Waswe, Iu Laek for Stap Long World wea Iu Bae No Fraet?

“Iumi ‘evritaem garem feeling for fraet tumas and . . . feel olsem iumi no wei nao.’ Diswan kamap from iumi ‘stap . . . long danger bat iumi no savve wanem taem or hao nao diswan bae kamap.’”

TOKTOK hia, stap insaed Newsweek magasin bilong nara year wea go finis. Diswan showimaot feeling bilong staka pipol distaem insaed disfala world wea fulap witim trabol. Jesus Christ sei kaen feeling olsem bae kamap moa big long future. Hem talem finis hao olketa nation bae fraet tumas and olketa bae no savve wanem for duim. Olketa man bae kamap wik from olketa fraet tumas and from olketa savve long samting wea bae kasem earth. Bat iumi no need for fraet or feel olsem iumi no wei nao, bikos Jesus sei moa: “Taem evri samting hia start for happen, standap stret and liftimap hed bilong iufala, from taem for sevem iufala hem kam klosap nao.”—Luke 21:25-28.

Jehovah God storyim living bilong pipol bilong hem long earth bihaen datfala taem wea hem bae sevem olketa. Hem sei: “Pipol bilong mi mas stap long ples wea garem peace and long ples wea olketa savve trustim evribit and long ples for rest wea no eniwan savve spoelem.” (Isaiah 32:18) Profet Micah talem toktok bilong Jehovah olsem moa: “Olketa bae sidaon, each wan anda long grape tree and anda long fig tree bilong hemseleva, and no eniwan bae mekem olketa seksek.”—Micah 4:4.

Datwan hem barava difren tumas from distaem! Bae no eni danger stap for mekem man fraet. Winim wei for man evritaem garem feeling for fraet tumas and feel olsem no wei nao, bae olketa man garem peace and hapi wea no savve finis.