Hope Nomata Laef Barava Hard—Wanfala Assembly Insaed Refugee Camp
KAKUMA refugee camp stap long north part bilong Kenya, klosap long border bilong Sudan. Winim 86,000 pipol nao stap long there. Datfala ples hem drae fogud, and long daytaem hem savve hot kasem 50 degrees celsius. Plande taem olketa faet savve kamap midolwan olketa refugee long there. Plande pipol lus hope from laef long datfala camp hem barava hard. Nomata olsem, samfala garem hope.
Samfala Jehovah’s Witness tu refugee long there. Olketa hia strong for talemaot gud nius bilong Kingdom. Olketa part long wanfala smol kongregeson long Lodwar, wea stap 120 kilometer south from datfala camp. For kasem next kongregeson wea klosap long Lodwar, man mas draev for eitfala hour.
From olketa refugee no free for go aot from datfala camp, plande no fit for attendim olketa assembly and convention bilong Olketa Jehovah’s Witness. So, Olketa Jehovah’s Witness arrange for garem wanfala spesol assembly day insaed long datfala camp.
Travel Go Long North
Nomata hem no isi for travel go long datfala ples wea graon hem barava drae from hem hot tumas, 15-fala Witness from taon bilong Eldoret long south, volunteer for travel 480 kilometer go long north for sapotim datfala assembly. Wanfala Bible student wea go witim disfala grup nao givim bas and draeva bilong hem for tekem olketa go. Olketa evriwan barava laek for go encouragem and strongim olketa brata bilong olketa.
Long early morning taem hem cold yet, olketa start for travel thru long olketa maunten long west Kenya. Road hem raf fogud and fastaem olketa mas travel go ap thru long olketa farm and forest area. Bihaen datwan, olketa start for gogo daon for kasem wanfala drae ples wea barava hot. Olketa lukim olketa goat and camel long there, and tu, olketa lukim pipol wea werem kastom kaleko bilong olketa. Plande long olketa karem stik for faet, and bow and arrow. Olketa Witness hia travel 11-fala hour for kasem Lodwar, wea hem ples wea hot and dust fogud. Samting olsem 20,000 pipol nao stap long there. Olketa Witness long Lodwar welkamim olketa, and bihaen, olketa go rest mekem olketa redi for datfala weekend wea bae busy fogud.
Long morning, evriwan wea travel kam go lukluk long samfala interesting samting long datfala ples. Wanfala nao datfala Lake Turkana, wea hem big winim eni nara lake long Kenya and wea stap long ples wea drae and wea no staka tree grow long hem. Staka crocodile stap long there winim eni nara ples long full world. Wata insaed datfala lake hem salt lelebet. Datfala lake hem main samting wea pipol long there iusim for living bilong olketa. Long evening, olketa Witness attendim Theocratic Ministry Skul and Service Meeting long Lodwar Kongregeson. Olketa garem wanfala naesfala Kingdom Hall wea olketa wakem long 2003, thru long program bilong Olketa Jehovah’s Witness for buildim Kingdom Hall long olketa poor kantri.
Spesol Assembly Day
Datfala spesol assembly day hem kamap long Sunday. Olketa wea ranem camp letem Lodwar Kongregeson, and olketa brata and sista wea visit kam, for go insaed camp long 8 klok long morning. So olketa Witness laek tumas for start early. Olketa followim wanfala road wea tantane fogud, wea lead go for border bilong Sudan. Datfala road kat go thru long olketa hae maunten. Gogo, olketa kamaot long wanfala kliafala ples wea hem nao Kakuma vilij. Hem just rain finis and wata kavarem road long samfala ples. Pipol insaed datfala camp wakem haos bilong olketa from mud brik and samfala ruf hem kapa and samfala kanvas. Olketa bilong Ethiopia, Somalia, Sudan, and olketa nara ples, stap long olketa separate area. Olketa refugee hapi tumas for welkamim olketa hia wea visit kam.
Assembly hem kamap insaed training center bilong camp. Olketa drawing wea stap long wall showimaot plande sorre samting wea olketa refugee feisim. Nomata olsem, olketa wea hipap insaed hall long datfala day olketa difren, olketa garem hope. Olketa brata givim tok long English and Swahili languis. Samfala wea savve long tufala languis evriwan transleitim toktok bilong olketa seleva. Wanfala brata wea refugee from Sudan nao givim fasfala tok, “Lukluk Gud Long Tokpiksa Heart Bilong Iumi.” Olketa elder wea visit kam nao givim olketa narafala tok.
