Klae Go Ap Antap Long Saba

SABA, hem wanfala island wea Netherlands nao rulim. Bifor, hem ples bilong olketa criminal wea gogo raon insaed sea long Caribbean for luk aotem riches. Disfala smol island hem stap 240 kilometer east long Puerto Rico. Distaem, samting olsem 1,600 pipol nao stap long hem and 5-fala nao Witness bilong Jehovah. Bat, olketa Witness hia luk aotem samting wea winim material riches. Olketa barava busy for luk aotem pipol “wea garem fasin fitim laef olowe.”—Acts 13:48.

Fastaem wea gud nius abaotem Kingdom bilong God kasem disfala island hem June 22, 1952, taem 18 meter sailing ship bilong olketa Witness bilong Jehovah kam anchor long saedsea long Saba. (Matthew 24:14) Tufala missionary, Gust Maki and Stanley Carter klae go ap long road wea pipol katem insaed ston and nem bilong hem The Ladder, wea go ap for The Bottom, kapitol bilong Saba.a For staka year hem nomoa road for kasem pipol long datfala island.

Fasfala story abaotem preaching waka long Saba hem kamap long 1966 Yearbook of Jehovah’s Witnesses. Story hia sei, datfala taem wanfala Witness nomoa stap long disfala island. Bihaen, wanfala famili from Canada go preachim gud nius long there for samfala year moa. No longtaem go nomoa, Russel and Kathy, tufala olo wea hasband and waef from United States, go long Saba and gohed for preach long there. Diswan nao story bilong tufala.

Gogo long Saba

Taem mi and waef bilong mi arrive long aeroplane, plan bilong mitufala hem for stap witim Ronald. Ronald nomoa hem Witness long datfala island from samting olsem 1990 go kasem 2000. Hem weitim mitufala long airport. Hem hapi tumas long olketa vegetable wea mitufala tekem kam, bikos no eni big farm stap long datfala island. Mifala go insaed trak and isisi draev go ap long saed bilong Mount Scenery for kasem barava antap long disfala volcano wea dae finis.

Mifala stop long wanfala vilij wea nem bilong hem Hell’s Gate. Ronald go for chekim notice board sapos pepa for invaetem pipol for kam long pablik tok long Sunday, hem stap yet or nomoa. Mifala hapi from pepa hia stap yet. Hem jamp bak insaed trak and mifala gohed for klae go for Windwardside, big vilij bilong datfala island. Nem bilong disfala naes vilij hem barava fitim bikos hem stap long ples wea wind kasem olowe. Hem stap 400 meter hae winim sea. Taem mifala tan go long road for haos bilong Ronald, mifala lukim wanfala naes saen wea sei hem nao Kingdom Hall bilong Olketa Jehovah’s Witness.

Taem mifala kaikai long midolday, mi askem disfala kwestin wea muvim mitufala for kam, “Hao nao iu kamap man for talem gud nius abaotem Kingdom long Saba?”

Ron ansa olsem: “Taem construction long branch bilong Olketa Jehovah’s Witness long Puerto Rico finis long 1993, mi and waef bilong mi interest for serve long difren ples. Bifor datwan, taem mitufala visitim Saba witim nara hasband and waef wea pioneer, mitufala savve 1,400 pipol nao stap long Saba bat no eni Witness. So mitufala story witim Branch Komiti bilong Pueto Rico abaotem plan bilong mitufala for kam long hia.

“Evri samting gohed gud, gogo olketa sei hem olraet for mifala kam. Bihaen tufala year sorre samting happen, waef bilong mi hem sik, and mitufala go bak long California. Bihaen hem dae mi kam bak moa long Saba. For startim samting and no finisim hem no wei bilong mi.”

Witness From Haos tu Haos long Saba

Rum for sisidaon long haos bilong Ron hem Kingdom Hall tu.b Haos hia stap for wan handred year finis. Taem mifala kaikai long morning and redi for go for preach, lelebet rain tuwetem open-air kitchen long haos hia. Bihaen, mifala go haos-tu-haos witnessing long The Bottom nomata hem luk olsem bae hem rain. Ron savve long nem bilong evri haosholder. Mifala startim story bilong mifala witim nius abaotem samting wea happen no longtaem go nomoa long datfala ples. Staka pipol savve long Ron and waka wea hem duim, and planti acceptim Bible pablikeson.

Sapos iu no savve long pipol hia bae hem hard for keepim record bilong olketa wea interest long Kingdom message. Why nao olsem? Ron hem sei: “Law no letem for pipol paintim evri haos long difren kala.” Diswan hem tru bikos taem mi lukluk raon mi lukim evri haos white and ruf bilong olketa hem red.

Bihaen story bilong mifala from Bible hem finis, mifala invaetem haosholder for kam long Kingdom Hall for lisin long pablik tok long Sunday. Ron nao savve givim pablik tok evri week sapos hem no go aot from island. Distaem 17-fala pipol nao studyim Bible long Saba. Long 2004, 20-fala pipol attendim Memorial bilong dae bilong Christ. Nomata datfala namba hem smol, hem 1 percent long full population bilong Saba!

Tru tumas, olketa Witness bilong Jehovah iusim gud strong bilong olketa for kasem staka pipol witim message bilong God wea savve sevem man. Olketa Witness bilong Jehovah barava faithful for followim komand for “mek disaepol long pipol bilong evri nation,” nomata long smol island olsem Saba or long big ples.—Matthew 28:19.

Visit bilong mifala hem finis nao. Taem mitufala redi for klae insaed long aeroplane, mitufala baebae long Ron. Mifala bae no forgetim visit bilong mifala long Saba and taem wea mifala klae go ap antap long Saba!

[Footnote]

[Olketa Map long page 10]

(For formatted text, lukim pablikeson)

PUERTO RICO

[Picture Credit Line long page 10]

Background: www.sabatourism.com