Hao for Iusim Gud Each Day

“SHOWIM mifala hao for iusim olketa day bilong mifala long wei wea mifala savve garem wisefala heart.” (Psalm 90:12) Diswan hem hambol prea bilong Moses, man wea raetem Bible. Wanem nao barava samting hem askem? Waswe, iumi fit for ask long diskaen wei tu?

Long verse 10, Moses raetem hao hem feel sorre for wei wea laef bilong man hem short. Then long narataem, hem raetem toktok bilong Job, wea sei: “Man, wea born from woman, garem shortfala laef and kasem staka trabol.” (Job 14:1) Hem klia tumas hao Moses barava feel nogud long wei wea man no laef longfala taem. So, diswan mekem hem ting long each day olsem wanfala spesol present. Moses talem God insaed datfala prea hao hem barava want for iusim gud lelebet taem wea hem laef yet, for mekem Creator bilong hem hapi. Waswe, iumi fit for luk aotem wei for iusim gud each day wea iumi laef tu? Hem nao barava samting wea iumi mas trae hard for duim sapos iumi laekem Jehovah for appruvim iumi.

Narafala samting moa muvim Moses and Job, and datfala samting tu shud muvim iumi. Tufala man bilong God hia luk go long future for samting wea tufala bae kasem—for laef olowe long disfala earth wea bae no garem eni trabol. (Job 14:14, 15; Hebrews 11:26) Long datfala taem, dae bae no stopem gudfala waka bilong man. Creator bilong iumi planim finis wanfala paradaes earth for olketa faithful wan for stap olowe insaed. (Isaiah 65:21-24; Revelation 21:3, 4) Sapos iu ‘iusim olketa day wea iu laef long wei for kasem wisefala heart,’ bae disfala hope hem bilong iu tu.