Klosap Bae Wei for Poor Hem Finis
OLKETA piksa bilong Paradaes, olsem long front bilong disfala magasin, hem samting wea barava kasem mind bilong pipol wea poor. Fasfala man and woman, Adam and Eve, really stap insaed paradaes. Hom bilong olketa nao datfala garden wea olketa kolem Eden. (Genesis 2:7-23) Hem tru, datfala Paradaes hem nomoa nao. Nomata olsem, wanfala paradaes wea no garem wei for poor, hem wanfala really samting wea bae kamap. Bible barava promisim diswan.
Tingim promis wea Jesus Christ talem long lastfala day wea hem laef long earth. Wanfala long olketa nogud man wea dae witim Jesus, hem showimaot hem biliv hao God savve stretem evri problem bilong man. Hem sei: “Jesus, rememberim mi taem iu kasem kingdom bilong iu.” Toktok hia showimaot hao datfala man bilivim Jesus bae rul olsem King and hao olketa wea dae bae laef bak. Jesus ansa olsem: “Tru nao mi talem iu tuday, Iu bae stap witim mi long Paradaes.”—Luke 23:42, 43.
Bible sei olsem abaotem olketa wea bae stap insaed Paradaes: “Olketa bae buildim haos and stap insaed; and olketa bae plantim grape plantation and kaikaim frut bilong hem.” (Isaiah 65:21) Tru nao, “olketa bae sidaon, each wan anda long grape tree and anda long fig tree bilong hemseleva, and no eniwan bae mekem olketa seksek; from mouth bilong Jehovah komanda bilong olketa army nao talem.”—Micah 4:4.
Bat, why nao God letem wei for poor gohed distaem? Wanem nao God duim for helpem olketa wea poor? Wanem taem nao bae wei for poor hem finis evribit?
Why Nao God Letem Wei for Poor Gohed?
Datfala Paradaes wea Adam and Eve stap insaed hem finis bikos wanfala wicked angel wea nem bilong hem Satan, hem mekem tufala for againstim God. Satan hem story long Eve thru long wanfala snek and switim hem for kaikaim frut bilong wanfala tree wea God stopem. Hem laea long hem and mekem hem biliv hao wei for independent from God nao bae mekem hem kasem laef wea moabeta. Taem Eve givim datfala tambu frut long Adam, hem tu kaikaim, wea showimaot hem les for followim God and hem laek followim waef bilong hem.—Genesis 3:1-6; 1 Timothy 2:14.
Hem barava fitim for tufala hia wea bighed for mas go aot from datfala Paradaes. Start from datfala taem tufala mas stragol for laef. Kam kasem distaem, Jehovah letem Satan for rulim olketa man and diswan showimaot klia wanem nao happen taem man no obeyim God. History bilong man hem pruvim finis hao man hard for mekem earth kamap wanfala Paradaes. (Jeremiah 10:23) Hem showimaot hao sapos man hem independent from God, bae olketa barava nogud problem olsem wei for poor kamap.—Ecclesiastes 8:9.
Bat datwan no minim olketa wea poor bae no kasem help long disfala taem wea fulap witim trabol. Word bilong God, Bible, hem talem samfala wisefala toktok for helpem olketa wea poor.
“No Wari”
Jesus story long staka pipol wea hipap, samfala long olketa poor pipol tu, and hem sei olsem: “Lukluk gud long olketa bird long skae, from olketa no savve plantim seed or harvestim kaikai or keepim kaikai long stoahaos; bat Dadi bilong iufala long heven hem feedim olketa. Iufala nao moa important winim olketa, iaman? . . . So no wari and sei, ‘Wanem nao bae mifala kaikaim?’ or, ‘Wanem nao bae mifala drinkim?’ or, ‘Wanem nao bae mifala werem?’ From evri samting hia nao samting wea olketa nation luk aotem. Bat Dadi bilong iufala long heven hem savve iufala needim evri samting hia. So, gohed for luk aotem fastaem kingdom and raeteous fasin bilong hem, and iufala bae kasem olketa narafala samting hia.”—Matthew 6:26-33.
Man wea poor no need for steal. (Proverbs 6:30, 31) Hem bae kasem samting wea hem needim sapos hem no letem eniting long laef kamap moa important winim God. Tingim story bilong Tukiso, wanfala man wea stap long Lesotho, long south part bilong Africa. Long 1998, wanfala army from difren kantri hem kam long Lesotho for stopem pipol faet againstim gavman. From datfala war, pipol steal from olketa stoa, no garem waka, and no inaf kaikai stap.
