“Faithful Nomata Olketa Kasem Test”

KLOSAP long start bilong April 1951, strongfala Soviet gavman seke nomoa duim nogud samting long Olketa Jehovah’s Witness long western Soviet Union wea no duim eni rong samting. Gavman duim diswan long samting olsem 3,000 famili wea garem olketa smol pikinini, olketa woman wea babule and olketa olo. Olketa putim evriwan hia insaed olketa kago train and tekem olketa for 20-fala day long wanfala hard gogo for kasem Siberia. Panis bilong olketa hem for stap olowe long datfala ples wea living hem barava hard.

Long April 2001, long Moscow, Olketa Jehovah’s Witness releasem wanfala video wea story abaotem 50 year wea olketa kasem persecution anda long Soviet Union bifor. Olketa duim diswan for markem mek-50 year bihaen taem olketa go long Siberia. Insaed datfala video, olketa man for raetem history and pipol wea lukim samting wea happen, storyim hao olketa Witness gohed gud nomata olketa kasem barava bigfala hevi.

Plande million pipol long Russia and nara ples tu lukim finis disfala video wea garem title, Faithful Under Trials—Jehovah’s Witnesses in the Soviet Union. Staka pipol and olketa man for raetem history tu tok hae abaotem disfala video. Tufala savveman bilong Russia wea stap long ples wea gavman forcem staka Witness famili for go stap, talem toktok hia:

“Mi barava laekem datfala video. Mi laekem pipol long religion bilong iufala for longfala taem finis, bat bihaen mi lukim datfala video mi barava tinghae go moa long iufala. Datfala video barava hae standard! Mi tinghae tumas long wei wea video storyim laef bilong olketa man wanwan. Nomata mi bilong Orthodox church and mi no ting for changem religion bilong mi, mi laekem olketa Witness. Mi laekem university bilong mifala for keepim wanfala copy bilong video hia. Mi and olketa nara teacher disaed finis for showim long olketa student and for hem kamap part long wanem olketa student bae skulim.”—Professor Sergei Nikolayevich Rubtsov, hed teacher for history long State Pedagogical University, Irkutsk, Russia.

“Mi hapi iufala mekem disfala video. Taem man mekem video abaotem wei wea gavman daonem pipol, hem barava hard for talem evri samting insaed story long wei wea isi for man minim. Bat iufala win for duim datwan. Plis no hol bak for tekem kam samfala nara video bilong iufala.”—Professor Sergei Ilyich Kuznetsov, hed teacher for history long Irkutsk State University, Russia.

Olketa Jehovah’s Witness wea stap long Siberia tu barava laekem datfala video. Diswan nao samting wea samfala talem:

“Long datfala taem wea olketa samting insaed video hem storyim, staka pipol long Russia herem laea story abaotem waka bilong Olketa Jehovah’s Witness. Bat bihaen olketa lukim video, olketa savve hao organization bilong iumi hem no wanfala sect olsem wanem olketa tingim fastaem. Samfala wea just kamap Witness sei olsem: ‘Mifala sapraes tumas for luksavve hao mifala stap and waka witim olketa Christian brata wea kasem staka hard samting bifor!’ Bihaen hem lukim datfala video, wanfala Witness sei hem laek for kamap wanfala full-taem pioneer minister.”—Anna Vovchuk, wea olketa forcem hem for go long Siberia.

“Taem video showim secret police noknok long haos bilong wanfala Witness, body bilong mi start for seksek. Hem mekem mi tingim taem wea police noknok long door bilong mifala, and mami sei olsem: ‘Maet fire bonem eni ples.’ Bat datfala video remindim mi tu hao wei for safa wea plande Witness kasem hem winim wanem miseleva kasem. Evri information hia strongim iumi for gohed servem Jehovah.”—Stepan Vovchuk, wea olketa forcem hem for go long Siberia.

“Mi pikinini bilong olketa Witness wea olketa forcem go long Siberia. Mi tingse mi herem finis staka story abaotem datwan. Bat bihaen mi lukim video, mi luksavve hao mi nating savve nomoa long full story. Mi krae taem mi herem story bilong olketa wea olketa interviewim. Olketa experience hia no just olketa story nomoa bat mi ting long olketa olsem really samting wea happen. Disfala video strongim wei wea mi fren witim God and helpem mi for redi for stand strong long eni hard samting wea bae kamap long future.”—Vladimir Kovash, Irkutsk.

“Disfala video affectim mi long bigfala wei winim sapos mi just read abaotem datwan nomoa. Taem mi lukim and herem interview bilong olketa brata, hem olsem mi stap witim olketa and kasem tu sem samting wea kasem olketa. Example bilong brata wea drawim piksa long card for olketa smol girl bilong hem taem hem stap long prison, muvim mi for trae kasem heart bilong olketa pikinini bilong mi witim truth from Bible. Thankiu! Disfala video mekem Olketa Jehovah’s Witness long Russia barava feel moa sure hao olketa part long organization bilong Jehovah evriwea long world.”—Tatyana Kalina, Irkutsk.

“Wanfala toktok wea sei, ‘Bae man biliv taem hem lukim samting, winim wei for herem nomoa,’ hem barava fitim datfala video. Hem barava showimaot klia samting wea happen and hem kasem heart bilong mifala! Bihaen mi lukim, mi ting raonem for longfala taem. Datfala video mekem mi feel olsem mi stap witim olketa Witness hia. Taem mi markem laef bilong mi witim olketa, mi garem difren tingting abaotem olketa problem wea iumi kasem distaem.”—Lidia Beda, Irkutsk.

Faithful Under Trials video stap long 25-fala languis and pipol evriwea long world tinghae long hem.a Olketa television station showim disfala video long St. Petersburg, Omsk, and olketa nara taon long Russia, and tu, long olketa taon long Ukraine olsem Vynnytsya, Kerch, Melitopol and olketa ples long Lviv. Olketa komiti bilong pipol wea judgem olketa video markem diswan olsem hem barava gud.

Wei wea message bilong disfala video garem paoa hem showaot long example bilong staka thousand man nating wea barava no fraet and strong long spiritual wei, nomata olketa kasem persecution for staka year. Olketa Jehovah’s Witness long Soviet Union pruvim evribit hao olketa stap faithful long taem bilong test. Sapos iu laek lukim disfala video, Olketa Jehovah’s Witness bae hapi for tekem kam wanfala copy for iu. Plis story witim eni Witness long ples wea iu stap.

[Footnotes]

[Piksa Credit Line long page 8]

Stalin: U.S. Army photo

[Piksa Credit Line long page 9]

Stalin: U.S. Army photo