Waswe, Iu Remember?
Waswe, iu enjoyim olketa Wastaoa wea iu readim insaed olketa month wea go pas finis? Sapos olsem, trae for ansarem olketa kwestin long daon.
• Wanem nao Complutensian Polyglot, and why nao hem important?
Hem wanfala Bible wea garem olketa difren languis insaed wea olketa laenem olketa languis hia tugeta. Hem olketa best transleison bilong datfala taem long Hebrew, Greek, and Latin, and samfala part long Aramaic languis. Disfala polyglot Bible hem barava help for mekem wanfala Bible wea moabeta saed long olketa firstfala Bible languis.—4/15, page 28-31.
• Hao nao olketa man savve mekem God hapi?
From hem wanfala person wea laef, Jehovah savve tingim and duim samting and garem feeling. Hem wanfala “hapi God” and hem hapi for go ahed for fulfillim purpose bilong hem. (1 Timothy 1:11; Psalm 104:31) Taem iumi lanem moa samting abaotem olketa feeling bilong God, datwan bae mekem iumi savve wanem iumi savve duim for mekem heart bilong God hapi.—5/15, page 4-7.
• Why nao David letem waef bilong hem Michal for keepim wanfala teraphim image?
Taem King Saul plan for killim dae David, Michal helpem hem for ranawe taem hem putim wanfala image wea luk olsem sheip bilong wanfala man antap long chair. Hem maet garem wanfala image bikos hem nating servem God witim full heart. David maet nating savve abaotem diswan or hem letem nomoa bikos Michal hem dota bilong King Saul. (1 Chronicles 16:25, 26)—6/1, page 29.
• Wanem important truth nao law bilong God abaotem blood showim iumi?
Thru long toktok wea God talem bihaen long Flood, insaed Law Bilong Moses, and law wea stap long Acts 15:28, 29, hem point go long sakrifaes wea Jesus hem pourimaot blood. Only thru long datfala blood iumi savve kasem forgiveness and peace witim God. (Colossians 1:20)—6/15, page 14-19.
• Haomas mirakol bilong Jesus nao Bible storyim?
Olketa Gospel story abaotem 35-fala mirakol bilong Jesus. Bat iumi no savve full namba bilong olketa mirakol wea Jesus duim, insaed diswan hem samfala wea Bible no storyim. (Matthew 14:14)—7/15, page 5.