“Jehovah Nao Man wea Helpem Mi”

Savve Bilong God Strongim Olketa Famili

“BERLIN Wall.” Datwan hem nem wea wanfala hasband and waef long Argentina kolem wanfala really wall wea tufala wakem for divaedem haos bilong olketa! Tufala garem raoa wea hard for tufala stretem, tufala barava heitim each other.

Sorre tumas, samting wea happen long tufala hem no niu samting. Fasin for no agree long eniting, wei for durong, and fasin for kros barava spoelem tumas staka famili. From God nao startim famili, diswan hem sorre samting. (Genesis 1:27, 28; 2:23, 24) Disfala nambawan arrangement from God hem chance for showimaot love. (Ruth 1:9) Taem evriwan insaed famili duim olketa samting wea God markem for each wan, olketa honorim Jehovah and kamap blessing long each other.a

From God nao startim famili arrangement, iumi mas followim tingting bilong hem abaotem hao famili shud stap. Word bilong hem garem staka kaonsel for helpem famili, especially taem problem kamap. Bible sei olsem for olketa hasband: “Olketa hasband mas lovem waef bilong olketa olsem olketa seleva.” Taem hasband duim diswan, bae hem no hard for waef “garem bigfala respect for hasband bilong hem.”—Ephesians 5:25-29, 33.

Aposol Paul raet olsem for olketa mami and dadi: “Iufala dadi, no mekem olketa pikinini bilong iufala kros, bat gohed for trainim olketa long discipline and wei for stretem tingting wea kam from Jehovah.” (Ephesians 6:4) Diswan bae mekem feeling for kea stap insaed famili, and hem bae moa isi for pikinini obeyim parents bilong hem.—Ephesians 6:1.

Olketa point hia hem example long advaes wea stap insaed Bible for famili laef. Staka famili followim olketa principle bilong God and hapi tumas. Wanfala example nao datfala hasband and waef from Argentina wea iumi storyim finis. Bihaen tufala studyim Bible witim Olketa Jehovah’s Witness for thrifala month, tufala start for followim wise kaonsel bilong Bible saed long marit. Tufala trae hard for kamap gud long wei for story, for tingim need bilong each other, and for garem fasin for forgive. (Proverbs 15:22; 1 Peter 3:7; 4:8) Tufala lane for kontrolem wei for kros, and for depend long God for help taem hem luk olsem hem hard for duim datwan. (Colossians 3:19) No longtaem bihaen, tufala aotem datfala “Berlin Wall.”

God Savve Strongim Famili

Savve witim wei for followim standard bilong God savve strongim famili for deal witim olketa hevi. Diswan hem barava important, bikos Bible talem finis hao olketa famili bae kasem nogud problem long distaem. Bifor, Paul talem hao pipol and fasin bae kamap nogud. Hem sei fasin for no loyal, “no garem love,” and no obeyim dadi and mami bae kamap long “olketa last day,” nomata midolwan long pipol wea “luk olsem olketa worshipim God” tu.—2 Timothy 3:1-5.

Wei for trae mekem God hapi savve help for daonem wei wea olketa samting hia savve affectim famili. Staka famili savve hao olketa needim help from God for deal witim problem wea olketa feisim. Sapos evriwan long famili laek for keepim gud wei for fren witim God, winim evri samting, olketa mas followim olketa principle bilong Bible and luksavve hao “sapos Jehovah no buildim haos, then hem iusles nomoa for olketa man waka hard for buildim.” (Psalm 127:1) Best wei for mekem famili hapi, hem for obeyim God evribit.—Ephesians 3:14, 15.

Wanfala man long Hawaii wea nem bilong hem Dennis lukim hao diswan hem tru. Nomata hem wanfala wea sei hem Christian, hem wei bilong hem for tok nogud and faet. Bihaen hem lusim army, hem kamap moa raf and garem moa heit. Hem sei: “Mi faet evritaem. Mi no kea long samting wea happen long mi, and mi no fraet for dae. Mi gohed for faet and tok swear nomoa. Waef bilong mi wea hem wanfala Jehovah’s Witness, encouragem mi for studyim Bible.”

Dennis no laek followim toktok bilong waef bilong hem. Nomata olsem, Christian fasin bilong waef bilong hem isisi changem tingting bilong hem. Gogo, Dennis go long wanfala Christian meeting witim waef and olketa pikinini bilong hem. Bihaen datwan, Dennis start for studyim Bible and start for change. Hem lusim wei for smoke wea hem duim for 28-year finis and no kaban witim olketa fren bilong hem wea duim olketa samting wea hem trae for lusim. Dennis thankiu long Jehovah and sei: “Famili bilong mi kamap moa hapi. Mifala full famili go long olketa meeting and ministry tugeta. Tufala pikinini bilong mi no fraetem mi moa, bikos mi lane for kontrolem kros bilong mi and no iusim nogud and raf toktok moa. Mifala savve story and enjoyim tumas for story abaotem Bible. Sapos mi no studyim Bible, mi bae hard for stap long hia tuday, bikos bifor, mi man mi savve kros kwiktaem tumas.”

Olketa famili savve hapi sapos olketa waka hard for duim will bilong Jehovah. Samting wea plande pipol experiencem showimaot hao sapos wanfala member long famili followim principle bilong Bible, laef hem gud winim sapos no eniwan duim. For mekem Christian famili kamap strong, evriwan mas willing for waka hard for kasem datwan. Bat evriwan insaed kaen famili olsem barava trustim hao Jehovah bae blessim hard waka bilong olketa. Olketa savve talem disfala toktok bilong man wea raetem psalm: “Jehovah nao man wea helpem mi.”—Psalm 121:2.

[Footnote]

[Blurb long page 9]

“Evri famili long heven and long earth kasem nem bilong olketa” from God.—EPHESIANS 3:15

[Box long page 8]

JEHOVAH TINGHAE TUMAS LONG FAMILI ARRANGEMENT

“God blessim tufala and God hem sei long tufala: ‘Garem pikinini and kamap plande and fulimap earth.’”—Genesis 1:28.

“Hapi nao evriwan wea fraet long Jehovah . . . Waef bilong iu bae olsem wanfala vine wea garem frut insaed long haos bilong iu.”—Psalm 128:1, 3.