Kwestin From Reader
Wea nao olketa demon stap taem Christ hem rul for wan thousand year?
Bible no talem stret ansa for disfala kwestin. Nomata olsem, iumi fit for savve wea olketa demon stap taem Christ hem rul for wan thousand year.
Aposol John lukim samting wea happen long start and end bilong datfala rul wea gohed for wan thousand year, hem sei: “Mi lukim wanfala angel kakam daon from heven and hem garem key bilong datfala hol wea barava deep tumas and hem holem wanfala bigfala chain long hand bilong hem. And hem kasholem datfala big snek, datfala snek wea stap bifor kam, wea hem nao Devil and Satan, and hem taemapem hem for wan thousand year. And hem torowem hem go insaed long datfala hol wea barava deep tumas and hem satem and lokim hem insaed, mekem hem no leadim rong olketa nation go kasem taem datfala wan thousand year hem finis. Bihaen datwan, olketa mas mekem hem kamaot for lelebet taem.” (Revelation 20:1-3) Olketa verse hia storyim nomoa wei wea olketa torowem Satan insaed datfala hol wea barava deep tumas and hao gogo bae olketa letem hem kamaot for lelebet taem. Hem tru, diswan no talem eniting abaotem olketa demon. Bat, iumi fit for bilivim hao Jesus Christ, datfala angel wea garem key for datfala deep hol, bae duim sem samting long olketa demon, taem hem kasholem Devil and torowem insaed datfala deep hol.—Revelation 9:11.
Samting wea Jesus Christ duim taem hem kamap King long heven long 1914, hem barava affectim Satan and olketa demon tu. Revelation 12:7-9 sei olsem: “War hem start long heven: Michael and olketa angel bilong hem faet againstim datfala bigfala snek, and datfala bigfala snek and olketa angel bilong hem [olketa demon] faet bak bat hem no win, and no eni ples stap for olketa long heven. So, olketa torowem kam daon datfala bigfala snek, datfala snek bilong bifor kam, datwan wea olketa kolem Devil and Satan, wea hem leadim rong olketa man long earth; olketa torowem hem kam daon long earth, and olketa torowem olketa angel bilong hem kam daon witim hem.” So start long datfala taem, Satan and olketa demon stap raon long earth nomoa. Iumi fit for bilivim hao taem Jesus torowem Satan insaed long deep hol for mekem earth kamap free, bae hem duim sem samting tu long olketa demon.
Tingim tu first profesi long Bible. Hem read olsem: “Mi [God] bae putim fasin for heit midolwan long iu [Satan] and long woman [organization bilong Jehovah long heven] and midolwan long seed bilong iu [Satan] and seed bilong hem [Jesus Christ]. Hem bae killim iu long hed and iu bae killim hem long leg.” (Genesis 3:15) Part long datfala wei for killim snek long hed, hem wei wea Satan bae stap long datfala deep hol long taem Christ rul for wan thousand year. Datfala profesi talem tu, hao fasin for heit bae stap midolwan long datfala seed bilong woman and seed bilong Satan. Olketa wicked angel, wea iumi kolem demon, olketa part long disfala seed wea hem nao organization bilong Satan. So hem barava fitim for sei taem Jesus torowem Satan long deep hol, hem bae duim sem samting long olketa demon. Wei wea olketa wicked spirit barava fraetem datfala hol wea deep tumas showimaot hao olketa luksavve bae olketa insaed datwan.—Luke 8:31.
Bat waswe, wei wea Revelation 20:1-3 no storyim olketa demon, hem from olketa distroe finis long Armageddon witim nara part long seed bilong Satan? Bible showimaot diswan no tru. Hem story olsem abaotem last samting wea bae kasem Satan: “Datfala Devil wea leadim rong olketa nation, olketa torowem go insaed long lake bilong fire and sulphur, ples wea wild animal and false profet stap insaed finis; and olketa bae kasem pain day and naet for olowe and olowe.” (Revelation 20:10) Datfala wild animal and false profet hem olketa sekson bilong politik wea part long organization bilong Satan. (Revelation 13:1, 2, 11-14; 16:13, 14) Olketa bae distroe long Armageddon, taem Kingdom bilong God smasem and finisim evri kingdom long world. (Daniel 2:44) Bible storyim “fire bilong olowe wea hem redim for Devil and olketa angel bilong hem.” (Matthew 25:41) Olsem wei wea datfala wild animal and false profet bae finis for olowe, Satan and olketa demon bilong hem bae go insaed datfala sem “lake bilong fire and sulphur.” Sapos olketa strongfala demon hia wea part long seed bilong Satan distroe finis long Armageddon, bae Bible mas talem hao olketa stap finis witim datfala wild animal and false profet long datfala tokpiksa lake bilong fire. Wei wea Revelation 20:10 no storyim olketa demon showimaot olketa no distroe long Armageddon.
From Bible no talem stret hao olketa torowem olketa demon insaed hol wea deep tumas, hem no talem tu wei wea olketa kamaot for lelebet taem bihaen. Nomata olsem, olketa bae kasem sem samting olsem Devil. Bihaen, taem Jesus letem Devil kamaot, olketa demon kamaot tu. Olketa bae waka witim Satan for mekem lastfala test for olketa man long end bilong datfala wan thousand year. Then Jesus bae torowem olketa demon hia tu insaed long datfala lake bilong fire and bae olketa finis for olowe.—Revelation 20:7-9.
Dastawe, taem Revelation 20:1-3 storyim wei wea olketa kasholem and torowem Satan long hol wea deep tumas wea mekem hem no fit for duim eniting, iumi fit for sei olketa angel bilong hem tu bae olketa taemapem and torowem long datfala deep hol witim hem. Tru nao, Satan and olketa demon bilong hem no fit for stopem wei wea God bae fulfillim purpose bilong hem for mekem earth kamap wanfala paradaes and for mekem olketa man kamap perfect taem Christ rul for wan thousand year.