Wei for Lovem God Mekem Wan Mind Kamap

TAEM Christian kongregeson start long first century, wanfala main samting wea mekem hem spesol nao, nomata olketa member difren, evriwan wan mind. Olketa hia wea worshipim tru God kam from olketa kantri long Asia, Europe, and Africa. Evriwan garem difren kaen living. Samfala olketa priest, soldia, slave, olketa wea ranawe from kantri bilong olketa, savveman for duim waka and bisnis pipol. Samfala Jew, and olketa narawan no Jew. Bifor, staka duim adultery, homosexual fasin, drink tumas, steal, or forcem man for givim samting olketa laekem. Nomata olsem, taem olketa kamap Christian, olketa lusim nogud wei bilong olketa and olketa barava wan mind.

Wanem nao mekem olketa wea followim Jesus long first century for garem wan mind? Why nao olketa stap gud witim each other and nara pipol tu? Why nao olketa no join insaed wei for againstim olketa wea garem paoa and olketa war? Why nao olketa Christian long firstaem difren tumas from olketa main religion bilong distaem?

Wanem Nao Mekem Olketa Member Long Kongregeson Fren Gud?

Main samting wea mekem evriwan wea garem sem biliv long first century for wan mind hem from olketa lovem God. Olketa Christian hia luksavve main responsibility bilong olketa hem for lovem tru God, Jehovah, witim full heart, soul and mind. Olsem example, aposol Peter, wea hem wanfala Jew kasem instruction for go long haos bilong wanfala man wea no Jew. Disfala man hem samwan wea olketa Jew no savve fren witim. From Peter lovem Jehovah, hem willing for go. Peter and olketa nara Christian barava fren gud witim God. Diswan hem olsem bikos olketa kasem stretfala savve abaotem fasin bilong God, olketa samting wea hem laekem and no laekem. Gogo, evriwan savve hao God laekem olketa for “garem wan mind witim sem wei for tingting.”—1 Corinthians 1:10; Matthew 22:37; Acts 10:1-35.

Olketa wea biliv stap gud tugeta tu bikos olketa garem faith long Jesus Christ. Olketa laek for barava followim example bilong hem. Jesus komandim olketa: “Lovem each other; olsem mi lovem iufala . . . From diswan evriwan bae savve iufala nao olketa disaepol bilong mi, sapos iufala lovem each other.” (John 13:34, 35) Disfala love hem no feeling wea stap for lelebet taem nomoa bat hem wei wea man barava givim hemseleva for helpem narawan. Wanem nao savve kamaot from diswan? Jesus prea olsem for olketa wea garem faith long hem: ‘Mi ask for olketa savve kamap wan, long sem wei wea iu, Dadi, iu wan mind witim mi and mi wan mind witim iu, mekem olketa tu wan mind witim iumi tufala.’—John 17:20, 21; 1 Peter 2:21.

Jehovah givim holy spirit, or active force, long olketa tru servant bilong hem. Disfala spirit mekem olketa wan mind. Hem helpem olketa tu for minim olketa Bible teaching wea evri kongregeson followim. Olketa wea worshipim Jehovah preachim sem message. Message hia nao for mekem nem bilong Jehovah kamap holy thru long Messiah Kingdom bilong God, wanfala gavman long heven wea bae rulim evri man. Olketa Christian bifor luksavve long responsibility bilong olketa for “no part bilong disfala world.” Dastawe, taem olketa raoa or war kamap, olketa no teksaed. Olketa stap gud witim evriwan.—John 14:26; 18:36; Matthew 6:9, 10; Acts 2:1-4; Romans 12:17-21.

Evriwan wea biliv luksavve long responsibility bilong olketa for mekem wan mind kamap. Long wanem wei? Taem olketa mek sure fasin bilong olketa followim Bible. Dastawe, aposol Paul raet long olketa Christian olsem: “Lusim oldfala fasin wea followim wei bilong iufala bifor,” and “werem olsem kaleko niufala fasin.”—Ephesians 4:22-32.

Keepim Wei for Wan Mind

Hem tru hao olketa Christian long first century olketa no perfect, and olketa problem kamap for testim wei wea olketa wan mind. Olsem example, Acts 6:1-6 storyim hao wei for no agree kamap midolwan olketa Jew Christian wea story long Greek languis and olketa wea story long Hebrew languis. Olketa wea story long Greek languis ting olketa wea story long Hebrew kasem moa kaikai winim olketa. So taem olketa aposol herem diswan olketa kwiktaem stretem long wei wea no favorim eniwan. Bihaen, wanfala kwestin abaotem teaching mekem raoa kamap saed long wanem nao olketa wea no Jew insaed Christian kongregeson mas duim and no duim. Olketa disaedem samting followim wanem Bible talem, and evriwan acceptim datwan.—Acts 15:1-29.

