Young Pipol, Praisem Jehovah!
“Praisem Jehovah from earth, . . . iufala young man and tu iufala young gele.”—PSALM 148:7, 12.
1, 2. (a) Staka young wan feelim tumas olketa wanem samting wea parents no letem olketa for duim? (b) Why nao olketa young wan shud no feel nogud long eni tambu wea parents putim for olketa?
OLKETA young wan savve gud long olketa samting wea hem tambu for olketa duim. Staka bae talem hao hem tambu for olketa swim seleva long sea or river, wakabaot seleva go long skul, and mas kam bak long haos bifor hem dark. Samfala taem, maet wanfala young wan sei staka samting hem laek for duim bae parents bilong hem talem sem ansa, “Iu weit, taem iu big nao bae iu duim datwan.”
2 Iufala young wan savve hao parents bilong iufala tingim hem wise for putim olketa tambu olsem, maet for protectim iufala. For sure iufala savve tu hao Jehovah hem hapi taem iufala obeyim parents bilong iufala. (Colossians 3:20) Bat waswe, enitaem iu feel olsem iu no free for disaedem samting wea iu laekem? Waswe, hem tambu for iu duim evri important samting go kasem taem iu big? Datwan hem no tru! Wanfala waka gohed distaem wea moa important winim eni nara privilege wea maet iu weit for duim. Waswe, iufala young wan fit for join insaed disfala waka? Ia, and tingim tu hao Most Hae God nao invaetem iu for duim datwan!
3. Jehovah invaetem olketa young wan for garem wanem privilege, and wanem nao olketa kwestin wea iumi bae story raonem distaem?
3 Wanem waka nao iumi storyim long hia? Lukim toktok bilong theme scripture bilong disfala article: “Praisem Jehovah from earth, . . . iufala young man and tu iufala young gele, iufala olo man witim olketa boy.” (Psalm 148:7, 12) Hem nao bigfala privilege wea iufala garem: Iufala savve praisem Jehovah. Waswe, iu barava hapi for share insaed long datfala waka nomata iu young? Staka barava hapi. For lukim hao kaen feeling olsem for praisem Jehovah savve mekem iu kasem gud samting, iumi story raonem thrifala kwestin. First wan, why nao iu shud praisem Jehovah? Mek-tu, hao nao iu savve praisem hem long gudfala wei? Mek-thri, wanem taem nao hem gudfala taem for start for praisem Jehovah?
Why Praisem Jehovah?
4, 5. (a) Olsem Psalm 148 hem showimaot, iumi insaed long wanem spesol samting? (b) Hao nao creation wea no savve toktok or tingting savve praisem Jehovah?
4 Wanfala nambawan reason for praisem Jehovah hem from hem nao Creator. Psalm 148 helpem iumi for ting strong long disfala tru samting. Tingim sapos iu lukim wanfala sekson wea singim barava naesfala song, hao nao bae iu feel? Waswe sapos iu savve hao samting olketa sing abaotem hem tru, hem samting wea iu savve hem important, and hem samting wea buildimap man and mekem hem hapi? Waswe, bae iu laek for lanem olketa word hia and singsing witim olketa tu? Staka long iumi bae laek duim datwan. Olsem tu, Psalm 148 hem showim hao iu part long wanfala samting olsem wea gohed distaem, bat wea barava moa important. Datfala psalm hem story abaotem wanfala big sekson wea evriwan praisem Jehovah tugeta. Bat, taem iu readim datfala psalm, maet iu lukim wanfala samting wea difren. Wanem nao datwan?
5 Staka wea praisem Jehovah wea Psalm 148 story abaotem no savve toktok or tingting. Olsem example, iumi read abaotem wei wea sun, moon, olketa star, snow, wind, maunten, and olketa hill praisem Jehovah. Hao nao olketa samting olsem wea no savve story olketa praisem Jehovah? (Verse 3, 8, 9) Olketa duim datwan long sem wei wea olketa tree, animal long sea, and olketa nara animal olketa duim. (Verse 7, 9, 10) Waswe, enitaem iu lukim taem sun go daon wea luk naes tumas, or iu luk go ap long skae and lukim full moon and olketa star, or laflaf taem iu lukim olketa animal plei, or sapraes long wanfala barava naes ples? Sapos olsem, iu “herem finis” song bilong praise wea creation singim. Evri samting wea Jehovah wakem hem mekem iumi tingim moa hao hem nao olmaeti Creator, hao no eniwan long full universe hem barava strong, wise, or showimaot love olsem hem.—Romans 1:20; Revelation 4:11.
