach abaotem; iumi stap long olketa last day.”
Acceptim Gud Nius
Nomata datfala trabol affectim full kantri, olketa Witness go ahed for kasem olketa nambawan samting long field. Long January 2003 olketa kasem wanfala peak wea olketa no kasem bifor, 3,879 Kingdom pablisa and long February olketa conductim 15,227 hom Bible study.
Pipol kwiktaem acceptim gud nius. Wanfala example long diswan kam from wanfala vilij long south-east part long datfala kantri. Wanfala kongregeson plan for celebratem Memorial long dae bilong Christ long bigfala vilij long Bewahn, wea tekem faev hour for wakabaot go long hem from ples wea olketa evritaem meet long hem bifor. Bifor olketa brata go long vilij for invaetem pipol, olketa firstaem givim invitation long mayor bilong Bewahn. Taem hem kasem, hem tekem Bible bilong hem, go long pipol long vilij, and readim scripture wea stap long invitation, and encouragem olketa for attendim Memorial. Taem olketa pablisa arrive, olketa faendaot hao waka wea olketa kam for duim, samfala duim finis! Datfala mayor, witim olketa pikinini bilong hem and tufala waef bilong hem, kam long Memorial. Evriwan wea attend, hem 27 pipol. Start long datfala taem, mayor lusim Methodist Church, hem start for study witim olketa Witness, and hem willing for givim land for buildim Kingdom Hall.
Tingting Hem Change
Fasin bilong olketa brata bilong iumi hem win tu for changem tingting bilong samfala wea againstim truth. Lukim example bilong disfala man Opoku. Wanfala spesol pioneer minister meetim hem long field service and offerim hem wanfala Wastaoa magasin. Opoku interest long wanfala article insaed long datfala magasin bat hem no garem selen. Datfala pioneer explainim hao hem no garem price, and leavim datfala magasin then arrange for kam bak moa. Taem hem kam bak, Opoku askem datfala pioneer: “Waswe, iu savve long mi? Planti long olketa pipol bilong iufala long taon bilong Harper savve long mi. Mi man for aotem olketa pikinini bilong iufala from skul!” Then hem talem hao hem nao principal bilong wanfala hae skul long taon and hem savve persecutim olketa pikinini bilong Olketa Jehovah’s Witness from olketa no salutim flag.
Bat, thrifala taem wea Olketa Jehovah’s Witness showimaot Christian love hem mekem Opoku lukluk moa long fasin bilong hem. First samting, hem lukim olketa Witness lukaftarem gud wanfala spiritual brata wea barava sik tumas. Olketa arrangem tu for hem kasem treatment long nara kantri. Opoku tingse datfala sik brata, hem wanfala bigman long olketa Witness bat bihaen hem herem hao hem wanfala wea semsem nomoa witim olketa nara Witness. Nara samting, long olketa year bilong 1990, Opoku kamap refugee long Côte d’Ivoire. Long wanfala day hem barava laek drink, hem go for baem wata long wanfala young man. Opoku garem selen wea datfala young man no garem eni change fitim, so hem givim free nomoa wata long hem. Taem hem givim Opoku wata, datfala young man askem hem: “Waswe, iu ting bae enitaem iumi lukim pipol olsem iu and mi givim free nomoa olketa samting long narawan and no askem selen?” Opoku luksavve hem mas wanfala Jehovah’s Witness, and datfala young man sei hem wanfala Witness. Wei wea disfala brata hem willing for give and kaenfala fasin bilong hem barava muvim Opoku. Last samting, wei wea datfala spesol pioneer willing for givim hem datfala magasin free mekem hem barava sure tingting bilong hem abaotem olketa Witness hem no stret and hem need for changem. Hem muv ahed long spiritual wei and distaem hem wanfala anbaptaes pablisa.
Nomata olketa brata long Liberia go ahed for feisim olketa barava hard taem, olketa trust long God and faithful for talemaot gud nius abaotem taem wea moabeta anda long raeteous rul bilong Kingdom bilong God. Jehovah bae no savve forgetim hard waka bilong olketa and love wea olketa showim for nem bilong hem.—Hebrews 6:10.
[Map long page 30]
(For formatted text, lukim pablikeson)
MONROVIA
[Piksa long page 31]
Long olketa taem bilong bigfala trabol, pipol bilong Jehovah provaedem spiritual and physical help long olketa wea garem need