“Kasem Persecution for Faith Bilong Hem”

OLKETA long Cernobbio, wanfala taon long north Italy, wakem wanfala ples for memorial bilong pipol wea dae long hand bilong olketa wea no respectim human rights. Wanfala long olketa samting for rememberim wea olketa putim long datfala ples hem for Narciso Riet. Mami and dadi bilong hem from Italy, bat hem born long Germany. Hem kamap wanfala Jehovah’s Witness midolwan long 1930 and 1939. Olketa Jehovah’s Witness kasem persecution taem Hitler hem rul bikos olketa no laek for apim Hitler winim trufala God, Jehovah.

Taem secret police faendaot Riet savve tekem olketa Wastaoa insaed olketa raf prison, hem ranawe go long Cernobbio. Long there hem transleitim Wastaoa go long Italian languis and givimaot for olketa nara Witness long datfala area. Olketa faendaot waka wea hem strong for duim. Wanfala SS Officer and olketa man bilong hem force go insaed haos bilong Riet, arrestim hem, and tekem tufala Bible and tu-thri leta for pruv bilong olketa! Olketa sendem Riet go bak long Germany, and putim hem insaed long raf prison long Dachau, and olketa killim hem dae long there bifor World War II hem finis. Raeting wea stap antap datfala samting long memorial hia sei, hem “kasem persecution for faith bilong hem.”

Faith bilong Narciso Riet and staka nara Witness wea olketa Nazi persecutim olketa, hem encouragem olketa Christian distaem for stap faithful long Jehovah, only Wan long universe wea olketa fit for worshipim. (Revelation 4:11) Jesus sei: “Hapi nao olketa wea kasem persecution bikos long raeteous fasin.” God bae nating forgetim waka bilong olketa and hem bae blessim olketa for strong wea olketa showimaot.—Matthew 5:10; Hebrews 6:10.