Hem Barava Important for Minim Olketa Saen!
“Firstaem, mi tingse boy bilong mi Andreas hem hed soa nomoa. Bat gogo, hem no laek kaikai and hem fever tumas. Hed bilong hem gohed for soa fogud, and mi wari nao. Taem hasband bilong mi kam bak, mitufala tekem Andreas go long doctor. Doctor lukluk long Andreas then kwiktaem hem sendem hem for admit long hospital. Andreas hem no hed soa nating. Hem garem wanfala sik wea olketa kolem meningitis. Olketa givim hem treatment and no longtaem bihaen hem kamap gud.” —Gertrud, wanfala mami from Germany.
FOR sure plande mami and dadi feisim semkaen problem olsem Gertrud. Olketa lukim olketa saen wea showimaot pikinini bilong olketa maet sik. Nomata samfala sik hem no big tumas, sapos dadi and mami no duim samting taem olketa lukim pikinini hem sik, sorre samting savve kamap. Wei for lukluk long olketa saen and duim samting followim datwan, savve sevem laef. Diswan hem wanfala serious samting.
Olketa saen no helpem man saed long health nomoa, bat, hem helpem man long staka nara wei tu. Wanfala example, hem datfala tsunami disaster wea kasem olketa ples wea stap raonem Indian Ocean long December 2004. Olketa organization wea waka for gavman long olketa ples olsem Australia and Hawaii, olketa savve taem datfala big earthquake hem happen long north Sumatra and olketa savve hao samting wea savve kamap from datwan hem danger tumas. Bat, no eni wei stap for olketa givim warning long pipol wea stap long danger. From datwan, winim 220,000 pipol nao dae.
Olketa Saen wea Barava Moa Important
Taem Jesus Christ stap long earth, hem teachim olketa wea lisin long hem wanfala leson saed long wei for luksavve and followim olketa saen. Samting wea hem tok abaotem hem barava important. Bible hem sei: “Olketa Pharisee and Sadducee kam long hem and olketa laek testim hem, so olketa askem hem for showim olketa wanfala saen from heven. So hem ansarem olketa and sei: ‘Taem hem evening iufala savve sei, “Bae hem no rain, bikos skae hem red”; and long morning, “Bae hem wind and rain tuday, bikos skae hem red bat luk dark tu.” Iufala savve hao for minim lukluk bilong skae, bat iufala no savve hao for minim olketa saen wea showimaot olketa samting wea happen distaem.’ ”—Matthew 16:1-3.
Taem Jesus talem disfala toktok, “olketa saen wea showimaot olketa samting wea happen distaem,” olketa Jew shud savve hao olketa stap insaed taem wea hem important for olketa duim samting kwiktaem. Evri samting saed long olketa Jew long datfala taem hem klosap for finis and datwan bae affectim evriwan long olketa. Tu-thri day bifor Jesus dae, hem talem olketa disaepol bilong hem abaotem narafala saen. Diswan hem saen for showimaot hem bae stap moa. Samting wea hem talem long datfala taem hem barava important for evriwan distaem.