Kasem Gud Samting From Best Education!

BIBLE sei Jehovah God nao creatim evri samting, and olketa man tu. (Genesis 1:27; Revelation 4:11) From hem Nambawan Teacher, hem teachim firstfala man and woman, Adam and Eve, and redim tufala for stap insaed long naesfala garden long Eden. Plan bilong hem for teachim and lukaftarem tufala for olowe. (Genesis 1:28, 29; 2:15-17; Isaiah 30:20, 21) Datwan hem nambawan samting!

Bat sorre tumas, firstfala man and woman lusim evri samting hia. Wei wea tufala no obey hem spoelem fasin and body bilong olketa man. (Genesis 3:17-19; Romans 5:12) Taem Bible story abaotem pipol wea stap long taem bilong Noah, hem sei: “Jehovah hem lukim hao nogud fasin bilong man hem big tumas long earth and evri feeling and tingting wea kam from heart bilong man, hem nogud evritaem.”—Genesis 6:5.

Distaem hem klosap 4,500 year go finis bihaen Jehovah sei tingting bilong olketa man hem nogud evritaem, bat living bilong olketa man hem worse winim enitaem bifor. Staka pipol steal, attakim nara pipol, or no shame for laea. Olketa problem kamap big evriday, bat long semtaem, wei for tingim nara pipol hem gogo daon. Plande problem insaed famili midolwan hasband and waef, dadi and mami, and olketa pikinini kamap big tumas, and midolwan nara pipol tu. Bat, hem no rong bilong God nao laef distaem hem nogud olsem, and nara samting tu, datwan no minim hem no wari nomoa long olketa problem wea gohed distaem. Start kam from bifor Jehovah hem interest tumas long living bilong olketa man, and hem redi for teachim olketa wea luk long hem for leadim olketa for kasem hapi laef. Samting olsem 2,000 year go finis, hem sendem Son bilong hem Jesus Christ long earth for showimaot wei wea Hem laek tumas for teachim pipol wea laek for stap gud. Jesus showimaot perfect example long wei for teach bikos for staka billion year, datfala Nambawan Teacher nao teachim hem.

Trufala Christian Wei —Teachim Staka Samting

Love nao faondeson bilong trufala Christian Wei wea Jesus Christ teachim. Evri tingting and samting wea pipol wea followim trufala Christian Wei duim mas fitim will bilong God, and goal bilong olketa hem for mekem nem bilong hem kasem honor and glory. (Matthew 22:37-39; Hebrews 10:7) Jehovah, Dadi bilong Jesus nao bihaenem olketa teaching bilong Jesus. John 8:29 hem showim wei wea God sapotim Jesus. Hem sei: “Man wea sendem mi hem stap witim mi; hem no lusim mi, bikos mi evritaem duim olketa samting wea mekem hem hapi.” Tru tumas, Dadi bilong Jesus sapotim and leadim hem long ministry bilong hem. Olketa follower bilong Jesus garem samting for leadim olketa long olketa hard samting wea kamap long laef. Jehovah teachim olketa thru long Son bilong hem. Wei for followim olketa teaching and example bilong Jesus hem mekem fasin bilong olketa kamap moabeta. Datwan semsem tu witim olketa disaepol bilong hem distaem.—Lukim box “Wei wea Jesus and Olketa Teaching Bilong Hem Garem Paoa,” long page 6.

Wanfala spesol part bilong trufala Christian Wei hem teaching wea affectim mind and heart wea changem fasin bilong pipol. (Ephesians 4:23, 24) Wanfala example, tingim samting wea Jesus teachim abaotem wei for faithful long marit partner: “Iufala herem datfala teaching wea sei, ‘Iufala mas no duim adultery.’ Bat mi talem long iufala, eniwan wea gohed lukluk long wanfala woman for barava laekem hem, hem duim adultery finis witim hem insaed long heart bilong hem.” (Matthew 5:27, 28) Long hia Jesus teachim olketa disaepol bilong hem hao heart bilong olketa shud klin and nomata man no duim eni samting yet, rong tingting and feeling savve lead go long samfala big problem. Waswe, hem tru hao nogud tingting savve muvim man for duim samting wea mekem God feel nogud and wea spoelem nara pipol?

