Waswe, Truth From Bible Mekem Olketa wea Iu Teachim Garem Frut?
TAEM Eric talem mami and dadi bilong hem hao hem les for wanfala Jehovah’s Witness nao, tufala barava feel sorre. Tufala nating luksavve Eric hem garem tingting olsem. Start from taem hem pikinini, Eric hem join insaed long famili Bible study, attendim olketa Christian meeting, and tekpart insaed waka for preach long kongregeson tu. Luk olsem hem wakabaot long truth. Bat taem hem lusim mami and dadi bilong hem, tufala luksavve hem nating really acceptim truth. Datwan hem samting wea mekem tufala seke and sorre fogud.
Samfala narawan feel olsem tu taem seknomoa wanfala Bible student hem stop for study. Taem datwan happen, pipol savve askem olketa seleva, ‘Why nao mi no luksavve long diswan?’ Bifor man kasem trabol long spiritual wei, waswe, iumi fit for luksavve sapos truth hem garem frut long hem? Hao nao iumi fit for sure truth hem garem frut insaed long iumi, and tu, long olketa wea iumi teachim? Parabol bilong Jesus abaotem man wea plantim seed hem helpem iumi for ansarem olketa kwestin hia.
Truth Mas Kasem Heart
Jesus hem sei: “Datfala seed hem word bilong God. And saed long [seed] wea stap long gudfala graon, olketa hia, herem datfala word witim gudfala heart, and olketa keepim and garem frut witim fasin for gohed strong.” (Luke 8:11, 15) So bifor truth bilong Kingdom fit for garem eni frut insaed olketa student bilong iumi, hem mas garem rut insaed tokpiksa heart bilong olketa. Jesus hem promisim hao long sem wei wea gudfala seed savve grow long gudfala graon, truth bilong God savve muvim heart wea gud and stretawe datwan affectim man and mekem hem garem frut. Wanem nao iumi shud lukluk for hem?
Iumi mas luksavve wanem nao insaed long heart. Wei for duim samting saed long worship nomoa hem no evritaem showimaot datwan. (Jeremiah 17:9, 10; Matthew 15:7-9) Iumi need for barava lukluk gud. Wei wea man change saed long samting hem laekem, samting wea muvim hem, and samting wea important long hem, shud showaot klia. Iumi shud luksavve hao student hem mekem grow olketa niu fasin, wea fitim will bilong God. (Ephesians 4:20-24) Olsem example: Taem olketa long Thessalonica herem datfala gud nius, Paul sei olketa barava acceptim datwan olsem word bilong God. Bat, wei wea olketa gohed strong, faithful, and showimaot love nao mekem hem savve hao truth hem “muvim [olketa].”—1 Thessalonians 2:13, 14; 3:6.
Hem tru, samting wea stap insaed heart bilong wanfala student bae gogo showaot long fasin bilong hem, olsem wanem happen long Eric. (Mark 7:21, 22; James 1:14, 15) Bat sorre nao, taem olketa nogud fasin showaot klia, maet hem tu leit for stretem datwan. So hard samting wea iumi feisim nao, hem for trae for luksavve long olketa wik point bilong hem bifor olketa mekem hem foldaon long spiritual wei. Iumi need for savve hao for lukluk insaed long tokpiksa heart. Hao nao iumi savve duim datwan?
Lane From Jesus
Jesus fit for savve evribit wanem nao insaed heart bilong man. (Matthew 12:25) No eniwan long iumi savve duim datwan. Nomata olsem, Jesus showim hao iumi fit for luksavve long feeling bilong man, samting wea muvim hem, and samting wea important long hem. Long sem wei wea wanfala doctor iusim olketa difren medical test for savve wanem nao rong witim heart bilong sikman, Jesus iusim Word bilong God for “pullim kamap” and showimaot klia olketa “tingting and samting wea heart want for duim,” nomata taem pipol no luksavve yet.—Proverbs 20:5; Hebrews 4:12.
Wanfala example, hem taem Jesus helpem Peter for luksavve long wanfala wik point wea bihaen mekem Peter stambol. Jesus savve Peter lovem hem. Tru nao, hem just givim Peter “olketa key bilong kingdom.” (Matthew 16:13-19) Nomata olsem, Jesus savve tu hao Satan hem targetim olketa aposol bilong hem. Olketa bae kasem bigfala hevi for mekem olketa lusim faith bilong olketa. Jesus luksavve faith bilong samfala disaepol hem wik lelebet, so hem no hol bak for showimaot samting wea olketa need for kamap moabeta long hem. Lukim hao hem duim diswan.
