LESON 22
Wat Nao Iu Savve Duim for Preach lo Narawan?
Taem iu lanem truth lo Bible, maet iu ting olsem, ‘Olketa narawan tu shud savve lo diswan!’ Hem tru, evriwan need for savve! Bat maet iu fraet for storyim wanem iu lanem lo nara pipol. Bae iumi storyim samting wea iu savve duim mekem iu no fraet for storyim gud nius from Bible and hapi for duim datwan.
1. Wat nao iu savve duim for storyim wanem iu lanem lo pipol wea iu savve lo olketa?
Olketa disaepol blo Jesus sei: “Hard tumas for mifala no storyim olketa samting wea mifala lukim and herem.” (Acts 4:20) Olketa laekem tumas samting wea olketa lanem from Jesus, so olketa laek for storyim lo evriwan. Iu garem sem tingting tu? Sapos olsem, lukaotem chance wea iu savve storyim wanem iu lanem lo famili and olketa fren. Hem gud for duim datwan witim respect.—Readim Colossae 4:6.
Samfala idea for helpem iu
Taem iu story witim eniwan lo famili abaotem eni Bible topic, iu savve sei: “Mi lanem interesting samting dis week.”
Iusim eni scripture for encouragem fren wea wari or sik.
Storyim wanem iu lanem from Bible study or meeting lo workmate wea ask abaotem weekend blo iu.
Showim olketa fren blo iu jw.org website.
Invaetem samfala for joinim iu lo study blo iu, or showim olketa hao for ask for Bible study lo jw.org.
2. Why nao hem important for garem goal for preach witim kongregeson?
Olketa disaepol blo Jesus preach tu lo pipol wea olketa no savve. Jesus “markem tufala man for waka tugeta and sendem evriwan hia for go . . . long evri taon” for preach. (Luke 10:1) Taem olketa organize gud for duim preaching waka, datwan givim chance for staka pipol for herem gud nius. And tu, taem olketa disaepol preach tugeta datwan mekem olketa hapi tumas. (Luke 10:17) Hao, iu tu laek for markem goal for preach witim kongregeson?
DIG GO MOA
Bae iumi storyim samting wea iu savve duim for no fraet tumas, and hapi wea iu savve kasem taem iu talemaot gud nius.
3. Jehovah bae stap witim iu
Samfala wea laek for preach maet warim tingting blo pipol or fraet nogud olketa narawan les lo olketa.
Hao, iu fraet for storyim samting wea iu lanem lo narawan? Why nao olsem?
Pleim VIDEO, then discussim tugeta disfala kwestin.
Wat nao olketa young Witness hia duim for no fraet?
Readim Aesaea 41:10, then discussim tugeta kwestin hia:
Taem iu fraet for preach, why nao iu shud prea?
Maet iu laek savve
Staka Jehovah’s Witness, firstaem olketa tingse hem hard tumas for preach lo narawan. Example nao, Sergey. From hem man for shame hem faendem hard for story lo pipol. Bat taem hem studyim Bible, hem sei: “Nomata mi fraet, mi storyim wanem mi lanem from Bible lo nara pipol. Mi sapraes tumas bikos taem mi storyim biliv blo mi lo pipol datwan helpem mi for no fraet and hem strongim faith blo mi.”
4. Respectim olketa narawan
Bifor iu preach lo eniwan, tingting gud abaotem wat for talem and hao for talem witim respect. Readim 2 Timothy 2:24 and 1 Peter 3:15, then discussim tugeta olketa kwestin hia:
Hao nao iu savve followim olketa verse hia taem iu storyim Bible lo narawan?
Samfala lo famili or olketa fren maet no acceptim wanem iu talem. Wat nao iu savve duim? Wat nao iu shud no duim?
Why nao hem gud for respectim tingting blo pipol and no talem olketa wat olketa shud bilivim?
5. Man wea talemaot gud nius hem hapi
Jehovah givim waka for talemaot gud nius lo Jesus. Hao nao tingting blo Jesus abaotem datwan? Readim John 4:34, then discussim tugeta olketa kwestin hia:
Taem iumi kaikaim gud kaikai iumi gohed laef and hapi. Why nao Jesus sei for duim will blo God hem olsem kaikai. Example nao, for talemaot gud nius?
Taem iu talemaot gud nius, iu tingse wat nao samfala gud samting wea bae iu kasem?
Samfala idea
Lo midol week meeting, lanem samfala wei wea iu savve startim story.
Askem samwan wea study witim iu for savve wat for duim mekem iu joinim skul lo midol week meeting. Olketa assignment savve helpem iu for no fraet for storyim wanem iu lanem lo narawan.
For practicem hao for ansa taem pipol askem olketa kwestin and talem toktok for stopem story, iusim sekson “Samfala Savve Talem” or “Eniwan Maet Ask” lo disfala study course.
ENIWAN MAET ASK: “Iu hao nao distaem? Longtaem mi no lukim iu.”
Hao nao iu savve iusim disfala chance for storyim samting wea iu lanem lo Bible lo man wea askem iu disfala kwestin?
MAIN POINT
For storyim gud nius lo nara pipol hem mekem man hapi. Maet firstaem iu tingse hem hard, bat hem isi nomoa.
Review
Why nao hem gud for preachim gud nius lo olketa narawan?
Hao nao iu savve duim datwan witim respect?
Wat nao iu savve duim for no fraet for preach?
FAENDAOT MOA
Lukim fofala wei wea iu savve iusim jw.org contact card for preach lo narawan.
Video for Showim Hao for Iusim Card for Advertisem jw.org (1:43)
Read abaotem fofala wei wea man mas garem for helpem hem storyim gud nius lo narawan.
“Waswe, Iu Redi for Kamap Wanfala Fisherman for Kasem Pipol?” (Wastaoa, September 2020)
Lukim wanfala Bible example wea savve helpem iumi evriwan, nomata olketa pikinini tu for no fraet for storyim gud nius lo olketa narawan.
Read abaotem samting wea iu savve duim for storyim Bible lo olketa insaed famili wea no savve yet lo Jehovah.
“Kasem Heart Bilong Olketa Relative wea No Worshipim Jehovah” (Wastaoa, March 15, 2014)