Praisem Jehovah Long Skul
OLKETA young Witness bilong Jehovah long full world faendem staka wei for praisem God long skul—saed long toktok and fasin. Diswan nao samfala experience wea showimaot olketa young wan hia barava want for duim datwan.
Wanfala young Witness long Greece kasem assignment for raetem story abaotem hao air wea stap raonem earth hem dirty. Hem lukluk insaed Watch Tower Publications Index and hem faendem wanfala Awake! magasin wea garem datfala information wea hem iusim. Long end long story, hem raetem hem kasem information hia from Awake! Teacher bilong hem sei datfala story hem wanfala long olketa barava nambawan story wea hem readim. Then datfala teacher iusim disfala information long wanfala meeting bilong olketa bigman and gud samting tu kamaot from datwan. Datfala young sista disaed for givim samfala Awake! long datfala teacher, wanfala long olketa nao hem “Teachers—What Would We Do Without Them?” Then, datfala teacher praisem Awake! magasin insaed class, so samfala skul pikinini start for askem samfala magasin. Datfala sista mas tekem kam olketa magasin long skul mekem olketa savve readim samfala nara information tu.
Narafala young Christian from Benin, Africa, hem feisim nara difren kaen hevi. Bifor test kamap long skul, wei bilong parents bilong olketa pikinini hem for story tugeta and agree for haerem teacher for teachim olketa pikinini long hard topic. Diswan bae redim olketa pikinini for datfala test wea bae kamap. Bat, olketa teacher chusim morning long olketa Saturday for class hia. Datfala young Witness hem les and sei: “Evri Saturday morning hem taem wea full kongregeson preach tugeta. Hem nomoa only taem long week mi hapi tumas, mi hard for changem for eni nara samting!” Dadi bilong hem, wanfala singol dadi and hem Witness tu, agree and trae for story witim samfala parents and teacher for changem day for extra class. Bat, evriwan no laekem. Datfala young gele disaed for no go nao long eni extra class. Bat hem go aot for preach witim olketa long kongregeson bilong hem. Olketa pikinini wea olketa skul tugeta mekfani long hem, olketa talem hem for lusim preaching and God bilong hem tu. Olketa barava tingse bae hem fail long test. Batawea, datfala grup wea kasem extra class nao fail, bat young sista bilong iumi nao pas. Iu savve nao, mekfani hem stop tu. Distaem olketa skul pikinini sei long hem, “Gohed nomoa for servem God bilong iu.”
Long Czech Republic, wanfala gele wea 12 year mas redim wanfala story abaotem eni buk. Mami bilong hem encouragem hem for story abaotem Nambawan Man wea Winim Evri Otherfela Man buk. Hem startim story bilong hem witim olketa kwestin olsem: “Wanem nao tingting bilong iu? Hu nao datfala nambawan man wea winim evri nara man?” Hem explainim hu nao Jesus, laef bilong hem long earth, and olketa teaching bilong hem. Bihaen datwan, hem storyim chapter wea garem title “Leson Abaotem Way for Forgive.” Teacher bilong hem sapraes and sei, “Hem wanfala barava nambawan story wea mi no herem from iu bifor!” and hem hapi for tekem wanfala long disfala buk. Samfala classmate bilong hem tu laekem datfala buk. Next day nomoa, disfala gele givim 18-fala buk and hem barava hapi tumas for duim diswan.
Olketa young wan olsem barava hapi tumas for praisem Jehovah long skul. Iumi evriwan shud followim wei wea olketa young wan hia barava want for praisem Jehovah.