Waswe, Man Savve Finisim Wei for Poor?
PLANDE million pipol nating feisim wei for poor. Olketa nating hangre and cold taem olketa sleep. Nomata olsem, plande feel sorre long pipol wea poor and barava trae hard for helpem olketa.
Bat for poor hem samting wea plande pipol feisim evriday. Diswan barava tru long olketa kantri wea garem war, flood, no eni rain, and olketa nara problem. Olketa samting hia barava spoelem pipol long Africa wea living bilong olketa depend long garden. Samfala long olketa mas lusim hom and muv go for stap long olketa big taon or kamap refugee long nara kantri. Plande pipol from vilij go stap long taon from olketa tingse laef long there bae moabeta.
Wei for poor kamap moa big from olketa taon fulap tumas long pipol. Land for wakem garden hem no staka, and long samfala ples, maet barava nomoa nao. Plande taem hem hard for faendem waka. From samfala barava no garem eni hope nao, olketa kamap criminal. Pipol long taon barava luk aotem help, bat olketa gavman bilong man no fit for stretem diswan. Wanfala niuspepa long London, The Independent, hem sei olsem abaotem wanfala report bilong United Nations long November 2003: “Namba bilong pipol wea hangre hem kakamap moa big.” Hem sei tu: “Evriwea long world samting olsem 842 million pipol no kaikai gud—and datfala namba hem gohed for kamap big bikos samting olsem 5 million pipol kamap hangre evri year.”
Samfala taem, branch office bilong Olketa Jehovah’s Witness long South Africa kasem leta from olketa poor pipol. Example long diswan hem wanfala man from Bloemfontein wea raet go and sei: “Mi no garem waka, and taem mi lukim eni chance mi savve steal long taon. Sapos mi no duim datwan bae mifala hangre for plande day. Bat wei for hangre hem no kasem wei wea mifala barava safa from mifala cold tumas. No eni waka stap nao. Plande pipol hange raon long taon for faendem waka and kaikai. Samfala wea mi savve long olketa luk aotem kaikai long rabis bin. Samfala suisaed. Plande narawan olsem mi sorre and no garem hope. Luk olsem no eni gud samting bae kamap long future. Waswe, God wea wakem iumi and savve iumi needim kaleko and kaikai hem no lukim diswan?”
Olketa ansa wea savve comfortim disfala man hem stap. Long next article bae iumi lukim hao olketa ansa hia hem stap insaed long Word bilong God, Bible.