Matthew 16:21 hem sei: “Start long datfala taem Jesus Christ showimaot long olketa disaepol bilong hem hao hem mas . . . safa . . . and olketa bae killim hem dae.” Lukim hao Jesus no just talem long olketa samting wea bae happen long hem, bat hem showim long olketa. Maet hem iusim olketa verse long Bible olsem Psalm 22:14-18 or Isaiah 53:10-12, wea showimaot hao Messiah bae safa and dae. Nomata wanem, taem hem talem toktok from olketa scripture, Jesus givim Peter and olketa narawan chance for showimaot wanem nao insaed long heart bilong olketa. Wanem nao bae tingting bilong olketa saed long wei for feisim persecution?
Nomata Peter hem man wea no fraet and hem strong for tru worship, toktok wea hem talem and wei wea hem no tingting fastaem showimaot hao tingting bilong hem barava no stret. Peter sei olsem long Jesus: “Lord, iu no tok olsem; bae disfala samting hard for kasem iu.” Peter garem rong tingting bikos hem ‘no ting olsem God, bat ting olsem man’—diswan savve barava leadim man for duim big rong. So, wanem nao Jesus duim? Bihaen Jesus tok strong long Peter, hem sei olsem long hem and olketa nara disaepol: “Sapos eniwan want for followim mi, hem mas lusim will bilong hemseleva and karem post for man safa long hem and gohed followim mi.” Jesus iusim olketa point wea stap long Psalm 49:8 and 62:12 for talem olketa moa hao wei for kasem laef olowe hem no kam from man, wea no savve givim salvation, bat hem kam from God.—Matthew 16:22-28.
Nomata wei for fraet mekem Peter denyim Jesus thrifala taem, luk olsem samting wea Jesus talem hia, and tu, olketa narataem wea Jesus story witim olketa, hem helpem Peter for kwiktaem kamap gud moa long spiritual wei. (John 21:15-19) Samting olsem 50 day bihaen nomoa, Peter no fraet for standap front long staka pipol long Jerusalem for givim witness abaotem resurrection bilong Jesus. Long olketa week, month, and year bihaen, hem nating fraet taem pipol arrestim, killim, and putim hem long prison. Hem showimaot nambawan example bilong faithful fasin.—Acts 2:14-36; 4:18-21; 5:29-32, 40-42; 12:3-5.
Wanem nao iumi lanem from diswan? Waswe, iu lukim samting wea Jesus duim for showimaot klia samting wea stap insaed heart bilong Peter? Fasfala samting, hem wei wea hem chusim olketa scripture wea mekem Peter lukluk long wik point bilong hem. Then, hem givim Peter chance for showimaot wanem nao insaed heart bilong hem. Last samting, hem talem moa, kaonsel from Bible for helpem Peter stretem tingting and feeling bilong hem. Maet iu tingse diskaen wei for teach bae hem hard for iu duim, bat bae iumi storyim tufala experience wea showimaot hao wei for prepare and depend long Jehovah savve helpem eniwan long iumi for followim example bilong Jesus.
Pullim Kamap Feeling wea Insaed Heart
Taem wanfala Christian dadi herem hao tufala son bilong hem wea 6 and 7 year stealim loli from tebol bilong teacher, hem sidaon and story witim tufala. Hem no just ting long diswan olsem krangge wei bilong pikinini bat hem sei: “Mi trae for pullim kamap feeling wea insaed heart bilong tufala for savve wanem nao muvim tufala for duim disfala nogud samting.”
Dadi hia askem tufala son bilong hem for storyim samting wea happen long Achan, wea stap long Joshua chapter 7. Stretawe tufala boy hia minim point and talemaot rong wea tufala duim. Conscience bilong tufala pokem tufala finis. So dadi askem tufala for readim Ephesians 4:28 wea sei: “Man wea savve steal mas finis for steal, and hem mas duim hard waka . . . mekem hem savve garem samting for givim long samwan wea garem need.” Wei wea Dadi mekem tufala for mas baem nara loli and givim long teacher hem strongim go moa Bible kaonsel hia.
Dadi hem sei: “Taem mifala luksavve long eni nogud samting wea muvim olketa for duim samting, mifala trae aotem datwan from olketa and changem witim gudfala tingting.” From dadi and mami hia followim Jesus taem tufala teachim pikinini bilong tufala, tufala kasem gud samting bihaen. Gogo, tufala son hia kamap member bilong Brooklyn Bethel, and bihaen 25 year wanfala hem still waka long there.
Lukim hao narafala Christian helpem Bible student bilong hem. Datfala student hem gohed attendim olketa meeting, share insaed long ministry and hem talemaot finis hao hem laek for baptaes. Nomata olsem, luk olsem student hia ova tumas for depend long hemseleva winim wei for depend long Jehovah. Datfala sista sei olsem abaotem woman hia: “From hem wanfala singol woman, hem kamap barava independent bat hem no luksavve long datwan. Mi wari nogud gogo diswan mekem hem taed tumas and lead go long big sik or hem foldaon long spiritual wei.”
