Trufala Teaching—Wea Nao Iu Savve Faendem?
WANFALA man long Tibet hem spinim raon wanfala prea wheel wea hem raetem olketa prea and putim insaed. Hem biliv each taem wheel hia tan raon, olketa prea bilong hem gohed. Long wanfala big haos long India, olketa markem wanfala smol rum for duim puja—wei for worshipim plande difren kaen god and woman god thru long wei for givim sakrifaes olsem incense, flaoa, and olketa nara samting. Insaed wanfala church long Italy, wanfala woman nildaon front long image bilong Mary, mami bilong Jesus, and holem wanfala rosary bead taem hem prea.
Maet iuseleva lukim hao religion affectim laef bilong pipol. The World’s Religions—Understanding the Living Faiths, hem sei: “Religion . . . hem main important samting long olketa community evriwea long world from bifor kam and distaem tu.” Long datfala buk, God—A Brief History, wea John Bowker raetem, hem sei: “Long full history bilong man, God hem barava important part long living bilong evri difren kaen pipol long earth, and plande taem olketa biliv hem nao wakem or kontrolem full universe. Diswan hem barava tru nomata long pipol wea chus for no biliv long God and wea trae hard for no mixim politik and religion.”
Tru nao, religion affectim laef bilong plande million pipol. Diswan hem strongfala pruv hao man garem spiritual need and feeling for laek satisfaem datwan! Long buk bilong hem, The Undiscovered Self, Doctor Carl G. Jung, wea garem bignem saed long medicine, hem storyim hao man garem need for worshipim samting wea moa hae and hem sei “diswan hem showaot klia long full history bilong olketa man.”
Nomata olsem, plande pipol sei olketa no biliv long God and no interest long religion. From religion bilong olketa hem fail for provaedem spiritual need bilong olketa, samfala daotem or denyim hao God stap. Bat klosap evriwan, nomata olketa wea no biliv God hem stap, olketa followim samfala principle wea olketa tingse hem stret, and datwan kamap religion bilong olketa.
Insaed plande thousand year wea go pas, wei wea man trae for satisfaem spiritual need bilong hem, mekem man traem plande difren kaen religion. From datwan, staka-maka-staka difren kaen religion nao stap evriwea long world. Olsem example, klosap evri religion biliv long samting wea moa hae, bat evriwan garem difren tingting abaotem datfala samting. Plande religion tu mekhae long wei for kasem salvation. Bat olketa garem difren biliv saed long datfala salvation and hao for kasem. From plande difren religion stap, hao nao bae iumi luksavve long trufala teaching wea God hapi long hem?