Hem Gud Tumas for Garem Aim for Baptaes!

Jesus sei olketa Christian mas baptaes. (Readim Matthew 28:19, 20.) Bat wat nao hem minim for baptaes? And wat nao man mas duim for baptaes?

1. Wat nao stretfala wei for baptaes?

Datfala word “baptaes” hem kam from Greek toktok wea minim for “putim go insaed” lo wata. Taem John baptaesim Jesus lo Jordan River, full body blo hem nao go insaed lo wata, then hem “kamaot from wata.” (Mark 1:9, 10) Olketa tru Christian followim example blo Jesus taem olketa baptaes. Full body nao mas go insaed lo wata.

2. Taem man baptaes, wat nao datwan showim?

Taem man baptaes hem showim hem dedicate lo Jehovah God. Wat nao hem minim for dedicate? Bifor man baptaes, hem talem wanfala spesol prea and sei lo Jehovah hem laek for worshipim Hem for olowe. Lo datfala prea hem promis for worshipim Jehovah nomoa and samting wea important tumas lo laef blo hem nao for duim wanem God laekem. Hem disaed “for givim laef blo hem for God . . . and gohed followim” olketa teaching blo Jesus and example blo hem. (Matthew 16:24) From hem dedicate and baptaes, datwan mekem hem savve fren gud witim Jehovah and olketa wea worshipim Jehovah.

3. Wat nao man mas duim bifor hem savve baptaes?

Bifor man hem baptaes hem important for hem lane abaotem Jehovah and strongim faith blo hem lo Jehovah. (Readim Hebrew 11:6.) Taem iu gohed lane abaotem Jehovah, datwan bae strongim faith and love blo iu for Jehovah. Datwan bae mekem iu laek for preach abaotem hem and followim olketa standard blo hem. (2 Timothy 4:2; 1 John 5:3) Taem man “duim samting wea fitim pipol wea worshipim Jehovah,” bae hem disaed for dedicate lo God and baptaes.​—Colossae 1:9, 10.a

DIG GO MOA

4. Iumi savve lane from samting wea happen taem Jesus baptaes

Readim Matthew 3:13-17 for lanem samfala samting moa wea happen taem Jesus baptaes, then discussim tugeta olketa kwestin hia:

• Hao, Jesus baptaes taem hem baby yet?

• Hao nao hem baptaes? Olketa kapsaetem lelebet wata nomoa lo hed blo hem?

Bihaen Jesus baptaes nao hem duim spesol waka wea God givim lo hem for duim lo earth. Readim Luke 3:21-23 and John 6:38, then discussim tugeta disfala kwestin:

• Bihaen Jesus baptaes, wat kaen waka nao hem important tumas lo hem?

5. For baptaes hem aim wea iumi evriwan fit for kasem

Maet firstaem iu tingse for dedicate and baptaes hem hard samting for duim. Bat, sapos iu gohed for lane abaotem Jehovah and savve gud lo hem, bae iu no fraet for mekem disfala important disison. For lukim samfala pipol wea duim datwan, pleim disfala VIDEO.

VIDEO: Duim Samting for Fren Witim Jehovah (1:11)

Readim John 17:3 and James 1:5, then discussim tugeta disfala kwestin:

• Wat nao man savve duim mekem hem fit for baptaes?

1. Iumi dedicate taem iumi talem wanfala spesol prea lo Jehovah for worshipim hem for olowe

2. Taem iumi baptaes, iumi showim lo pipol iumi dedicate lo God

6. Taem man baptaes hem joinim famili blo Jehovah

Taem mifala baptaes, mifala joinim wanfala famili wea stap evriwea lo world wea garem wan mind. Nomata mifala kam from difren ples and garem difren baekgraon, mifala garem sem biliv and followim olketa standard wea stap lo Bible. Readim Sams 25:14 and 1 Peter 2:17, then discussim tugeta disfala kwestin:

• Olsem tufala scripture hia storyim, wat nao gud samting wea man savve kasem taem hem baptaes?

MAIN POINT

Jesus sei olketa Christian mas baptaes. Bifor man hem baptaes, hem mas strongim faith blo hem lo Jehovah, followim olketa standard blo Hem, and dedicate lo Hem.

Review

• Wat nao stretfala wei for baptaes, and why nao hem important?

• Taem man hem baptaes, wat nao datwan showim?

• Wat nao man mas duim bifor hem dedicate and baptaes?

FAENDAOT MOA

Read abaotem wat nao stretfala wei for baptaes and wat nao no stretfala wei for baptaes.

“Wat Nao Stretfala Wei for Baptaes?” (Article lo jw.org)

Read abaotem samfala samting wea man savve duim mekem hem fit for baptaes.

“Love and Wei for Tinghae lo Jehovah Bae Muvim Iu for Baptaes” (Wastaoa, March 2020)

Read abaotem why wanfala man disaed for baptaes.

“Tufala Laekem Mi for Faendemaot Wanem Bible Teachim” (Wastaoa, March 1, 2013)

Read abaotem why hem gud for garem aim for baptaes and samting iu savve duim mekem iu fit for baptaes.

“Hao, Mi Shud Baptaes?” (Olketa Kwestin wea Young Pipol Garem—Olketa Ansa, Volume 2, chapter 37)