6, 7. (a) Psalm 148 hem story abaotem wanem creation wea praisem Jehovah? (b) Wanem nao savve muvim iumi for praisem Jehovah? Givim example.
6 Psalm 148 hem storyim tu wei wea olketa nara creation praisem Jehovah. Long verse 2, “army” bilong olketa angel bilong Jehovah long heven, olketa praisem God. Long verse 11, olketa man wea garem bigfala paoa, olsem olketa king and judge kasem invitation for givim praise tu. Sapos olketa maeti angel hapi taem olketa praisem Jehovah, no eni man nating fit for sei hem no need for duim datwan from hem garem hae position! Then, long verse 12 and 13, iufala young wan kasem invitation tu for praisem Jehovah. Waswe, iu laek for duim datwan?
7 Tingim wanfala example. Sapos wanfala gud fren bilong iu hem savve tumas for duim wanfala samting—maet saed long sports, art, or music—waswe, bae iu story abaotem hem long famili and olketa nara fren bilong iu? Ia, bae iu duim datwan. Wei for lanem evri samting wea Jehovah duim savve muvim iumi for duim sem samting tu. Olsem example, Psalm 19:1, 2 sei olketa star long skae “mekem staka toktok for kamap.” Taem iumi tingim olketa nambawan samting wea Jehovah duim finis, datwan barava muvim iumi for story abaotem God long nara pipol.
8, 9. Why nao Jehovah laekem iumi for praisem hem?
8 Narafala important reason for iumi praisem Jehovah hem bikos hem laekem iumi for duim datwan. Why nao olsem? Waswe, hem needim praise from olketa man? Nomoa. Iumi olketa man maet needim narawan for praisem iumi samfala taem, bat Jehovah hem moa hae winim iumi. (Isaiah 55:8) Hem no garem eni daot abaotem hemseleva or olketa fasin bilong hem. (Isaiah 45:5) Nomata olsem, hem laekem iumi for praisem hem and hem hapi taem iumi duim datwan. Why nao olsem? Lukim tufala reason. First wan, hem savve iumi need for praisem hem. Taem hem wakem iumi, hem putim spiritual need insaed long iumi, wea hem nao datfala need for worship. (Matthew 5:3) Taem iumi duim samting for kasem datfala need, Jehovah hapi tumas olsem taem parents bilong iu hapi for lukim iu kaikaim kaikai wea bae helpem body bilong iu.—John 4:34.
9 Mek-tu reason, Jehovah savve hao nara pipol need for herem iumi praisem hem. Aposol Paul raetem disfala toktok long young man Timothy: “Lukluk gud evritaem long iuseleva and teaching bilong iu. Followim olketa samting hia, bikos wei for duim olsem bae sevem iu and olketa wea lisin long iu.” (1 Timothy 4:16) Tru nao, taem iu teachim nara pipol abaotem Jehovah God, wea wei for duim datwan praisem hem, maet diswan mekem olketa tu savve long Jehovah. Kaen savve olsem fit for lead go long laef olowe for olketa!—John 17:3.
10. Why nao iumi barava laek for praisem God bilong iumi?
10 Narafala reason moa stap for praisem Jehovah. Tingim moa example abaotem fren bilong iu wea garem bigfala savve. Sapos iu herem nara pipol talem laea samting abaotem hem and tok spoelem gudfala fasin bilong hem, waswe, datwan bae mekem iu barava laek for praisem hem? Olsem tu, staka long world talem laea toktok abaotem Jehovah. (John 8:44; Revelation 12:9) Dastawe olketa wea lovem hem barava laek for stretem olketa laea story hia taem olketa talem trufala samting abaotem hem. Waswe, iu tu laek for showimaot hao iu lovem and tinghae long Jehovah, and tu, showim hao iu laekem Hem nao for rulim iu and no main enemy bilong hem, Satan? Iu savve duim evri samting hia taem iu praisem Jehovah. So, next kwestin hem, hao nao iu savve praisem hem?
