Important Samting for Rememberim

WANEM nao datwan? Hem dae bilong wanfala man klosap 2,000 year go finis. Hem talem disfala toktok: “Mi givim soul bilong mi, for mekem mi savve kasem bak moa. No eni man hem tekem diswan from mi, bat mi givim diswan from mi want for givim.” (John 10:17, 18) Datfala man hem Jesus Christ.

Jesus givim instruction long olketa follower bilong hem for celebratem Memorial bilong dae bilong hem olsem wanfala sakrifaes. Olketa kolem datwan “evening kaikai bilong Lord,” or “Lord’s supper” tu. (1 Corinthians 11:20; King James Version) Olketa Jehovah’s Witness and olketa fren bilong olketa bae celebratem datfala Memorial wea Jesus startim long Thursday, March 24, 2005, bihaen sun go daon.

Wanfala Bible tok bae explainim mining bilong bred wea no garem yeast and red wine wea olketa iusim for datwan. (Matthew 26:26-28) Datfala tok bae ansarem tu olketa kwestin olsem: Haomas taem nao olketa Christian shud celebratem diswan? Hu nao fit for kaikaim bred and drinkim wine? Hu nao kasem gudfala samting from dae bilong Jesus? Disfala important celebration bae helpem evriwan for tinghae long mining bilong laef and dae bilong Jesus.

Olketa bae barava welkamim iu long Memorial bilong dae bilong Jesus. Plis askem Olketa Jehovah’s Witness long area bilong iu for ples and taem wea diswan bae kamap.