Laef—Important or Samting Nating?
“From God wakem man long image bilong Hem, wei for killim dae wanfala man hem minim for distroem wanfala samting wea stap long world wea important tumas and barava holy.”—The Plain Man’s Guide to Ethics, wea William Barclay raetem.
‘SAMTING long world wea important tumas.’ Waswe, iu ting olsem tu abaotem laef? Long saed bilong fasin bilong pipol, luk olsem staka nating agree witim samting wea William Barclay talem. Olketa barava raf pipol wea aftarem olketa selfish goal and no tingim laef bilong narawan, killim dae plande million pipol long nogud wei.—Ecclesiastes 8:9.
No Important and Fit for Dae
World War I hem wanfala example bilong diswan. Man for raetem history, Alan Taylor, talem hao plande taem insaed disfala war, “no eni reason stap for killim dae pipol.” From olketa bigman bilong army luk aotem hae position and bignem, olketa ting long laef bilong olketa soldia olsem samting wea nating important. Winim 500,000 pipol nao dae insaed war taem olketa bilong Germany trae for tekova long Verdun, France. Taylor hem sei moa: “For win long Verdun bae no helpem France or Germany for winim war. Olketa bae kasem glory nomoa and killim dae staka man.”—The First World War.
Diskaen tingting wea no tinghae long laef, hem stap yet. Wanfala savveman Kevin Bales, talem hao no longtaem go nomoa, “from population kamap moa big diswan mekem staka million poor pipol for luk aotem waka.” Olketa stragol for longfala taem for stap laef long ples wea garem hard taem saed long selen wea mekem “laef kamap olsem samting nating.” Bales hem sei olketa wea mekius long poor pipol iusim olketa olsem slave wea, bihaen “olketa iusim olketa for kasem selen, olketa torowem olketa nomoa.”—Disposable People.
“Aftarem Wind”
Staka reason stap why plande million pipol feel olsem olketa barava iusles and luk olsem no eniwan warim sapos olketa laef or dae. Witim war and fasin wea no followim justice, olketa samting olsem taem bilong no eni rain, short long kaikai, sik, sorre feeling taem samwan hem dae, and plande nara samting wea givim hevi long pipol, mekem pipol for ting raonem sapos laef bilong olketa hem important or nomoa.—Ecclesiastes 1:8, 14.
Hem tru, no evriwan feisim kaen laef wea olketa feel olsem olketa no important and garem plande problem. Nomata olsem, olketa wea no kasem barava nogud hard taem agree tu witim toktok bilong King Solomon bilong Israel bifor, wea sei: “Wanem nao man savve kasem for evri hard waka bilong hem and for samting wea heart bilong hem wantem wea hem waka hard for kasem anda long sun?” Taem plande pipol ting raonem olketa toktok hia, olketa luksavve hao staka samting wea olketa duim hem “iusles and aftarem wind.”—Ecclesiastes 2:22, 26.
Staka pipol wea ting bak long laef bilong olketa sei: “Hem nomoa ia?” Tru nao, waswe, pipol garem feeling for “satisfae” witim laef bilong olketa taem olketa dae, olsem laen dadi bilong iumi Abraham? (Genesis 25:8, footnote) Plande feel laef bilong olketa hem iusles. Bat laef hem no iusles. Long tingting bilong God, laef bilong evriwan hem important and hem laekem iumi wanwan for garem laef wea mekem iumi satisfae. Hao nao datwan bae kamap? Ting raonem wanem nextfala article talem abaotem diswan.