Kwestin From Reader
Why nao David, wanfala faithful servant bilong Jehovah, letem waef bilong hem Michal for keepim wanfala teraphim image, or idol, olsem 1 Samuel 19:12, 13 showimaot?
Letem iumi lukluk gud firstaem long disfala story. Taem waef bilong David herem nius hao King Saul plan for killim dae David, hem kwiktaem duim samting. Bible sei: “Michal talem David for go daon thru long window, mekem hem savve go and ranawe. Then Michal tekem disfala teraphim image [wea luk olsem size and sheip bilong hem olsem wanfala man] and putim long chair, and hem putim samfala hair bilong goat long hed bilong image hia, then hem kavarem witim kaleko.” Taem olketa man bilong Saul kam for kasholem David, Michal sei long olketa: “Hem sik.” Disfala trik mekem David garem moa taem, wea mekem hem fit for ranawe evribit.—1 Samuel 19:11-16.
Pipol wea studyim olketa oldfala samting faendem hao pipol long taem bifor keepim olketa teraphim image for iusim saed long worship and tu olketa iusim saed long law. Olketa bifor savve iusim wanfala teraphim image long sem wei wea pipol distaem iusim pepa for showimaot hu nao ownim wanfala samting and pepa wea showimaot hu nao bae kasem samting bihaen man hem dae. Sapos wanfala man garem teraphim maet hem garem right for tekem property bilong dadi-in-law bilong hem bihaen dadi hem dae. Maet diswan nao reason why Rachel tekem olketa teraphim image bilong dadi bilong hem and why dadi barava laek for tekem bak. Long datfala taem, Jacob, hasband bilong Rachel, nating savve long samting wea waef bilong hem duim.—Genesis 31:14-34.
Taem olketa Israelite kamap wanfala nation, olketa kasem Ten Komandment wea, mek-tu komandment hem stopem wei for wakem idol. (Exodus 20:4, 5) Bihaen, profet Samuel tok abaotem disfala law taem hem story long King Saul. Hem sei: “Wei for bighed hem semsem olsem sin bilong divination, and wei for go ahed for praod hem semsem olsem wei for iusim paoa wea no stret and olsem wei for worshipim teraphim image.” (1 Samuel 15:23) From diswan, luk olsem olketa long Israel nating iusim teraphim saed long law for tekem samting bihaen man dae. Nomata olsem, maet samfala long Israel go ahed for followim disfala kastom biliv bilong olketa Jew. (Judges 17:5, 6; 2 Kings 23:24) Luk olsem Michal nating servem Jehovah witim full heart dastawe hem keepim wanfala teraphim image witim olketa samting bilong hem. Maet David nating savve abaotem disfala teraphim image or hem letem nomoa bikos Michal hem dota bilong King Saul.
Tingting bilong David saed long wei for worshipim Jehovah nomoa, hem showaot long toktok hia: “Jehovah hem nambawan and barava fit for kasem praise, and hem nao man shud fraet long hem winim evri nara god. From evri god bilong pipol olketa iusles god. For saed bilong Jehovah, hem wakem heven.”—1 Chronicles 16:25, 26.
[Piksa long page 29]
Mek-tu law long Ten Komandment stopem wei for wakem idol olsem disfala teraphim long hia
[Credit Line]
From the book The Holy Land, Vol. II, 1859