Helpem Pipol wea Poor for Garem Hope
1 Jesus barava interest long pipol wea poor. Samfala taem hem duim mirakol for helpem olketa long material wei and healim pipol wea sik, bat main waka bilong hem nao for talemaot “gud nius” long pipol wea poor. (Matt. 11:5) Distaem Christian ministry gohed for helpem pipol wea poor and olketa narawan.—Matt. 24:14; 28:19, 20.
2 Trufala Hope: Olketa minister long church plande taem promisim long pipol wea poor hao olketa bae kamap rich sapos olketa willing for givim samting long church. Bat Bible hem teachim iumi hao Kingdom bilong God nomoa bae finisim poor living and stretem olketa problem bilong man. (Ps. 9:18; 145:16; Isa. 65:21-23) Taem iumi helpem pipol wea poor for luksavve long truth from Bible, iumi helpem olketa for garem hope and satisfaem need bilong olketa for savve long God and worshipim hem.—Matt. 5:3.
3 Olketa Pharisee long taem bilong Jesus lukdaonem pipol wea poor, and olketa no respectim olketa long wei for kolem olketa ‘am-ha·’aʹrets, wea minim olketa man nating or “pipol long land.” Bat long tingting bilong Jesus “blood bilong olketa” or laef bilong olketa, hem “spesol.” (Ps. 72:13, 14) Iumi savve followim Jesus long wei for kaen and showimaot interest long narawan and olketa problem bilong olketa. (Prov. 14:31) Iumi mas no tok daonem pipol wea poor wea stap long community or no willing for witness long olketa. Plande pipol wea lisin long message abaotem Kingdom hem pipol wea poor.
4 Helpem Pipol wea Poor Distaem: Wei wea iumi teachim olketa Bible principle long pipol wea poor long territory hem helpem olketa tu for deal witim olketa samting wea kamaot from poor living distaem. Olsem example, Bible tok strong againstim fasin for drunk, gambol, lesy, wei for smoke, and olketa nara samting wea lead go long poor living. (Prov. 6:10, 11; 23:21; 2 Cor. 7:1; Eph. 5:5) Bible encouragem iumi for honest and for waka witim “full soul,” wea hem nao olketa fasin wea olketa boss laekem olketa wakman for garem. (Col. 3:22, 23; Heb. 13:18) Tru nao, long wanfala survey plande long olketa boss barava tinghae long olketa fasin olsem wei for honest and faithful winim eni nara fasin taem olketa lukaotem samwan for wanfala waka.
5 Jehovah hem barava tingim wei wea pipol wea poor olketa safa. Klosap bae Jesus Christ sevem “poor wan wea singaot for help.” (Ps. 72:12) Go kasem datfala taem, iumi garem spesol chance for comfortim narawan, and pipol wea poor tu, witim message from Bible wea givim hope.