Luk Aotem Gudfala Gavman
“Wei wea olketa kantri go ahed for depend long each other hem mekem staka problem kamap evriwea long world wea olketa kantri seleva hard for stretem. Only wei wea iumi savve win for deal witim olketa danger wea kakamap and olketa challenge wea olketa man feisim hem thru long wei for full world waka tugeta.”—Diswan hem toktok bilong man from Pakistan wea studyim politik, Ghulam Umar.
WORLD distaem fulap witim olketa kaen samting wea iumi hard for bilivim, bat wea maet tru. Nomata staka material samting stap, staka pipol mas barava stragol for kasem need bilong olketa. Pipol distaem wea stap long world wea iusim olketa electric samting, maet olketa nao skul gud and kasem bigfala savve winim pipol bifor, bat hem hard for staka pipol faendem waka wea olketa savve keepim for longfala taem. Nomata olketa man garem moa freedom winim enitaem bifor, staka million pipol fraet, and no feel sef. Iumi maet garem staka gudfala chance, bat from raverave fasin and fasin wea no followim law kamap evriwea, diswan mekem staka pipol for no garem hope.
Olketa problem wea olketa man feisim hem big tumas and hem winim wanem wanfala kantri seleva or staka kantri tugeta savve stretem. Dastawe staka pipol sei only wei for peace and sef living kamap really samting long world, hem for evri kantri mas wan mind anda long wanfala gavman nomoa. Olsem example, longtaem bifor, Albert Einstein mekhae long diskaen idea. Long 1946, hem talemaot strong: “Mi barava sure hao staka pipol long world laek for garem peace and sef living . . . Wei wea olketa man barava laekem peace savve kamap nomoa thru long wei for garem wanfala gavman for full world.”
Fifti year hem go pas finis bat man no kasem yet disfala barava important need. Wanfala article long Le Monde niuspepa long Paris, France, sei olsem taem hem listim olketa challenge bilong mek-21 century: “Wanem iumi mas duim hem for garem wanfala gavman for full world and mekem wanfala faondeson for gavman hia saed long Law, Constitution, and administration, wea bae givim hem paoa eniwea long world for kwiktaem duim samting taem wei for killkill midolwan pipol from olketa difren kantri or tribe hem kamap. Man need for ting long disfala Earth olsem hem wanfala kantri nomoa.” Hu or wanem nao garem paoa and savve for duim diswan for mekem olketa man garem peace long future?
Waswe, United Nations Savve Duim Diswan?
Staka pipol hope long organization bilong United Nations for mekem world garem peace. Waswe, UN hem wanfala gavman wea savve mekem kamap trufala peace and sef living long world? Staka taem iumi herem pipol bilong politik talem samting wea here gud and olketa promisim gudfala samting. Olsem example, “Millennium Declaration” bilong United Nations General Assembly long year 2000, mekem disfala resolution: “Mifala bae barava duim best bilong mifala for mekem pipol no safa from war, nomata war wea happen insaed wanfala kantri or midolwan olketa difren kantri, wea killim dae winim 5 million pipol insaed tenfala year wea go pas finis.” Pipol and olketa organization praisem and tinghae long UN for diskaen toktok, and tu hem kasem 2001 Nobel Peace Prize. Norwegian Nobel Committee honorim UN, taem hem sei: “Only thru long United Nations nomoa peace and wei for waka tugeta savve kamap long world.”
Nomata olsem, waswe, organization bilong United Nations wea start long 1945, showimaot hem wanfala gavman wea fit for mekem world garem tru peace for olowe? Nomoa, from wei wea olketa kantri wea member bilong hem tingim olketa seleva nomoa and duim samting for kantri bilong olketa seleva diswan stopem samting wea hem bin trae for duim. Olsem wanfala niusman hem sei, pipol ting long UN olsem “wanfala samting wea showimaot nomoa tingting wea pipol evriwea long world garem,” and olketa ting long “olketa problem wea UN deal witim olsem samting olketa bin story raonem for staka year and no garem eni ansa yet for stretem.” So disfala kwestin kamap: Waswe, enitaem olketa kantri long world bae kamap wan mind?
Bible showimaot hao datwan klosap nao for happen. Hao nao diswan bae kamap? And wanem kaen gavman nao bae mekem datwan kamap? For savve long ansa bilong olketa kwestin hia, plis readim next article.
[Piksa long page 3]
Einstein mekhae long wei for garem nomoa wanfala gavman for full world
[Credit Line]
Einstein: U.S. National Archives photo