“Gohed for Luk Aot”

LONG bifor, olketa man waka olsem security long taon, temple, and haos bilong samfala man. Waka bilong olketa hem for keepim gate sat olowe long naet and semtaem mas gohed for luk aot tu. Diswan hem barava important waka, bikos laef bilong pipol depend long wei wea olketa singaotem warning abaotem danger.

Jesus Christ barava savve tumas long waka bilong man wea security. Wantaem hem markem olketa disaepol bilong hem witim man for security and hem encouragem olketa for gohed luk aot for taem wea Jerusalem bae finis evribit. Hem sei: “Gohed for lukluk, gohed for wekap, from iufala no savve long taem wea set finis. Hem olsem wanfala man wea go long farawe ples and hem leavim haos bilong hem and . . . hem givim order long security for luk aot gud. So gohed for luk aot, from iufala no savve wanem taem nao masta bilong haos bae kam.”—Mark 13:33-35.

Long sem wei, winim 125 year finis Wastaoa talemaot encouragement bilong Jesus for “gohed for luk aot.” Long wanem wei? Olsem iumi savve readim long page 2 bilong disfala magasin, “Hem lukluk long evri samting wea happen long world wea fulfillim Bible profesi. Hem comfortim olketa pipol witim gud nius hao klosap nao Kingdom bilong God bae finisim olketa wea daonem narafala pipol and hem bae mekem earth kamap paradaes.” Winim 26,000,000 copy bilong Wastaoa long 150 languis, kasem evriwea long world. Diswan winim eni magasin bilong olketa nara religion. Olsem olketa security bifor, Olketa Jehovah’s Witness iusim diswan for talem pipol evriwea long world for “gohed for wekap” long spiritual wei bikos Masta, Jesus Christ, klosap for kam bak for judgem disfala world.—Mark 13:26, 37.