Dastawe Bible givim disfala kaonsel: “Finis for followim disfala world, bat kamap difren evribit from iufala changem tingting bilong iufala, mekem iufala savve pruvim long iufala seleva, gudfala and stretfala and perfect will bilong God.” (Romans 12:2) Maet iu ask olsem: ‘Waswe, teaching bilong God savve really changem tingting bilong man?’ Diswan minim for forcem mind for tingim difren samting long wei for fulimap witim olketa principle and instruction wea stap insaed Word Bilong God. Man savve duim diswan sapos hem acceptim teaching wea kam from God insaed long Word bilong hem.

Muvim Man for Change

“Word bilong God hem laef and garem paoa for duim samting.” (Hebrews 4:12) From Bible hem still barava affectim pipol, diswan showimaot hem fitim distaem tu. Hem savve muvim man for changem wei bilong hem, kamap wanfala tru Christian, and mekem fasin bilong hem kamap moabeta. Olketa example long daon showimaot gudfala samting wea man kasem from wanem Bible teachim.

Emilia, wea iumi storyim long firstfala article hem sei: “For miseleva nomoa duim samting hem no inaf for mekem famili laef bilong mi kamap moabeta. Taem mi start for studyim Bible witim Olketa Jehovah’s Witness, mi luksavve hope hem stap and tingting bilong mi start for change. Mi lane for patient and no kwiktaem for kros. Gogo hasband bilong mi tu study. Hem no isi for hem stop for drink, bat gogo hem stop. Diswan mekem nara chance kamap for mitufala trae moa for keepim marit bilong mifala. Distaem mitufala hapi Christian wea teachim olketa pikinini bilong mifala olketa nambawan Bible principle.”—Deuteronomy 6:7.

Education wea iumi olketa tru Christian kasem savve mekem man stap klia long nogud and dirty fasin. Diswan nao samting wea really happen long Manuel.a Taem hem 13 year, hem ranawe from haos bilong hem and start for smokem marijuana. Gogo, hem start for iusim heroin. Hem durong witim olketa nara man and woman for kasem selen and ples for stap. Samfala taem Manuel kasem samting hem needim long wei for attakim pipol and stealim selen bilong olketa. Klosap evritaem hem iusim drug. Raf fasin bilong hem mekem hem go long prison staka taem. Wantaem hem stap long prison for fofala year, and taem hem long there hem baem and salem olketa weapon. Bihaen Manuel marit, hem kasem yet nogud samting wea kamaot from kaen laef bilong hem. Hem sei: “Gogo mifala stap insaed long haos wea bifor hem haos bilong olketa kokorako. Mi remember hao waef bilong mi no garem eni gud ples for kuki. Living bilong mifala nogud tumas gogo olketa relative bilong mi tu bat encouragem waef bilong mi for lusim mi.”

Wanem nao changem laef bilong hem? Manuel ansa olsem: “Wanfala man wea mifala savve long hem savve kam long haos for story abaotem Bible. Mi letem hem bikos mi laek showim hem hao no eni God stap wea interest long pipol. Laef bilong mi nao pruvim datwan. Mi sapraes long wei wea datfala Witness hem patient and showimaot respect, so mi agree for go long olketa meeting long Kingdom Hall. Nomata samfala long there savve long wanem kaen man nao mi, olketa welkamim mi. Olketa mekem mi feel olsem mi wanfala long olketa. Diswan barava comfortim mi and muvim mi for lusim wei for iusim olketa drug and for faendem wanfala waka wea fitim law. Fofala month bihaen mi start for studyim Bible, mi kamap fit for join insaed waka for preach, and fofala month bihaen datwan, mi baptaes olsem wanfala Jehovah’s Witness.”

