Datfala Berleburg Bible
PIETISM hem wanfala religion wea kamaot from German Lutheran Church long olketa year bilong 1600 and 1700. Pipol mekfani and spoelem samfala member bilong disfala religion bikos long wanem olketa bilivim. Samfala savveman bilong Pietism ranawe and go stap sef long Berleburg, wea stap samting olsem 150 kilometer north long Frankfurt am Main. Long there wanfala bigman wea tinghae long religion, Count Casimir von Wittgenstein, hem givim olketa protection. Olketa savveman hia wea preach wea stap long Berleburg, olketa wakem wanfala transleison bilong Bible, wea nem bilong hem nao datfala Berleburg Bible. Hao nao gogo olketa wakem disfala transleison?
Johann Haug, wanfala long olketa man wea luk aotem protection olsem, mas lusim hom bilong hem long Strasbourg bikos olketa savveman saed long religion long there no acceptim hem. Haug hem wanfala man wea skul gud and barava savve long olketa languis. Hem talem olketa fren bilong hem long Berleburg hao hem laek tumas for “wakem wanfala Bible transleison wea barava stret, for stretem transleison bilong Luther, for garem transleison wea followim evribit Word bilong God and showimaot barava mining bilong hem.” (Die Geschichte der Berlenburger Bibel [The History of the Berleburg Bible]). Goal bilong hem nao for wakem Bible wea garem toktok for explainim olketa scripture, and hem mas isi for olketa man nating, savve minim. Haug askem olketa savveman from olketa nara kantri long Europe for helpem hem, and hem gohed long disfala waka for 20 year. Olketa start for printim disfala Berleburg Bible long 1726. From hem garem staka toktok for explainim scripture, disfala Bible garem eitfala volume.
Samfala interesting samting nao stap insaed long Berleburg Bible. Olsem example, Exodus 6:2, 3 sei: “God tok long Moses and sei long hem: Mi nao LORD! And showaot long Abraham/long Isaac and long Jacob/olsem olmaeti God: bat olketa no savve nem bilong mi nao JEHOVAH.” Wanfala toktok wea olketa raetem hem sei, ‘God seleva nao talemaot hao nem bilong hem nao JEHOVAH.’ Disfala nem bilong God, Jehovah, wea stap long Exodus 3:15 and Exodus 34:6, stap tu insaed olketa toktok for minim datwan.
From diswan, disfala Berleburg Bible hem wanfala long olketa Bible wea stap long German languis wea garem nem bilong Jehovah long main toktok long Bible, footnote, or long olketa toktok for explainim. Nara transleison wea stap distaem wea showimaot respect for nem bilong God nao New World Translation of the Holy Scriptures, wea Olketa Jehovah’s Witness nao wakem.