So sista hia hem go story witim student bilong hem abaotem Matthew 6:33. Hem encouragem student hia for changem tingting bilong hem abaotem samting wea important, wea hem nao for putim Kingdom fastaem, and for trustim hao Jehovah nao bae stretem samting. Hem askem student hia olsem: “Waswe, wei wea iu stap seleva hem samfala taem mekem hard for iu depend long nara pipol, and long Jehovah tu?” Datfala student talem stret hao hem klosap givap for prea nao. Sista encouragem hem for followim advaes wea stap long Psalm 55:22 and for torowem hevi bilong hem long Jehovah bikos, olsem 1 Peter 5:7 promisim long iumi, “hem kea for iu.” Toktok hia barava muvim heart bilong hem. Datfala sista sei: “Hem no woman wea isi for krae, bat datfala taem mi lukim hem krae.”
Mekem Truth Gohed for Muvim Iu
Taem iumi lukim olketa wea iumi teachim olketa acceptim truth insaed Bible, diswan mekem iumi kasem bigfala hapi. Bat sapos iumi laekem samting iumi duim for helpem narawan hem win, iumiseleva nao mas showimaot gudfala example. (Jude 22, 23) Iumi evriwan need for “waka for salvation bilong [iumi] witim wei for fraet and seksek.” (Philippians 2:12) Datwan minim for evritaem letem laet from Bible shaen long heart bilong iumi, for luk aotem and stretem eni tingting, feeling for laekem samting, and samting wea iumi lovem wea no stret.—2 Peter 1:19.
Olsem example, waswe, strong wea iu garem for olketa Christian waka hem katdaon distaem? Sapos olsem, why? Maet wanfala reason hem bikos iu depend tumas long iuseleva. Hao nao bae iu luksavve long datwan? Readim Haggai 1:2-11, and lukluk gud long wei wea Jehovah story witim olketa Jew wea go bak long hom bilong olketa. Then askem olketa kwestin hia long iuseleva: ‘Waswe, mi wari tumas abaotem selen and for garem naes samting? Waswe, mi really trustim wei wea Jehovah bae lukaftarem famili bilong mi sapos mi putim olketa spiritual samting fastaem? Or waswe, mi ting mi mas lukaftarem miseleva fastaem?’ Sapos iu need for stretem tingting or feeling bilong iu, no hol bak for duim datwan. Kaonsel wea stap long Matthew 6:25-33, Luke 12:13-21, and 1 Timothy 6:6-12 helpem iumi for garem balance tingting abaotem wanem iumi needim and garem long material wei. Diswan bae lead go long wei wea Jehovah gohed for blessim iumi.—Malachi 3:10.
Kaen wei for lukluk gud long seleva maet no isi. For acceptim hao iumi garem samfala wik point taem samwan helpem iumi for luksavve long datwan, savve barava affectim feeling bilong iumi. Nomata olsem, taem love muvim iu for duim samting for helpem pikinini bilong iu, Bible student, or iuseleva tu—nomata maet wei for duim datwan hem no isi—maet datwan nao lead go for sevem laef bilong hem or iuseleva tu.—Galatians 6:1.
Bat, waswe sapos luk olsem samting iu duim hem no helpem hem? No kwiktaem for givap. Wei for stretem heart wea no perfect hem no isi, hem savve tek taem, and samfala taem mekem man feel nogud. Bat gudfala samting savve kamaot from wei for duim olsem.
Gogo, Eric wea iumi storyim finis hem stretem tingting bilong hem and “wakabaot long truth” moa. (2 John 4) Hem sei: “Bihaen mi luksavve samting wea mi lusim hem barava gud tumas, then mi just kam bak long Jehovah.” From mami and dadi bilong hem helpem hem, distaem Eric hem servem God long faithful wei. Nomata fastaem hem les long wei wea mami and dadi staka taem trae for helpem hem lukluk gud long heart bilong hem, distaem hem barava tinghae long samting tufala duim. Hem sei: “Mami and dadi bilong mi barava gud tumas. No enitaem tufala stop for lovem mi.”
Wei for mekem laet long Word bilong God shaen long heart bilong olketa wea iumi teachim hem showimaot loving-kaeness. (Psalm 141:5) Gohed for lukluk insaed heart bilong pikinini bilong iu and olketa Bible student bilong iu for lukim sapos olketa showimaot olketa niu Christian fasin. Mekem truth gohed for muvim heart bilong narafala pipol and iuseleva tu taem iu “iusim word bilong truth long stretfala wei.”—2 Timothy 2:15.
[Piksa long page 29]
Toktok bilong Jesus showim hao Peter hem garem wanfala wik point
[Piksa long page 31]
Iusim Bible for pullim kamap feeling wea stap insaed heart