‘Hem Olsem Wanfala Spesol Red Ston’

APOSOL John lukim wanfala vision abaotem nambawan throne long heven. Man wea sidaon long throne hem luk “olsem wanfala jasper ston.” Hem olsem tu “wanfala spesol redfala ston.” (Revelation 4:2, 3) Olketa wanem kaen ston nao diswan?

Olketa ston hia, hem no olketa kaen ston wea laet savve shaen thru long hem. Long bifor, Greek word wea olketa transleitim “jasper” hem for olketa ston wea garem difren kala, and olketa spesol ston wea man savve luk thru long hem. Archibald Robertson long Word Pictures in the New Testament, talem hao “jasper ston” wea Revelation 4:3 storyim “hem barava spesol winim olketa jasper ston distaem.” And tu, gogo for end bilong buk bilong Revelation John storyim datfala taon long heven, Jerusalem, taem hem sei: “Laet bilong hem olsem wanfala barava spesol ston, olsem jasper ston wea shaen klia tumas olsem crystal.” (Revelation 21:10, 11) John storyim olketa ston wea man savve luk thru long hem, and wea laet savve saen thru long hem.

Long vision bilong John, datwan wea sidaon long throne hem barava nambawan Man long universe, Jehovah God. Hem barava klin and holy winim evri samting long full universe. Long wei wea fitim datwan, aposol John raet olsem: “God hem laet and no eni darkness stap long hem.” (1 John 1:5) Dastawe, John encouragem olketa Christian brata bilong hem for ‘mekem olketa seleva klin evribit olsem datwan wea klin.’—1 John 3:3.

Wanem nao iumi mas duim for kamap klin front long God? Hem barava important for iumi garem faith long blood wea Christ kapsaetem for forgivim olketa sin bilong iumi. And tu, iumi mas gohed for “wakabaot insaed long laet,” long wei for studyim Bible evritaem and followim teaching bilong hem long living bilong iumi.—1 John 1:7.