Iumi Savve Deal Witim Eni Hard Taem!
WASWE, iu kasem hard taem distaem? Waswe, iu ting bae iu no win for deal witim datwan? Waswe, samfala taem iu tingse iuseleva nomoa kasem diskaen problem and bae hard for datwan hem finis? Sapos olsem, no lus hope! Bible promisim iumi hao nomata wanem hard taem iumi kasem, God savve helpem iumi win for deal witim datwan.
Bible talem finis hao olketa servant bilong God bae “kasem olketa difren kaen hard taem.” (James 1:2) Tingim datfala toktok “difren kaen” (Greek poi·kiʹlos). Taem olketa iusim datfala Greek word bifor, hem minim “staka and difren kaen” or “staka difren kala,” wea showimaot hao “staka difren kaen hard taem” savve kamap. So long tokpiksa wei, “olketa difren kaen hard taem” garem olketa difren kala. Nomata olsem, Jehovah sapotim iumi mekem iumi savve deal witim olketa difren kaen hard taem hia. Why nao iumi savve sure long diswan?
“Kaeness Bilong God wea Man No Fit for Kasem wea Showaot Long Olketa Difren Kaen Wei”
Aposol Peter savve hao olketa Christian “feel sorre from olketa difren hard taem” wea olketa kasem. (1 Peter 1:6) Bihaen moa, long leta wea holy spirit muvim hem for raetem, hem talem hao “kaeness bilong God wea man no fit for kasem” hem “showaot long olketa difren kaen wei.” (1 Peter 4:10) Datfala toktok “long olketa difren kaen wei” lelebet semsem olsem datfala Greek word, poikilos. Wanfala Bible savveman story abaotem diswan taem hem sei: “Diswan hem nambawan samting for tingim. . . . For storyim grace [or, kaeness wea man no fit for kasem] bilong God olsem poikilos hem minim grace bilong God savve win for deal witim eni samting wea man kasem.” Hem sei moa: “No eni samting, no eni problem, no eni important need, wea grace bilong God no savve win for deal witim. Disfala interesting word poikilos remindim iumi hao grace bilong God savve deal witim eni samting wea savve kasem iumi.”
Kaeness Bilong God Helpem Iumi for Winim Olketa Hard Taem
Peter hem sei wanfala wei wea kaeness bilong God wea man no fit for kasem hem showaot, hem thru long olketa difren member bilong Christian kongregeson. (1 Peter 4:11) Evri servant bilong God garem spiritual savve wea olketa savve iusim for encouragem olketa wea kasem hard taem. (Romans 12:6-8) Olsem example, samfala long kongregeson savve tumas for teach from Bible. Naesfala toktok bilong olketa wea showimaot fasin for luksavve, hem strongim and muvim olketa narawan for no givap. (Nehemiah 8:1-4, 8, 12) Olketa narawan evritaem duim shepherding visit for comfortim olketa wea needim help. Long olketa visit hia olketa elder givim encouragement wea ‘comfortim heart’ bilong man. (Colossians 2:2) Taem olketa duim visit olsem wea strongim faith bilong man, olketa givim wanfala spiritual present. (John 21:16) Samfala narawan long kongregeson barava showimaot love, fasin for kea and feeling taem olketa helpem olketa brata and sista wea sorre from olketa kasem hard taem. (Acts 4:36; Romans 12:10; Colossians 3:10) Wei wea olketa brata and sista showimaot fasin for tingim man and helpem olketa narawan hem wanfala important “kala” or wei wea kaeness bilong God wea man no fit for kasem hem showaot.—Proverbs 12:25; 17:17.
“God wea Givim Evri Comfort”
Winim evri nara samting, Jehovah givim comfort. Hem “God wea givim evri comfort, wea hem savve comfortim iumi long evri trabol bilong iumi.” (2 Corinthians 1:3, 4) Tufala main wei wea Jehovah ansarem prea bilong iumi for help hem thru long wisdom wea stap insaed Bible and holy spirit wea strongim man. (Isaiah 30:18, 21; Luke 11:13; John 14:16) Iumi savve kasem comfort from toktok wea holy spirit muvim aposol Paul for raetem. Hem sei: “God hem faithful, and hem bae no letem eni temptation kasem iufala wea iufala no fit for winim, bat witim datfala temptation hem bae mekem wei for iufala savve stand strong.”—1 Corinthians 10:13.
Tru nao, nomata wanem “kala” nao datfala hard taem wea iumi kasem, bae evritaem wanfala “kala” bilong kaeness bilong God wea man no fit for kasem stap for helpem iumi winim datwan. (James 1:17) Wei wea Jehovah givim help wea fitim long olketa servant bilong hem long barava taem —nomata wanem kaen hard taem nao olketa kasem—hem narafala samting wea showimaot “datfala big wisdom bilong God wea fitim for evri samting.” (Ephesians 3:10) Waswe, iu agree?
[Olketa Piksa long page 31]
Jehovah helpem iumi for deal witim olketa hard taem