Laekem Tumas Staka Samting

“Sapos iumi evritaem laekem tumas staka samting, bae iumi no savve satisfae.”​—Worldwatch Institute report.

“WANEM nao iumi laekem? Evriting. Wanem taem nao iumi laek garem? Distaem.” Long olketa year bilong 1960 diswan hem toktok wea samfala student long college talem evritaem. Iu maet no herem datfala sem toktok distaem, bat main idea bilong hem still stap. Tru nao, hem wei bilong pipol distaem for laekem tumas staka samting.

Wanfala main samting for staka pipol hem for kamap rich and garem staka samting. Jimmy Carter, President bilong U.S. bifor, hem sei: “Pipol no savve long man from wanem hem duim bat from wanem hem garem.” Waswe, eniting hem barava important winim wanem iumi garem? Sapos olsem, wanem nao datwan, and wanem gud samting nao savve kamaot from datwan?