Win Long Spesol Wei

WASWE, maet faith bilong iu kasem test long ples wea iu waka, skul, famili, or bikos long samfala law bilong gavman? Sapos olsem, no wikdaon. Plande Jehovah’s Witness kasem semkaen test tu, bat nomata olsem olketa win. Tingim samting wea Erna Ludolph hem duim.

Erna hem born long Lübeck, Germany, long 1908. Hemseleva nomoa servem Jehovah long famili bilong hem. Taem gavman bilong Hitler start for rul long 1933, Olketa Jehovah’s Witness kasem staka test. Olketa wea waka witim Erna tok spoelem hem from hem no laek mekem saen for salutim Hitler, and from diswan gogo olketa Nazi arrestim hem. For eitfala year hem stap insaed olketa difren prison and raf prison long Hamburg-Fuhlsbüttel, Moringen, Lichtenburg, and Ravensbrück. Taem Erna stap long Ravensbrück, wanfala samting happen wea mekem hem win.

Haosgele wea Spesol

Professor Friedrich Holtz and waef bilong hem Alice, stap long Berlin. Tufala no member bilong Nazi gavman and no sapotim idea and goal bilong hem tu. Bat relative bilong olketa hem wanfala bigman long army, wea waka bilong hem for keepim olketa prisoner long samfala raf prison. So taem Friedrich and Alice luk aotem wanfala haosgele, bigman hia letem tufala for chusim eni prisoner. Dastawe long March 1943, Alice go long Ravensbrück for chusim wanfala haosgele. Hu nao hem chusim? Erna Ludolph. Erna go stap witim famili bilong Holtz wea keepim hem gud. Bihaen war finis, hem muv witim famili bilong Holtz go long datfala taon Halle, wea stap saed long Saale River. Long there moa Erna kasem test, bat distaem from Socialist gavman bilong East Germany. Long 1957, olketa raosem famili bilong Holtz go long West Germany, and Erna go witim olketa tu. Datfala taem nao Erna just free for duim olketa samting saed long religion bilong hem.

Why nao iumi fit for sei Erna win long spesol wei? From Erna showimaot gudfala fasin and preachim message bilong Bible long wei wea muvim heart bilong olketa narawan, gogo, Alice Holtz and faevfala pikinini bilong hem baptaes and kamap Olketa Jehovah’s Witness. And distaem tu, 11-fala granpikinini bilong Alice, olketa Jehovah’s Witness tu. Tufala granpikinini serve distaem long branch office bilong Olketa Jehovah’s Witness long Selters, Germany. Susanne, wanfala dota bilong Alice, hem sei olsem: “Example bilong Erna hem wanfala main samting wea helpem mifala for kam insaed long truth.” From Erna gohed strong, hem kasem bigfala reward. Waswe, long iu? Wei wea iu gohed faithful nomata long hard taem, maet mekem iu kasem sem samting olsem Erna. Tru nao, gudfala fasin and wei for preachim message bilong Bible long wei wea muvim heart, maet bae helpem iu tu for win long spesol wei.a

[Footnote]

[Piksa long page 31]

Erna Ludolph (wea sidaon) witim famili bilong Holtz