Hu Nao Datfala “Tru God and Datwan wea Givim Laef Olowe”?
JEHOVAH, Dadi bilong Lord bilong iumi Jesus Christ, hem nao datfala tru God. Hem nao Creator, datwan wea givim laef olowe long olketa wea lovem hem. Hem nao wei wea staka wea readim and bilivim Bible bae ansarem datfala kwestin long title antap. Tru nao, Jesus hem sei: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.”—John 17:3.
Bat, staka wea go long church garem difren wei for minim datfala toktok. Title hem kam from 1 John 5:20, wea sei: “Iumi wan mind witim datfala tru wan, thru long Son bilong hem Jesus Christ. Diswan nao tru God, and datwan wea givim laef olowe.”
Olketa wea biliv long Trinity talem hao datfala word “diswan” (houʹtos) hem Jesus Christ wea nem bilong hem stap long datfala verse just bifor hem raetem datfala word “diswan” long next sentence. Olketa talem hao Jesus nao datfala “tru God and datwan wea givim laef olowe.” Bat wei for talem olsem, hem againstim wanem full Bible hem talem. And planti savveman wea garem bignem no acceptim disfala tingting wea saedem Trinity. Savveman long Cambridge University, B. F. Westcott hem sei: “Hem followim stretfala tingting for sei datfala word [diswan] hem abaotem main wan wea datfala aposol hem tingim taem hem raetem datwan, no datfala nem wea stap klosap long word [diswan] long datfala verse.” So, aposol John tingim Dadi bilong Jesus. Savveman from Germany, Erich Haupt hem sei: “Iumi mas disaedem sapos [hou’tos’] wea hem stap long next sentence hem join witim subject bilong first part bilong verse, Jesus Christ, wea nem bilong hem stap just bifor datwan long verse . . . or hem abaotem samwan moa wea aposol hem storyim finis. . . . Hem luk olsem wei for sei diswan hem abaotem datfala tru God hem barava fitim datfala last warning againstim olketa idol winim for sei diswan hem pruvim hao Christ hem God.”
And tu, A Grammatical Analysis of the Greek New Testament, wea Pontifical Biblical Institute bilong Rome pablisim, hem sei: “Saed long [Houʹtos’], hem klia hao [verse 18-20] hem barava abaotem datfala real and tru God, wea hem againstim worship bilong olketa heathen (v. 21).”
Planti taem houʹtos, wea klosap evritaem olketa transleitim “diswan,” hem no abaotem subject or toktok wea man storyim just bifor hem raetem “diswan.” Olketa nara scripture showimaot disfala point. Long 2 John 7, datfala sem aposol and wan wea raetem 1 John hem sei: “Planti man for giaman kam insaed long world, olketa man wea no bilivim Jesus Christ hem kam long body. Diswan [houʹtos] nao man for giaman and enemy bilong Christ.” Hard for iumi sei “diswan” hem minim Jesus Christ from nem bilong hem stap klosap long “diswan” long sentence. Hem klia hao “diswan” hem minim olketa wea denyim Jesus. Evriwan long olketa nao “datfala man for giaman and enemy bilong Christ.”
Long Gospel bilong hem, aposol John hem sei: “Andrew, brata bilong Simon Peter hem wanfala long tufala wea herem samting wea John talem and followim Jesus. Firstaem diswan [houʹtos] hem go faendem brata bilong hem, Simon.” (John 1:40, 41) Hem klia hao “diswan” hem no minim John from hem nao nem wea stap long sentence just bifor datfala word “diswan,” bat hem minim Andrew. Long 1 John 2:22, datfala aposol hem iusim “diswan” long sem wei.
Luke tu iusim “diswan” [houʹtos] long sem wei, olsem iumi lukim long Acts 4:10, 11: “Long nem bilong Jesus Christ datfala man from Nazareth, wea iufala nilam long post bat wea God mekem laef bak from dae, thru long diswan nao man hia kamap gud and standap front long iufala. Diswan [houʹtos] nao ‘ston wea iufala wea buildim haos rejectim wea kamap main ston long kona.’ ” Long hia, “diswan” hem no datfala man wea kasem healing, nomata hem nao wan wea scripture hem storyim just bifor datfala word “diswan.” For sure, “diswan” long verse 11 hem Jesus Christ datfala man from Nazareth, datfala “ston long kona” wea hem nao faondeson bilong Christian kongregeson.—Ephesians 2:20; 1 Peter 2:4-8.
Acts 7:18, 19 showimaot klia disfala point tu: ‘Difren king rulim Egypt, wea nating savve long Joseph. Diswan [houʹtos] iusim nogud trik saed long politik for spoelem pipol bilong iumi.’ “Diswan” wea hem daonem olketa Jew, hem no Joseph, bat hem Pharaoh, king bilong Egypt.
Olketa scripture olsem wan mind witim Greek savveman Daniel Wallace, wea sei, saed long olketa Greek word for changem nem bilong man, “nomata wanfala nem stap klosap long word for changem nem bilong man long sentence, man wea raetem datwan maet tingim difren man.”
“Datfala Tru Wan”
Olsem aposol John hem raetem, “datfala tru wan” hem Jehovah, Dadi bilong Jesus Christ. Hem nao only tru God, datfala Creator. Aposol Paul hem sei: “Iumi garem wanfala God datfala Dadi, wea evri samting kamap from hem.” (1 Corinthians 8:6; Isaiah 42:8) Nara reason why Jehovah hem “datfala tru wan” olsem 1 John 5:20 talem, hem bikos hem nao Datwan wea givim truth. Man for raetem olketa psalm hem kolem Jehovah “datfala God bilong truth” bikos Hem faithful long evri samting hem duim and Hem kanduit laea. (Psalm 31:5; Exodus 34:6; Titus 1:2) Taem hem story abaotem Dadi bilong hem long heven, datfala Son hem sei: “Word bilong iu nao truth.” And saed long olketa samting wea hem teachim, Jesus hem sei: “Wanem mi teachim hem no bilong mi, bat bilong hem wea sendem mi kam.”—John 7:16; 17:17.
Jehovah hem “datwan wea givim laef olowe” tu. Hem nao Datwan wea givim laef olsem present wea iumi no fit for kasem, thru long Christ. (Psalm 36:9; Romans 6:23) Hem important for tingim tu, hao aposol Paul talem hao God hem “datwan wea givim reward long olketa wea barava luk aotem hem.” (Hebrews 11:6) God givim reward long Son bilong hem taem hem mekem hem laef bak moa, and Hem bae givim laef olowe long olketa wea servem hem witim full heart.—Acts 26:23; 2 Corinthians 1:9.
So hao nao iumi savve minim evri samting hia? Jehovah nomoa hem datfala “tru God and datwan wea givim laef olowe.” Hem nomoa fit for kasem worship from olketa wea hem creatim.—Revelation 4:11.