Hao nao trufala Christian Wei hem helpem Manuel and famili bilong hem? “Sapos mi no kasem disfala Bible education, mi dae finis longtaem. Teaching bilong Jesus mekem mi kasem bak famili bilong mi. Son and dota bilong mi no need for kasem wanem mi kasem taem mi young. Mi feel praod and thankiu tumas long Jehovah for gudfala wei for fren wea mi and waef bilong mi garem. Samfala pipol wea mi savve long olketa bifor praisem mi and sei samting mi duim distaem hem nao best samting.”

Long Christian living, wei for klin saed long fasin mas join witim wei for klin long body. John, wea stap long wanfala poor area long South Africa hem lanem datwan. Hem sei: “Samfala taem dota bilong mifala no savve swim for wanfala week, and no eniwan long mifala warim hem.” Waef bilong hem sei haos bilong olketa savve dirty fogud. Bat taem olketa kasem Christian education, laef hem change. John no joinim moa wanfala sekson for stealim olketa car and hem start for lukaftarem famili bilong hem. “Mifala lanem hao wei for olsem Christian, hem minim mifala shud keepim body and kaleko bilong mifala klin. Mi laekem toktok long 1 Peter 1:16 wea encouragem iumi for holy bikos Jehovah God hem holy. Distaem mifala trae for mekem smol haos bilong mifala luk naes.”

Iu Savve Faendem Best Education

Staka experience olsem stap. Staka thousand pipol garem laef wea moabeta bikos long Bible education. From olketa honest and waka hard, boss bilong olketa tinghae long olketa. Olketa kamap gudfala neiba and fren, bikos olketa interest long nara pipol. Wei wea olketa disaed strong for stap klia from olketa nogud fasin and samting wea body laekem hem mekem olketa lukaftarem health bilong olketa saed long body, mind, and feeling. Olketa no westem strong bilong olketa for duim nogud samting, bat iusim for kasem gudfala samting for famili bilong olketa and for olketa seleva. (1 Corinthians 6:9-11; Colossians 3:18-23) For sure gud samting wea kamaot from wei for followim samting wea Jehovah markem insaed Bible, hem showimaot living wea followim trufala Christian Wei hem best wei, and hem best education wea man savve kasem. Bible sei olsem abaotem man wea garem laef wea followim olketa law bilong God: “Bae hem win long evri samting wea hem duim.”—Psalm 1:3.

Iumi barava feel hapi for savve hao Olmaeti God, Jehovah, hem willing for teachim iumi. Hem sei olsem abaotem hemseleva: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva, Datwan wea mekem iufala followim road wea iufala mas wakabaot long hem.” (Isaiah 48:17) Tru tumas, thru long example and olketa teaching bilong Son bilong hem, Jesus Christ, Jehovah showim iumi stretfala wei for followim. Olketa teaching bilong Jesus helpem staka wea savve long hem taem hem stap long earth, and tu, staka wea followim olketa teaching bilong hem distaem. Waswe sapos iu markem taem for lanem moa samting abaotem olketa teaching hia? Olketa Jehovah’s Witness wea stap klosap long iu bae hapi for helpem iu for kasem nambawan education olsem.

[Footnote]

[Box/Piksa long page 6]

Wei wea Jesus and Olketa Teaching Bilong Hem Garem Paoa

Zacchaeus kamap rich taem hem iusim position bilong hem olsem main man for kolektem tax for forcem pipol for givim selen. Bat hem changem wei bilong hem taem hem followim olketa teaching bilong Jesus.—Luke 19:1-10.

Saul bilong Tarsus stop for persecutim olketa Christian and kamap wanfala Christian, wea gogo hem nao aposol Paul.—Acts 22:6-21; Philippians 3:4-9.

Long firstaem samfala Christian long Corinth olketa pipol for duim ‘fornication, worshipim idol, duim adultery, homosexual fasin, steal, greedy, drunk, tok againstim narawan, and forcem narawan for givim selen.’ Bat, taem olketa lane abaotem trufala Christian Wei, olketa ‘kamap klin, holy, and raeteous long nem bilong Lord Jesus Christ.’—1 Corinthians 6:9-11.

[Piksa long page 7]

Bible savve showim iu hao for kasem gud laef