Wei wea Pipol Luk Aotem Hapi
SAMFALA year wea go finis, wanfala survey askem pipol long France, Germany, Great Britain, and United States disfala kwestin: “Wanem nao savve mekem iu hapi?” Eiti naen percent long pipol wea olketa interviewim, sei man mas healthy; 79 percent sei mas garem gudfala marit or fren gud witim man long opposite sex wea hem no maritim; 62 percent mekhae long gud samting wea kamaot long wei for garem pikinini; and 51 percent tingse wei for win long waka bilong olketa nao savve mekem man hapi. And nomata staka pipol herem evritaem hao selen no savve mekem man hapi, 47 percent long olketa wea olketa askem barava sure selen savve mekem man hapi. Wanem nao tru samting?
First samting, iumi laek storyim kaen tingting wea sei sapos man garem selen diswan bae mekem hem hapi. Wanfala survey long wan handred pipol wea barava rich tumas long United States showimaot hao olketa no hapi winim nara pipol. And tu, olketa savveman saed long mind sei nomata staka pipol long United States garem staka moa material samting insaed thirti year wea go pas finis, olketa no kamap moa hapi. For tok stret, wanfala report sei: “Insaed datfala semtaem, wei for garem sorre feeling wea no savve finis barava kamap big tumas. Namba bilong young pipol wea suisaed kamap thrifala taem moa big. Namba bilong pipol wea divorce kamap tufala taem moa big.” Long samting olsem 50 difren kantri, pipol wea duim research saed long wei wea selen and hapi join tugeta luksavve hao selen no savve mekem man hapi.
Mek-tu samting, waswe, wei for healthy, garem gudfala marit, and win long waka hem important for mekem man hapi? For tok stret, sapos olketa samting hia nomoa savve mekem man hapi, waswe long planti million pipol wea no healthy and evriwan wea no garem gudfala marit? Waswe, long olketa hasband and waef wea no garem pikinini and evri man and woman wea no win long waka bilong olketa? Waswe, laef bilong evriwan hia bae no hapi nao? And waswe, pipol wea healthy and garem gudfala marit distaem bae still hapi sapos diswan hem change?
Waswe, Iumi Luk Aotem Hapi Long Stretfala Ples?
Evriwan laek for hapi. Iumi no sapraes long diswan bikos Creator bilong man hem “datfala hapi God,” and God wakem man long image bilong hem. (1 Timothy 1:11; Genesis 1:26, 27) Dastawe, hem normal samting nomoa for olketa man luk aotem wei for hapi. Bat, staka savve wei for holem hapi, hem olsem for holem sandbis—tufala samting hia isi for lus.
Bat, waswe, maet samfala ova tumas for luk aotem wei for hapi? Eric Hoffer, savveman saed long living bilong olketa man hem ting olsem tu. Hem sei: “For luk aotem hapi nao main samting wea mekem man no hapi.” Datwan hem barava tru sapos iumi luk aotem hapi long rong ples. Taem olsem, iumi bae kasem nomoa wei for feel sorre and kros. Man hard tumas for kasem hapi from wei for kamap rich; waka hard for kasem bignem or pipol savve long hem; aftarem olketa goal saed long politik, selen, and community; or wei for tingim seleva and for kasem kwiktaem samting hem laekem. Dastawe, samfala garem sem tingting olsem wanfala man for raet, wea sei: “Sapos iumi no trae hard tumas for hapi, iumi bae savve hapi nomoa”!
Samting wea important tu, datfala survey wea iumi storyim firstaem showimaot hao 4-fala long evri 10-fala pipol ting hao wei for hapi hem kamap taem man duim gud samting and helpem nara pipol. And 1-fala long evri 4-fala strongim hao wei for garem faith and for biliv strong long religion hem important for mekem man hapi. Hem klia tumas, iumi need for lukluk gud long wanem nao savve mekem man kasem trufala hapi. Next article bae helpem iumi for duim datwan.
[Olketa Piksa long page 3]
Staka pipol tingse selen, gudfala famili laef, or wei wea man win long laef waka bilong hem nao savve mekem man hapi. Waswe, iu agree long datwan?