Wei wea Samfala Young Wan Praisem Jehovah
11. Wanem nao olketa example long Bible wea showimaot hao young pipol savve win saed long wei for praisem Jehovah?
11 Bible hem showimaot hao staka taem olketa young wan win for praisem Jehovah. Wanfala example nao hem wanfala Israelite gele wea olketa bilong Syria tekem hem olsem prisoner. Hem no fraet for witness long woman wea hem waka for hem abaotem Elisha, datfala profet bilong Jehovah. Toktok bilong hem lead go long wanfala mirakol, and datwan barava givim gudfala witness abaotem Jehovah. (2 Kings 5:1-17) Jesus tu hem no fraet for givim witness taem hem pikinini. Masbi Jesus duim staka samting taem hem young, bat Jehovah chus for recordim wanfala samting nomoa, hem nao samting wea happen taem hem 12 year. Hem no fraet for askem kwestin long olketa bigman bilong religion long temple long Jerusalem and mekem olketa sapraes tumas long savve wea hem garem abaotem olketa wei bilong Jehovah.—Luke 2:46-49.
12, 13. (a) Wanem nao Jesus duim long temple no longtaem bifor hem dae, and hao nao diswan affectim pipol wea stap long there? (b) Jesus feel hao taem hem herem praise wea olketa young boy talemaot?
12 Taem hem mature, Jesus encouragem tu olketa pikinini for praisem Jehovah. Olsem example, tu-thri day bifor hem dae, Jesus hem stap long temple long Jerusalem. Bible sei hem duim “olketa nambawan samting” long there. Hem raosem olketa wea mekem datfala holy ples wanfala ples bilong olketa man for steal. Hem healim tu pipol wea blind and cripple. Diswan shud muvim evriwan long there, olketa main wan nao olketa bigman bilong religion, for praisem Jehovah and Son bilong hem, Messiah. Sorre tumas, staka long datfala taem no talemaot praise olsem. Olketa savve God nao sendem Jesus, bat olketa fraetem olketa bigman bilong religion. Nomata olsem, wanfala sekson no fraet for toktok. Waswe, iu savve hu nao olketa? Bible hem sei: “Taem olketa chief priest and scribe lukim olketa nambawan samting wea [Jesus] duim and olketa boy wea singaot olsem long temple: ‘Mifala prea, for Son bilong David mas sev!’ olketa start for kros and sei long hem: ‘Waswe, iu herem samting wea olketa hia talem?’ ”—Matthew 21:15, 16; John 12:42.
13 Olketa priest hia hope Jesus bae talem olketa boy for no praisem hem. Waswe, hem duim datwan? Barava nomoa nao! Jesus ansa olsem: “Ia. Waswe, iufala no readim diswan, ‘From mouth bilong olketa baby and smol pikinini iu mekem praise kamap’?” Tru nao, Jesus and Dadi bilong hem hapi long olketa young wan hia wea talemaot praise. Olketa pikinini hia duim samting wea olketa mature wan nao shud duim. Long tingting bilong olketa, evriting hem klia nomoa. Olketa lukim disfala man hem duim olketa nambawan samting, no fraet and showimaot faith, and garem bigfala love for God and pipol bilong hem. Hem tok tru taem hem sei hem nao datfala “Son bilong David,” datfala Messiah wea profesi storyim. From olketa boy hia garem faith, olketa kasem privilege for fulfillim profesi tu.—Psalm 8:2.
14. Hao nao samting wea olketa young wan garem savve mekem olketa fit for praisem God?
14 Wanem nao iumi savve lanem from olketa example olsem? Olketa young wan savve win long wei for praisem Jehovah. From olketa young, plande taem olketa savve minim truth long klia and simpol wei, and diswan muvim olketa for strong for showimaot faith bilong olketa. Nara samting olketa garem tu Proverbs 20:29 hem storyim, hem sei: “Samting wea mekem olketa young man luk gud tumas hem strong wea olketa garem.” Tru nao, iufala young wan garem strong—samting wea savve barava helpem iufala for praisem Jehovah. Hao nao iufala savve iusim olketa samting hia long gudfala wei?