Tufala example hia showim hao long first century wei for no agree nating lead go long wei for olketa Jew and olketa wea no Jew raoa or wei for barava no wan mind saed long olketa teaching insaed Christian kongregeson. Why nao olsem? Bikos long olketa samting hia wea mekem wan mind kamap: Olketa lovem Jehovah, garem faith long Jesus Christ, garem love wea willing for duim samting for narawan, acceptim direction bilong holy spirit, garem sem wei for minim gud olketa Bible teaching, and willing for changem fasin bilong olketa. Evriting hia win for mekem kongregeson wan mind and stap gud.

Wan Mind Long Worship Distaem

Waswe, sem samting savve mekem wan mind kamap distaem tu? Waswe, olketa sem samting hia savve mekem pipol long sem religion wan mind and helpem olketa for stap gud witim pipol from olketa difren kantri? Barava nao! Olketa Jehovah’s Witness wan mind witim evri narawan wea olketa garem sem biliv long winim 230 kantri, island and territory. And olketa wan mind from olketa sem samting wea mekem olketa Christian long first century for garem wan mind.

Main samting wea mekem Olketa Jehovah’s Witness wan mind hem from olketa worshipim Jehovah God. Diswan minim olketa duim best for faithful long hem nomata eni samting hem happen. Olketa Witness bilong Jehovah garem faith long Jesus Christ and olketa samting hem teachim. Olketa Christian hia showim love wea willing for duim samting for narawan wea garem sem biliv, and olketa preachim sem gud nius abaotem Kingdom bilong God long olketa kantri wea olketa stap. Olketa willing for story abaotem disfala Kingdom long pipol wea garem difren religion, difren kala skin, kam from difren kantri, and nara pipol tu. Olketa Jehovah’s Witness no teksaed tu long olketa samting long world, wea helpem olketa for no kasem hevi from politik, kastom, community, and bisnis wea divaedem pipol. Evri Witness luksavve long wanem olketa mas duim for mekem wan mind kamap taem olketa followim standard bilong Bible.

Wan Mind Pullim Kam Pipol

Disfala wei for wan mind staka taem mekem olketa wea no Witness for interest. Olsem example, bifor, Ilse,a hem wanfala Catholic nun long wanfala convent long Germany. Wanem nao mekem hem interest long Olketa Jehovah’s Witness? Ilse sei: “Mi no meetim eni nara pipol wea garem gudfala fasin olsem. Olketa no joinim war; and no duim eniting for spoelem eniwan. Olketa laek helpem pipol for stap hapi long paradaes earth anda long Kingdom bilong God.”

Nara example hem Günther. Hem wanfala soldia bilong Germany wea olketa sendem hem go long France long mek-tu world war. Wanday wanfala priest bilong Protestant mekem service for olketa soldia long grup bilong Günther. Priest hia prea for God helpem olketa, protectim olketa and for olketa win. Bihaen service hem finis, Günther duim waka for luk aot for olketa enemy. Taem hem iusim samting for lukim samting wea stap farawe hem lukim wanfala priest mekem service for olketa enemy long narasaed tu. Bihaen, Günther sei: “Luk olsem datfala priest prea for God helpem olketa, protectim olketa and for olketa win. Mi savve tingting, hao nao olketa Christian church faetem each other insaed sem war.” Günther no savve forgetim olketa samting hia. Bihaen, taem hem story witim Olketa Jehovah’s Witness wea no join insaed war, Günther joinim olketa Witness wea garem wan mind.

Long bifor, Ashok and Feema lotu long Eastern religion. Tufala markem wanfala ples long haos for worshipim god bilong tufala. Taem bigfala sik kasem famili bilong olketa, tufala start kwestinim religion bilong tufala. Taem Ashok and Feema story witim Olketa Jehovah’s Witness, tufala tinghae tumas long olketa Bible teaching and wei wea olketa Witness lovem each other. Distaem tufala strong for talemaot gud nius abaotem Kingdom bilong Jehovah.

Ilse, Günther, Ashok, and Feema wan mind witim staka million Jehovah’s Witness evriwea long world. Olketa barava sure long promis wea Bible talem hao olketa sem samting wea mekem olketa wan mind long worship distaem, bae klosap mekem wan mind kamap for evri man wea obey. Bihaen datwan, bae no eni killkill and wei for divaed kamap wea religion nao bihaenem datwan. Full world bae wan mind for worshipim datfala tru God, Jehovah.—Revelation 21:4, 5.

[Olketa Footnote]

[Piksa long page 4, 5]

Olketa Christian bifor wan mind nomata olketa garem difren kaen living