No Fraet Taem Pipol Againstim Olketa
WANFALA raf grup forcem Gaius and Aristarchus, tufala fren bilong aposol Paul, for go insaed long stadium long Ephesus. Disfala grup singaot olsem insaed long stadium for tufala hour: “Artemis bilong pipol bilong Ephesus hem nambawan!” (Acts 19:28, 29, 34) Waswe, tufala fren bilong Paul stand strong nomata olketa pipol hia barava againstim olketa? And wanem nao startim disfala samting?
Paul preach long Ephesus for thrifala year finis. From datwan staka pipol lusim wei for worshipim idol. (Acts 19:26; 20:31) Main idol long Ephesus hem sismol temple bilong Artemis, woman god for garem pikinini, and from really temple bilong hem olketa savve lukim full taon. Olketa smol idol hia, hem samting bilong kastom for putim insaed haos or for werem. Olketa Christian no laek for baem olketa idol olsem.—1 John 5:21.
Demetrius, wanfala long olketa man for wakem samting from silver, hem tingse ministry bilong Paul bae spoelem bisnis bilong olketa. From hem no talem tru samting evribit, hem tanem tingting bilong olketa nara man wea garem sem bisnis for bilivim hao pipol long Asia Minor bae no worshipim Artemis nao. Semtaem olketa man hia kros and start for singaot and praisem Artemis, gogo raoa and faet nao kamap and full taon konfius olobaot.—Acts 19:24-29.
Staka thousand pipol nao go hipap insaed stadium wea 25,000 pipol nao savve sidaon insaed for lukluk. Paul willing for story long olketa, bat samfala man wea waka long gavman advaesem hem for no duim. Gogo, bigman bilong Ephesus nao mekem pipol hia for kamap kwaet and from datwan Gaius and Aristarchus no garekil nao.—Acts 19:35-41.
Distaem, taem pipol bilong God gohed for duim ministry, olketa meetim pipol wea laek for againstim olketa and wea laek for raoa and faetem olketa tu. Evritaem olketa preachim gud nius long olketa ples wea fulap long wei for worshipim idol, dirty fasin, and criminal fasin. Nomata olsem, olketa strong for followim example bilong aposol Paul, wea hem ‘nating stop for teach long pablik and long haos tu haos’ long Ephesus. (Acts 20:20) And olketa hapi tu taem olketa lukim ‘toktok bilong Jehovah gohed for grow and win.’—Acts 19:20.
[Piksa long page 30]
Samfala part bilong stadium long Ephesus wea stap yet