Hao Nao Iu Savve Praisem Jehovah?
15. For win for praisem Jehovah, wanem samting nao mas muvim iu for duim datwan?
15 For win long wei for praisem God hem samting wea start insaed long heart. Iu kanduit praisem Jehovah long gudfala wei sapos only reason iu duim datwan hem from nara pipol nao laekem iu for duim. Remember, fasfala komandment hem diswan: “Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.” (Matthew 22:37) Waswe, iu savve gud long Jehovah thru long wei wea iuseleva studyim Bible? Stretfala samting wea bae kamaot from wei for lane olsem hem wei wea iu bae garem love for Jehovah. Wei for showimaot datfala love nao hem for praisem hem. Taem samting wea muvim iu hem klia and strong, iu redi nao for barava praisem Jehovah.
16, 17. Hao nao fasin bilong iumi savve praisem Jehovah? Givim example.
16 Bifor iu ting raonem wanem iu bae talem, fastaem ting raonem fasin bilong iu. Sapos datfala Israelite gele long taem bilong Elisha hem no kaen, no showimaot respect, or no honest, waswe, iu tingse olketa bilong Syria wea hem stap witim olketa bae lisin long toktok bilong hem abaotem profet bilong Jehovah? Maet nomoa. Long sem wei tu, pipol maet moa willing for lisin long iu sapos olketa lukim iu showimaot respect, honest, and garem gudfala fasin. (Romans 2:21) Tingim wanfala example.
17 Wanfala gele long Portugal wea 11 year hem kasem hevi long skul for celebratem olketa holiday wea againstim conscience bilong hem wea kasem training from Bible. Long wei wea showimaot respect hem explainim long teacher why hem no savve duim datwan, bat datfala teacher tok spoelem hem. For longfala taem bihaen, datfala teacher gohed for mekem hem feel shame, and tok spoelem religion bilong hem. Nomata olsem, datfala young gele hem gohed for showimaot respect. Staka year bihaen, datfala young sista hem serve olsem wanfala regular pioneer, wea minim wanfala full-taem minister. Long wanfala convention, hem lukluk long pipol wea baptaes and hem luksavve long wanfala long olketa. Hem nao datfala teacher bilong hem! Bihaen tufala holem each other and krae, teacher hia talem hem hao hem nating forgetim fasin bilong hem for showimaot respect. Wanfala Witness go long haos bilong hem and datfala teacher storyim fasin bilong datfala student bilong hem. Tufala startim Bible study, and woman hia acceptim truth insaed Bible. Tru tumas, fasin bilong iu savve barava strongfala wei for praisem Jehovah!
18. Wanem nao wanfala young wan savve duim sapos hem hol bak for startim story abaotem Bible and abaotem Jehovah God?
18 Waswe, samfala taem iu faendem hem hard for startim story long skul abaotem biliv bilong iu? Olketa nara young wan tu garem semkaen feeling. Nomata olsem, iu savve mekem gudfala chance kamap for narawan askem iu abaotem biliv bilong iu. Olsem example, sapos law long ples and skul bilong iu letem, hem gud for tekem olketa Bible pablikeson and readim long lunch taem or long narataem wea fitim. Olketa nara student maet askem iu wanem nao iu readim. Taem iu ansarem olketa and storyim interesting samting abaotem article or buk wea iu readim, maet seknomoa iu gohed storyim biliv bilong iu nao. Remember for askem olketa kwestin for faendemaot biliv bilong olketa student wea iu story witim. Showimaot respect long wei for lisin, and talem samting iu lanem from Bible long olketa. Olsem olketa experience long page 29 showimaot, staka young pipol gohed for praisem God long skul. Diswan mekem olketa kasem bigfala hapi and hem helpem staka narawan for savve long Jehovah.