Wanfala spesol samting wea kamap long evri assembly hem nao baptism. Brata wea redi for baptaes hem Gilbert. Hem and dadi bilong hem, ranawe from hom bilong olketa bikos long bigfala killkill wea kamap long there long 1994. Fastaem olketa tingse bae olketa sef sapos olketa go long Burundi, bat taem olketa kasem long there olketa luksavve hao olketa stap long danger yet. Gilbert hem ranawe go long Zaire, then long Tanzania, then long Kenya. Taem hem ranawe, plande taem hem mas haed insaed bush. Bifor assembly, hem and samfala nara brata iusim hand nomoa for digim wanfala smol pool and putim kanvas from ruf long haos bilong Gilbert insaed datfala hol. Then long morning, hemseleva karekare wata long baket for fulimap datfala pool. Datwan showim hao hem barava laek for baptaes! Taem tok bilong baptism gogo for end, evriwan lukluk long Gilbert taem hem standap. Plande krae taem olketa herem brata wea givim tok welkamim hem olsem wanfala member bilong kongregeson. Taem brata hia askem Gilbert tufala kwestin, hem ansa witim strong and kliafala voice front long 95 pipol wea hipap long assembly, and hem sei: “Ndiyo!”—wea minim “Ia!” long Swahili languis.
Wanfala naes part long aftanun program hem olketa experience bilong olketa Witness wea refugee. Wanfala brata storyim hao hem witness long wanfala man wea sidaon rest andanit tree.
“Waswe fren, hem sef for sidaon andanit tree evritaem?”
Man hia sei: “Ia.” Then hem sei moa, “Bat long naetaem hem no sef.”
Brata hia readim Micah 4:3, 4: “Olketa bae sidaon, each wan anda long grape tree and anda long fig tree bilong hemseleva, and no eniwan bae mekem olketa seksek.” Then hem explainim: “Lukim hao long niu world bilong God, bae man stap sef evritaem.” Datfala man hem acceptim wanfala buk for helpem hem studyim Bible.
Wanfala sista wea visit kam long Kakuma, wea thrifala member long famili bilong hem just dae, hem sei olsem abaotem olketa brata long camp: “Nomata laef hem barava hard; olketa brata gohed for garem strongfala faith. Olketa stap long ples wea barava nogud, bat olketa hapi taem olketa gohed for servem Jehovah. Olketa garem peace witim God. Diswan encouragem mi for garem peace and servem Jehovah. Mi no fit for komplen nomoa!”
Hem feel olsem datfala day hem finis kwiktaem. Brata wea givim last tok hem sei hao pipol from eitfala kantri nao stap long assembly. Wanfala Witness refugee hem sei disfala assembly hem pruvim hao Olketa Jehovah’s Witness garem love and wan mind nomata olketa stap insaed world wea divaed olobaot. Olketa nao olketa trufala Christian brata.—John 13:35.
[Box/Piksa long page 25]
OLKETA BOY WEA LUS WEA KAM FROM SUDAN
Start from 1983, taem disfala war long Sudan hem start, faev million pipol ranawe from hom bilong olketa. Samting olsem 26,000 pikinini separate from famili bilong olketa. Plande thousand long olketa ranawe go stap long olketa refugee camp long Ethiopia for thrifala year. Bat from olketa mas lusim datfala ples, olketa wakabaot for wan year go bak thru long Sudan for go kasem north Kenya. Taem olketa wakabaot, olketa soldia and man for steal spoelem olketa, and sik and olketa wild animal killim dae plande long olketa. From gogo bilong olketa hem hard tumas only haf long datfala sekson nomoa laef. Olketa pikinini hia nao kamap main sekson long Kakuma camp. Olketa organization wea provaedem relief kolem disfala sekson, olketa boy wea lus wea kam from Sudan.
Distaem Kakuma refugee camp hem garem olketa refugee from Sudan, Somalia, Ethiopia, and olketa nara kantri. Taem wanfala refugee hem arrive long datfala camp, olketa givim hem samfala samting for wakem haos and wanfala kanvas for putim long ruf. Tufala taem insaed month, olketa givim each refugee samting olsem 6 kilogram flour, 1 kilogram bean, lelebet oil for kuki, and salt. Plande long olketa refugee savve exchangem kaikai bilong olketa for nara samting wea olketa needim.
Samfala long olketa boy hia wea lus, olketa stap bak witim famili bilong olketa or go stap long nara kantri. Bat Office of Refugee Resettlement hem talem hao, “plande thousand long olketa stap nomoa long Kakuma refugee camp wea dust fogud, fulap witim olketa flae, and wea olketa mas stragol for kasem kaikai and kasem education.”
[Credit Line]
Courtesy Refugees International
[Map long page 23]
(For formatted text, lukim pablikeson)
KENYA
Kakuma camp
Lake Turkana
Lodwar
Eldoret
Nairobi
[Piksa long page 23]
Laef hem hard insaed long datfala camp Kakuma camp
[Piksa long page 23]
Long Kakuma camp olketa markem haomas wata man savve kasem
[Piksa long page 23]
Olketa Witness from Kenya travel go long north for encouragem olketa brata bilong olketa
[Piksa long page 24]
Wanfala missionary hem transleitim tok bilong wanfala spesol pioneer
[Piksa long page 24]
Pool for baptaes
[Piksa Credit Line long page 23]
Rationing water and Kakuma Refugee Camp: Courtesy Refugees International