Wanfala Hambol Man Long Africa wea Lovem Word Bilong God

EVRIWAN wea kasem Africa sapraes long wei wea hem isi for startim story from Bible witim olketa pipol long there. Kaen kwestin wea savve mekem pipol lisin hem, “Wanem nao Kingdom bilong God?” or “Waswe, eni samting stap for finisim olketa problem olsem wei wea kaikai no staka, sik, faet, and fasin for brekem law?” Staka pipol hapi tumas for eniwan showim ansa from Bible long olketa. Plande taem diswan lead go long wanfala Bible study wea savve gohed evri week. And taem olketa student muv ahed long spiritual wei, olketa kamap Christian wea baptaes.

Wanfala long olketa faswan long Africa for lisin olsem, hem man wea Bible story abaotem long Acts 8:26-40. Hem man from Ethiopia wea savve go evritaem long Jerusalem for worshipim trufala God, Jehovah.

Long disfala piksa, datfala man from Ethiopia readim wanfala scroll insaed chariot bilong hem taem hem gogo bak long hom. Wanfala man kam and askem hem olsem: “Waswe, iu minim samting wea iu readim?” Datfala man from Ethiopia hambol and sei hem needim help and hem askem datfala man for klae kam insaed chariot bilong hem. Datfala man hem Philip, wea hem wanfala Christian man for talemaot gud nius. Then man from Ethiopia askem Philip for minim datfala scripture wea hem just readim finis. Philip explainim hao datwan hem wanfala profesi abaotem dae bilong datfala Messiah, Jesus Christ, wea happen no longtaem go nomoa. Philip talem tu samfala nara “gud nius abaotem Jesus” and iumi sure hem storyim resurrection bilong Jesus tu.

Bihaen datfala man from Ethiopia herem olketa nambawan truth hia, hem want for kamap disaepol bilong Jesus nao, and hem sei: “Wanem nao stopem mi for baptaes?” Datfala hambol man long Africa hapi tumas bihaen hem baptaes and go bak long hom, and hem nomoa story abaotem hem wea stap insaed Bible.

Distaem, Olketa Jehovah’s Witness gohed for helpem staka million pipol evriwea long world for lanem sem “gud nius.” Samting olsem six million free Bible study nao gohed distaem.