Long area wea Tukiso hem stap, pipol barava poor. Plande pipol wea stap raonem hem steal from olketa stoa. Taem Tukiso kam bak long smolfala haos bilong hem, hem lukim hao Maseiso, woman wea tufala stap tugeta, hem stealim kam staka samting. Tukiso hem sei long hem: “Tekem go aotsaed evri samting hia.” Hem talem Maseiso hao law bilong God tambuim man for steal. Maseiso obeyim hem. Olketa neiba mekfani long tufala and go tekem evri kaikai hia wea Maseiso stealim kam.
Samting wea Tukiso lanem taem hem studyim Bible witim Olketa Jehovah’s Witness nao mekem hem disaed strong olsem. Waswe, olketa hangre nao from hem disaed for obeyim law bilong God? Nomoa. Bihaen, samfala elder from kongregeson bilong Olketa Jehovah’s Witness wea Tukiso savve go long hem, olketa kam lukim hem and tekem kam kaikai. Olketa Jehovah’s Witness long South Africa sendem go winim tufala ton bilong relief suppy for olketa Christian brata and sista bilong olketa long Lesotho. Wei wea Tukiso obeyim God and love wea kongregeson showim thru long help wea olketa givim, hem barava affectim Maseiso. Hem tu start for studyim Bible. Gogo, tufala marit and from datwan tufala fit for baptaes for kamap Olketa Jehovah’s Witness. Tufala gohed distaem for servem God long faithful wei.
Jehovah God hem barava tingim pipol wea poor. (Lukim box wea title bilong hem sei “Hao Nao God Ting Long Pipol wea Poor?”) Hem mekem olketa wei kamap for helpem olketa narawan wea olsem Tukiso and Maseiso for lanem plande samting abaotem hem. And thru long Word bilong hem, hem talem olketa wisefala samting for helpem iumi deal witim olketa problem wea iumi feisim evriday.
Nambawan Help
Evritaem Olketa Jehovah’s Witness trae hard for garem sem tingting olsem God abaotem pipol wea poor. (Galatians 2:10) Taem disaster kasem wanfala kantri and affectim olketa tru Christian, olketa Witness savve givim help. Winim datwan, olketa Witness showimaot hao olketa barava tingim spiritual need bilong evriwan and poor pipol tu. (Matthew 9:36-38) Insaed long 60 year wea go finis, plande thousand minister wea kasem training volunteer for kamap missionary long olketa difren kantri. Olsem example, tufala missionary wea teachim Tukiso and Maseiso kam from Finland and lanem Sesotho languis, and from datwan tufala helpem olketa for kamap disaepol bilong Jesus. (Matthew 28:19, 20) Plande taem, for duim missionary waka olsem, man mas lusim gud living long wanfala rich kantri and muv go long wanfala poor kantri.
Olketa trufala Christian no steal for keepim olketa seleva laef. Olketa garem faith hao Jehovah God bae helpem olketa. (Hebrews 13:5, 6) Wanfala wei wea Jehovah savve helpem pipol bilong hem, hem thru long olketa worshiper bilong hem evriwea long world wea tingim each other.
Wanfala nara wei wea Jehovah helpem olketa wea poor, hem thru long advaes wea savve helpem olketa saed long living. Olsem example, Bible hem sei: “Man wea savve steal mas finis for steal, hem mas duim hard waka, and iusim hand bilong hem for duim gudfala waka, mekem hem savve garem samting for givim long samwan wea garem need.” (Ephesians 4:28) Plande wea no garem waka faendem wei for duim samfala samting, olsem wei for wakem garden. Bible helpem pipol for sevem selen tu, from hem teachim olketa for no duim olketa nogud fasin, olsem wei for ova tumas for drinkim alcohol.—Ephesians 5:18.
Wei for Poor Bae Finis—Wanem Taem?
Bible showimaot hao distaem iumi stap insaed “olketa last day” bilong rul bilong Satan. (2 Timothy 3:1) Klosap, Jehovah God bae sendem Jesus Christ for judgem olketa man. Wanem nao bae happen long datfala taem? Jesus talem ansa for datwan taem hem talem disfala tokpiksa. Hem sei: “Taem Son bilong man hem kam long glory bilong hem, and olketa angel witim hem, then hem bae sidaon long nambawan throne bilong hem. And evri nation bae hipap front long hem, and hem bae divaedem pipol, olsem shepherd hem divaedem olketa sheep from olketa goat.”—Matthew 25:31-33.
