Wat Nao Truth Abaotem Olketa Angel?

Jehovah laekem iumi for savve lo famili blo hem lo heven. Olketa angel insaed datfala famili and Bible sei olketa “son blo God.” (Job 38:7, NW) Wat nao Bible talem abaotem olketa angel? Hao nao samting wea olketa duim affectim pipol? Hao, evri angel nao insaed famili blo God?

1. Wat nao Bible talem abaotem olketa angel?

Jehovah creatim olketa angel bifor hem wakem earth. Olketa stap lo heven and iumi no lukim olketa tu olsem God. (Hebrew 1:14) Staka million angel stap and evriwan difren. (Revelation 5:11) Olketa ‘obeyim toktok blo [Jehovah] an lisin long samting hemi talem.’ (Sams 103:20) Lo bifor, samfala taem Jehovah sendem olketa angel for pasim message, helpem, and sevem pipol blo hem. Distaem, olketa angel leadim olketa Christian for go lo pipol wea laek for lane abaotem God.

2. Wat nao Bible talem abaotem Satan and olketa demon?

Samfala angel no faithful lo Jehovah. First wan wea againstim God “nem bilong hem Devil and Satan, wea hem laea long evriwan long earth.” (Revelation 12:9) Satan laek for rulim narawan, so hem leadim Adam and Eve for no obeyim Jehovah, then bihaen samfala angel tu. Bible kolem olketa angel hia olketa demon. Jehovah raosem olketa from heven and iusim Jesus for torowem olketa kam lo earth, then lo future God bae distroem olketa.​—Readim Revelation 12:9, 12

3. Wat nao Satan and olketa demon duim for trae for laea lo iumi?

Satan and olketa demon iusim spiritism for laea lo staka pipol. Spiritism hem minim for trae story witim demon. Example nao, samfala pipol go lo olketa wea bilivim astrology, pipol wea savve talem future blo man, and olketa witch doctor. Olketa narawan go lo kastom man for kiurim olketa. Satan and olketa demon trikim pipol tu for tingse man wea dae finis savve story witim olketa. Bat Jehovah sei: “No go lukim olketa kastom man and pipol wea story lo demon for savve lo future blo man.” (Leviticus 19:31, NW) Hem talem warning hia for protectim iumi from Satan and olketa demon. Olketa enemy blo God and olketa laek spoelem iumi.

DIG GO MOA

4. Olketa angel helpem pipol for lane abaotem Jehovah

Olketa angel blo God no go for preach lo pipol. Bat, olketa leadim pipol blo God lo olketa wea laek for lane abaotem God. Readim Revelation 14:6, 7, then discussim tugeta olketa kwestin hia:

• Why nao iumi needim olketa angel for helpem iumi for duim preaching waka?

• Hao, iu hapi for savve olketa angel leadim iu for go lo pipol wea need for herem message lo Bible? Why nao olsem?

5. No duim eni samting wea join witim spiritism

Satan and olketa demon enemy blo Jehovah and iumi tu. Readim Luke 9:38-42, then discussim tugeta kwestin hia:

• Wat nao olketa demon duim lo pipol?

Iumi mas no duim eniting for mekem olketa demon affectim iumi. Readim Diutronomi 18:10-12, then discussim tugeta olketa kwestin hia:

• Wat nao olketa demon iusim for trae story lo iumi and for mekem iumi duim wanem olketa laekem? Wat nao pipol lo ples blo iu duim wea join witim spiritism?

• Iu tingse hem gud for Jehovah stopem iumi for duim eni samting wea join witim spiritism? Why nao olsem?

Pleim VIDEO, then discussim tugeta olketa kwestin hia.

VIDEO: “Againstim Devil” (5:02)

• Iu tingse samting wea Palesa taengem lo hand blo baby blo hem bae spoelem hem? Why nao olsem?

• Wat nao Palesa mas duim for protectim hem from olketa demon?

Olketa tru Christian evritaem duim samting for againstim olketa demon. Readim Acts 19:19 and 1 Corinth 10:21, then discussim tugeta kwestin hia:

• Why nao hem important for distroem eni samting wea iu garem wea join witim spiritism?

6. Winim faet againstim Satan and olketa demon

Satan nao leader blo olketa demon. Bat leader blo olketa faithful angel hem chief angel Michael, wea nem blo hem tu Jesus. Hao, Michael garem bigfala paoa? Readim Revelation 12:7-9, then discussim tugeta olketa kwestin hia:

• Hu nao garem bigfala paoa? Michael and olketa angel blo hem or Satan and olketa demon?

• Iu tingse olketa follower blo Jesus need for fraetem Satan and olketa demon?

Iu savve winim Satan and olketa demon blo hem. Readim James 4:7, then discussim tugeta kwestin hia:

• Wat nao iu savve duim for protectim iuseleva from Satan and olketa demon?

MAIN POINT

Olketa faithful angel savve helpem iumi. Satan and olketa demon enemy blo Jehovah, and olketa iusim spiritism for laea lo pipol.

Review

• Wat nao olketa angel blo Jehovah duim for helpem pipol for lane abaotem hem?

• Wat nao Bible talem abaotem Satan and olketa demon?

• Why nao iumi no laek for duim eniting wea join witim spiritism?

FAENDAOT MOA

Read abaotem why nao iumi savve Jesus nao datfala chief angel Michael.

“Hu Nao Michael Datfala Chief Angel?” (Article lo jw.org)

Read abaotem pruv wea showim Devil hem wanfala angel wea stap.

“Hao, Devil Hem Wanfala Angel wea Stap?” (Article lo jw.org)

Read abaotem wanfala woman wea free from olketa demon.

“Hem Faendem Laef wea Garem Mining” (The Watchtower, July 1, 1993)

Read abaotem hao Satan iusim spiritism for laea lo pipol.

“Truth Abaotem Magic, Devildevil Samting, and Olketa Witch” (Road for Kasem Laef Olowe part 5)