LESON 21
Hu Nao Olketa wea Preachim Gud Nius?
Klosap nao Jehovah bae iusim Kingdom blo hem for finisim evri problem blo iumi. Datfala nius hem gud tumas and evriwan mas savve. Jesus laekem olketa follower blo hem for talemaot disfala message lo evriwan! (Matthew 28:19, 20) Wat nao Olketa Jehovah’s Witness duim for followim komand blo Jesus?
1. Why nao iumi savve sei samting wea Matthew 24:14 storyim hem happen distaem?
Jesus sei: “Olketa disaepol bilong mi bae talemaot disfala gud nius abaotem Kingdom long evri ples long world.” (Matthew 24:14) Olketa Jehovah’s Witness hapi tumas for duim disfala important waka. Mifala talemaot gud nius hia lo winim 1,000 languis evriwea lo world! Disfala waka hem big tumas and mifala mas organize gud for duim. Mifala fit for duim disfala waka bikos Jehovah nao helpem mifala.
2. Wat nao mifala duim for preach lo pipol?
Mifala go for preach lo pipol lo eni ples wea olketa stap. Mifala go preach from “haos tu haos” tu olsem olketa Christian lo first century. (Acts 5:42) From mifala go lo haos blo pipol, mifala meetim staka million pipol evri year. Mifala preach tu lo olketa pablik ples bikos pipol no stap evritaem lo haos. Mifala evritaem lukaotem chance for story abaotem Jehovah and plan blo hem lo pipol.
3. Hu nao shud talemaot disfala gud nius?
Evri tru Christian shud talemaot disfala gud nius lo olketa narawan. Disfala waka hem important tumas lo mifala. Mifala duim best blo mifala for preach bikos mifala savve diswan savve sevem laef blo pipol. (Readim 1 Timothy 4:16.) No eniwan peim mifala for duim disfala waka bikos Bible sei: “Samting wea iufala kasem hem free nomoa, so iufala mas no askem selen for samting wea iufala duim.” (Matthew 10:7, 8) No evriwan acceptim message wea mifala talemaot. Bat, mifala gohed for preach bikos mifala obeyim Jehovah and datwan mekem hem hapi.
DIG GO MOA
Bae iumi lanem samfala samting moa wea Olketa Jehovah’s Witness duim for preach evriwea lo world, and hao Jehovah helpem mifala.
Preaching waka evriwea lo world: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Mifala traem best for kasem evri pipol
Olketa Jehovah’s Witness duim samting for preach lo pipol lo evri ples. Pleim VIDEO, then discussim tugeta kwestin hia.
Wat nao iu tinghae lo hem abaotem olketa samting wea Olketa Jehovah’s Witness duim for preach?
Readim Matthew 22:39 and Rome 10:13-15, then discussim tugeta olketa kwestin hia:
Why nao disfala preaching waka wea mifala duim showim mifala lovem nara pipol?
Wat nao tingting blo Jehovah abaotem olketa wea preachim gud nius?—Lukim verse 15.
5. Mifala waka tugeta witim God
Staka samting wea mifala kasem showim Jehovah nao leadim preaching waka wea mifala duim. Example nao, Paul, wanfala brata lo New Zealand meetim wanfala woman taem hem duim preaching waka lo wanfala aftanun. Lo morning, woman hia prea and iusim nem blo God, Jehovah. Hem askem God for sendem eniwan for visitim hem. Paul sei: “Bihaen thrifala hour mi kasem haos blo hem.”
Readim 1 Corinth 3:9, then discussim tugeta kwestin hia:
Hao nao samting wea kasem datfala brata lo New Zealand showim Jehovah leadim preaching waka wea mifala duim?
Readim Acts 1:8, then discussim tugeta kwestin hia:
Why nao mifala needim Jehovah for helpem mifala for duim gud disfala waka?
Maet iu laek savve
Evri week lo midol week meeting blo mifala, mifala kasem training for duim preaching waka. Sapos iu kam finis lo eni meeting, hao nao tingting blo iu abaotem training hia?
6. Mifala obeyim komand blo God for preach
Lo first century, pipol wea againstim olketa follower blo Jesus trae for stopem olketa for preach. Olketa Christian hia iusim “law for defendim datfala gud nius” and kasem raet for preach. (Philippi 1:7) Olketa Jehovah’s Witness tu duim sem samting.a
Readim Acts 5:27-42, then discussim tugeta kwestin hia:
Why nao bae mifala no stop for preach?—Lukim verse 29, 38, and 39.
ENIWAN MAET ASK: “Why nao Olketa Jehovah’s Witness go lo haos blo pipol for preach?”
Wat nao bae iu talem?
MAIN POINT
Jesus talem lo olketa follower blo hem for preachim gud nius lo pipol lo evri kantri. Jehovah nao helpem pipol blo hem for duim disfala waka.
Review
Hu nao olketa wea preachim gud nius evriwea lo world?
Why nao preaching waka wea mifala duim showim mifala lovem nara pipol?
Iu tingse preaching waka savve mekem man hapi? Why nao olsem?
FAENDAOT MOA
Lukim wanem Olketa Jehovah’s Witness duim for preach lo olketa big city.
Wat nao Olketa Jehovah’s Witness duim for helpem olketa refugee?
Herem samwan explainim why hem hapi for iusim laef blo hem for duim preaching waka.
Read abaotem samfala important kot disison wea mekem hem isi for duim preaching waka.
a God nao talem mifala for preach. So Olketa Jehovah’s Witness no askem permission from eni gavman for preachim gud nius.