Report Bilong Olketa wea Talemaot Kingdom

Luk Aotem Olketa wea Willing for Herem Gud Nius Long Olketa Farawe Ples Bilong Australia

FOR 12-fala year, Olketa Jehovah’s Witness no kasem samfala farawe ples long midol bilong Australia. So olketa Witness long Darwin, wea hem nao kapitol taon bilong Northern Territory, organizem wanfala naen-day preaching gogo wea no isi, and wea olketa bae kasem olketa farawe ples for luk aotem pipol wea willing for herem disfala gud nius.—Matthew 10:11.

For 12-fala month olketa planim datfala gogo wea insaed diswan hem for mekem olketa map for wanfala area wea size bilong hem 800,000 square kilometer, wea datwan hem thri taems moa big winim New Zealand. For minim hao olketa ples hia barava stap farawe, tingim hao from gate long main road go kasem haos savve samting olsem 30 kilometer! Tingim tu, hao long samfala ples, iu savve draev for 300 kilometer bifor iu kasem nara haos.

Total bilong 145 Witness volunteer share insaed datfala big waka. Samfala kam from Tasmania wea hem farawe. Samfala arrive witim olketa foa-wheel-draev wea fulap witim olketa samting for camping, petrol, and olketa spare part. Olketa narawan putim evri samting wea olketa bae needim insaed olketa trailer. And tu, olketa rentim tufala bas wea savve karem 22 pipol for olketa wea no garem foa-wheel-draev wea fitim datfala gogo. Olketa insaed bas preach long olketa smol taon and long ples wea olketa markem wea fitim.

Bifor olketa startim datfala gogo, olketa brata arrangem olketa tok and demonstration for givim instruction long hao for talemaot disfala gud nius long datfala spesol territory. Olsem example, for mekem pipol hapi for herem gud nius long olketa Aboriginal community, hem gud for savve long kastom bilong olketa and for followim datwan. Olketa storyim tu hao for protectim olketa animal and bush taem olketa gogo raon long olketa difren ples.

Olketa pablisa kasem plande nambawan experience. Olsem example, long wanfala Aboriginal community, olketa brata arrange for givim wanfala tok from Bible. Big woman bilong datfala community nao go for talem evriwan abaotem datfala tok wea bae kamap. Bihaen long tok, olketa brata givim 5-fala buk and 41 brochure long olketa wea kam. Long nara community, olketa story witim wanfala Aboriginal man. Hem garem Bible, wea datwan hem wanfala King James Version, bat datfala Bible hem old and start for nogud. Taem samwan askem hem sapos hem savve long nem bilong God, hem sei hem savve, and hem aotem from poket bilong hem wanfala old Wastaoa magasin. Hem openem disfala magasin, and readim toktok from Mark 12:30, wea sei: “Iu mas lovem God bilong iu Jehovah witim full heart bilong iu.” Hem sei, “Mi barava laekem datfala scripture.” Bihaen olketa storyim staka samting saed long Bible, hem hapi for acceptim wanfala niu Bible and samfala Bible buk.

Klosap long Gulf of Carpentaria, wanfala man wea boss bilong wanfala farm for olketa buluka, wea size bilong datfala farm hem 400,000 hectare, hem showimaot interest long Kingdom message. Taem olketa showim hem tufala buk Bible Story Buk Bilong Mi, and Savve wea Lead Go Long Laef Olawe,a hem ask sapos olketa garem eni buk long Kriol languis, wea hem nao Pijin bilong Aboriginal pipol. Olketa Witness sapraes for herem datwan bikos nomata plande Aboriginal savve story long Kriol languis, samfala nomoa savve readim datwan. Bihaen nao olketa just faendemaot hao evri wakman long datfala farm, 50-fala evriwan, savve readim Kriol. Datfala boss hem barava hapi for kasem olketa Bible literature long Kriol languis, and hem givim telephone namba bilong hem long olketa.

Insaed datfala naen-day gogo, olketa givimaot 120 Bible, 770 buk, 705 magasin, and 1,965 brochure. And tu, olketa duim 720 return visit, and startim 215 Bible study.

Tru nao, bihaen plande year, olketa hia wea fit for herem gud nius, wea stap long olketa farawe ples, and wea garem bigfala spiritual need kasem nao wanem olketa needim.—Matthew 5:6.

[Footnote]

[Map long page 30]

(For formatted text, lukim pablikeson)

AUSTRALIA

NORTHERN TERRITORY

Darwin

Gulf of Carpentaria

Sydney

TASMANIA