Insaed disfala tokpiksa, olketa sheep nao pipol wea stap anda long Jesus wea king. Jesus sei olketa hia olsem sheep bikos olketa savve followim hem olsem Shepherd. (John 10:16) Olketa hia wea olsem sheep bae kasem laef anda long perfect rul bilong Jesus. Olketa bae hapi from olketa bae stap long world wea free from wei for poor. Olketa wea olsem goat wea les long rul bilong Jesus bae finis evribit.—Matthew 25:46.
Kingdom bilong God bae finisim evri nogud fasin. Then wei for poor bae finis tu. Pipol wea lovem and tingim each other nomoa bae stap long earth. Samting wea pruvim hao diswan fit for really happen, hem wei wea Olketa Jehovah’s Witness evriwea long world garem wan mind, olsem Jesus sei: “From diswan evriwan bae savve iufala nao olketa disaepol bilong mi, sapos iufala lovem each other.”—John 13:35.
[Box/Olketa Piksa long page 6, 7]
Hao Nao God Ting Long Pipol wea Poor?
Bible sei Creator hem “Man for givim bred for olketa wea hangre.” (Psalm 146:7) Bible hem garem winim wan handred verse wea story abaotem wei wea God tingim olketa wea poor.
Olsem example, taem Jehovah givim Law bilong hem long nation bilong Israel, hem komandim olketa Israelite farmer for no harvestim saed long garden bilong olketa. Olketa mas no go bak moa for tekem eni frut wea olketa miss for kolektem from olketa olive tree or grape vine. Olketa law hia hem helpem olketa difren pipol wea kam stap witim olketa, olketa pikinini wea no garem dadi or mami, olketa widow, and olketa narawan wea kasem hard taem.—Leviticus 19:9, 10; Deuteronomy 24:19-21.
And tu, God givim disfala komand for olketa Israelite: “Iufala pipol mas no mekem eni widow woman or boy wea no garem dadi safa. Sapos iu mekem hem safa, then sapos hem singaot long mi, bae mi herem singaot bilong hem and kros bilong mi bae barava kamap big, and bae mi killim iufala dae witim sword, and waef bilong iufala mas kamap olketa widow and olketa pikinini bilong iu bae no garem dadi.” (Exodus 22:22-24) Sorre tumas, plande Israelite wea rich nating followim olketa toktok hia. From diswan and plande nara nogud samting wea olketa duim, Jehovah God givim olketa plande warning thru long olketa profet bilong hem. (Isaiah 10:1, 2; Jeremiah 5:28; Amos 4:1-3) Gogo, God mekem Assyria and bihaen Babylon tu, for tekovarem area bilong olketa Israelite. Plande Israelite dae, and olketa wea laef kamap prisoner long olketa difren kantri.
Son wea God lovem tumas, Jesus Christ, hem tu showimaot wei wea Dadi bilong hem tingim poor pipol. Taem Jesus explainim waka bilong hem, hem sei: “Spirit bilong Jehovah hem stap long mi, from hem anointim mi for talemaot gud nius long poor pipol.” (Luke 4:18) Diswan no minim Jesus preach nomoa for poor pipol. Hem helpem tu olketa wea rich. Bat, nomata hem helpem olketa wea rich, plande taem Jesus showimaot hao hem tingim olketa wea poor. Olsem example, hem sei long wanfala rich ruler: “Salem evri samting bilong iu and givim long olketa poor pipol, and kam followim mi, and iu bae kasem rich samting long heven.”—Luke 14:1, 12-14; 18:18, 22; 19:1-10.
Jehovah God and Son bilong hem barava tingim olketa wea poor. (Mark 12:41-44; James 2:1-6) Wanfala samting wea showimaot diswan, hem wei wea Jehovah hem rememberim plande million poor pipol wea dae finis. Bae hem mekem evriwan hia laef bak long datfala taem wea no eni wan bae poor moa.—Acts 24:15.
[Olketa Piksa]
Wei wea Olketa Jehovah’s Witness evriwea garem wan mind hem pruvim hao wanfala niu world bae really kamap
[Piksa long page 5]
Tukiso and Maseiso witim missionary wea studyim Bible witim Tukiso
[Piksa long page 5]
Maseiso standap front haos bilong hem witim missionary wea studyim Bible witim hem