19. Hao nao olketa young wan savve kamap moabeta long haos-tu-haos ministry?
19 Wei for duim haos-tu-haos ministry hem best wei for praisem Jehovah. Sapos iu no join insaed ministry yet, trae for putim datwan olsem goal bilong iu. Sapos iu join insaed finis, waswe, iu savve markem samfala nara goal for iuseleva? Olsem example, winim wei for talem sem toktok long each haos, trae for kamap moabeta long wei for askem parents bilong iu and olketa narawan wea garem savve for olketa gudfala idea. Lane hao for iusim Bible long wei wea moabeta, duim gudfala return visit, and for startim Bible study. (1 Timothy 4:15) Taem iu gohed for praisem Jehovah long olketa wei olsem, bae iu kamap moabeta long wei for duim datwan, and bae iu kasem moa hapi long ministry.
Wanem Taem Nao Iu Shud Start for Praisem Jehovah?
20. Why nao olketa young wan shud no ting olketa young tumas for praisem Jehovah?
20 Long thrifala kwestin wea iumi storyim, ansa for disfala mek-thri kwestin hem moa simpol winim nara tufala wea iumi ansarem finis. Lukim ansa wea Bible talem: “So, rememberim Nambawan Creator bilong iu taem iu young yet.” (Ecclesiastes 12:1) Tru nao, distaem nao hem taem for start praisem Jehovah. Hem isi tumas for sei: “Mi no savve praisem Jehovah bikos mi young tumas. Mi no garem savve. Mi shud weit for taem mi big.” Samfala long bifor kam tu feel olsem. Olsem example, taem profet Jeremiah young, hem sei olsem long Jehovah: “O Sovereign Lord Jehovah! Mi no savve hao for toktok, from mi wanfala boy nomoa.” Jehovah encouragem hem for no fraet. (Jeremiah 1:6, 7) Olsem tu, iumi no need for fraetem eni samting taem iumi praisem Jehovah. Nomata eni nogud samting happen long iumi, Jehovah savve aotem datwan bihaen.—Psalm 118:6.
21, 22. Hao nao olketa young wan wea praisem Jehovah olketa olsem dew drop, and why nao datwan encouragem olketa?
21 So, mifala encouragem iufala olketa young wan: No hol bak for praisem Jehovah! Distaem, taem iu young yet hem best taem for join insaed long waka wea moa important winim evri nara waka long earth distaem. Taem iu duim datwan, iu kamap part long wanfala nambawan samting—sekson long heven and earth wea gohed for praisem Jehovah. Jehovah hapi tumas from iu insaed disfala sekson. Lukim disfala toktok wea holy spirit muvim man wea raetem psalm for talem long Jehovah: “Pipol bilong iu bae willing for givim olketa seleva long day bilong iu for faet. Long nambawan holy fasin, from taem hem klosap daylaet, iu garem olketa youngfala man bilong iu wea olsem olketa dew drop.”—Psalm 110:3.
22 Taem iu lukim dew drop long early morning, olketa luk naes fogud! Taem iumi lukim iumi feel gud from olketa braet, shaen, and staka fogud. Hem nao wei wea Jehovah lukim iufala olketa young wan wea faithful for praisem hem long olketa hardfala taem distaem. For sure, wei wea iu chus for praisem Jehovah hem mekem heart bilong hem hapi. (Proverbs 27:11) So olketa young wan, gohed for praisem Jehovah!
Hao Nao Bae Iu Ansa?
• Wanem nao samfala important reason for praisem Jehovah?
• Wanem nao samfala Bible example wea showimaot hao young pipol savve win for praisem Jehovah?
• Hao nao olketa young wan savve praisem Jehovah distaem?
• Wanem taem nao olketa young wan shud start for praisem Jehovah, and why nao olsem?
[Olketa Piksa long page 25]
Sapos fren bilong iu hem savve tumas for duim wanfala samting, waswe, bae iu storyim diswan long nara pipol?
[Piksa long page 27]
Olketa nara student maet interest long olketa biliv bilong iu
[Piksa long page 28]
Sapos iu laek for kamap moabeta long ministry, askem wanfala Witness wea garem savve for olketa gudfala idea