‘Hem Teachim Mifala for Respectim Religion Bilong Hem’
WANFALA Jehovah’s Witness from province bilong Rovigo, Italy, hem faendaot hao hem garem wanfala tumor and hem barava serious. Bihaen hem stap for planti difren taem long hospital, wea hem ask for kasem nomoa treatment wea nating iusim blood transfusion, hem go bak long haos and olketa nurse bilong cancer clinic go lukaftarem hem long there.
Strongfala faith bilong disfala patient wea 36 year and wei wea hem willing for waka tugeta witim olketa doctor and nurse wea treatim hem mekem olketa barava tinghae long hem. No longtaem bifor hem dae from datfala cancer, wanfala long olketa nurse wea helpem hem, raet insaed wanfala magasin for olketa nurse abaotem disfala Jehovah’s Witness wea hem kolem Angela.
“Angela hem wanfala hapi woman and hem barava disaed strong for laef. Hem luksavve hao sik bilong hem barava serious, and olsem eniwan long iumi bae duim, hem tu luk aotem eni help, or medicine. . . . Mifala olketa nurse start for isisi savve long hem. Hem nating againstim help bilong mifala. And tu, wei wea Angela tok stret mekem evriting isi. Hem wanfala hapi samting for visitim hem, from mifala meet witim wanfala honest person and wea hem and mifala savve waka tugeta for kasem gud samting. . . . Stretawe mifala luksavve hao religion bilong hem nao bae stopem mifala for treatim sik bilong hem.” Datwan hem tingting bilong datfala nurse bikos hem tingse Angela shud kasem blood transfusion, wea hem nating willing for tekem.—Acts 15:28, 29.
“Mifala olketa nurse talem Angela hao mifala nating agree long disison bilong hem, bat from wanem hem talem, mifala luksavve hem tinghae long laef. Mifala luksavve tu hao religion bilong hem important long hem and famili bilong hem. Angela nating givap. Hem nating laekem datfala sik for winim hem. Hem strong. Hem laek for laef, hem faet for laef, and for go ahed for laef. Hem talemaot klia wei wea hem disaed strong and wanem hem bilivim. Hem garem wanfala wei for disaed strong wea mifala no garem, wanfala barava strong faith, wea mifala no garem olsem hem. . . . Angela teachim mifala hao mifala mas respectim religion bilong hem, nomata tingting bilong mifala hem difren. . . . Mifala savve samting wea Angela teachim long mifala hem barava important, from mifala bae meetim evri difren kaen pipol, wea kam from difren kaen living and religion and mifala savve lane from and savve givim samting long evriwan wea mifala meetim olketa.
Then datfala article insaed magasin hia strongim datfala Code of Professional Ethics for Italian Nurses, wea olketa appruvim long 1999, wea sei: “Taem nurse hem waka, hem shud tingim religion bilong each wan, tingting bilong hem, and kastom, and tu wanem tribe and hem man or woman.” Samfala taem, maet olketa doctor and nurse hard for respectim olketa biliv saed long religion bilong wanfala patient, and iumi tinghae and hapi long olketa wea willing for duim olsem.
Taem Olketa Jehovah’s Witness mekem disison saed long health bilong olketa and samting saed long medical, olketa barava tingting gud abaotem datwan. Olketa barava ting long serious wei abaotem wanem Bible talem, and olsem Angela showimaot, olketa no pipol wea ova tumas. (Philippians 4:5) Raonem earth, namba bilong olketa wea waka saed long health and wea willing for respectim conscience bilong olketa Witness patient hem kamap moa big.