Oldfala German Bible Iusim Nem Bilong God
LONG 1971 olketa wakem New World Translation of the Holy Scriptures long German languis wea garem nem bilong God, Jehovah, winim 7,000 taem.a Nomata olsem, diswan hem no fasfala German Bible wea garem nem bilong God. Samting olsem 500 year go finis, luk olsem Johann Eck, wanfala savveman bilong Roman Catholic nao mekem fasfala Bible long German languis wea garem nem Jehovah.
Johann Eck hem born long 1486 long south Germany. Start taem hem 24 year, hem kamap savveman saed long religion long university long Ingolstadt go kasem taem hem dae long 1543. Eck and Martin Luther tufala fren for lelebet taem. Bat gogo, Luther kamap leader bilong olketa wea againstim samfala teaching bilong Roman Catholic and Eck hem sapotim Catholic Church.
Bigman long Bavaria markem Eck for transleitim Bible long German languis, and olketa printim long 1537. Wanfala buk, Kirchliches Handlexikon sei datfala transleison hem barava followim fasfala languis wea olketa raetem long Bible and pipol “shud tinghae long hem.” Eck hem transleitim Exodus 6:3 olsem: “Mi nao Lord, wea mi showim miseleva long Abraam, Isaac, and Jacob olsem Olmaeti God: and nem bilong mi Adonai, mi nating talem long olketa.” Eck raetem moa wanfala smol toktok for disfala verse olsem: “Datfala nem Adonai Jehoua.” Staka Bible savveman tingse diswan hem fastaem wea wanfala Bible long German languis iusim nem bilong God.
Bat, pipol savve long nem bilong God and iusim for staka thousand year finis. Hebrew nao hem fasfala languis wea olketa raetem “Jehovah” long hem for showimaot hem nao datfala only trufala God. (Deuteronomy 6:4) And tu, klosap 2,000 year go finis, toktok bilong Jesus for mekem evriwan savve long nem bilong God hem stap long Greek languis. (John 17:6) Kam kasem distaem olketa printim datfala nem long staka languis nao, and taem Psalm 83:18 fulfill, evriwan bae savve datwan wea nem bilong hem Jehovah nao hem Most Hae ovarem full earth.
[Footnote]
a Olketa Jehovah Witness wakem disfala Bible long English, long 1961. Distaem olketa wakem full Bible and haf long hem long winim 50-fala nara languis.
[Piksa long page 32]
Wanfala 1558 Bible bilong Eck and smol toktok wea showimaot nem Jehovah long Exodus 6:3