Samting wea Showimaot Love, Faith, and Fasin for Obey

MORNING long May 16, 2005, long olketa Watchtower Farm long Wallkill, New York, hem cold and naes fogud. Grass and flaoa wea olketa keepim gud hem shaen from lelebet rain wea foldaon long naet. Wanfala duck and eitfala smol wan float antap long kwaet wata saed long wanfala pool. Olketa wea visit kam sapraes fogud long datfala ples. Olketa no story big, luk olsem olketa tingse bae olketa spoelem wei wea datfala morning hem kwaet.

Olketa Jehovah’s Witness nao visit kam and olketa kam from 48 kantri. Bat olketa no kam for lukluk long datfala ples nomoa. Samting olketa interest long hem nao insaed wanfala big building wea olketa wakem long red brik. Disfala niu building hem part bilong United States Bethel long Wallkill. Taem olketa go insaed datfala building olketa barava sapraes tu, nomata hem nating kwaet.

Olketa visitor luk go daon long staka machine. Faevfala maeti press (machine for print) stap long cement floor wea shaen and big winim 6-fala Lawson Tama soccer field. Diswan nao ples for printim olketa Bible, buk, and magasin. Olketa big rol pepa wea hevi bilong wanfala hem 1,700 kilogram, spin olsem wheel bilong wanfala trak wea speed tumas. Long bilong wanfala rol pepa hem 23,000 meter and hem go thru long disfala press insaed 25 minute nomoa. Insaed 25 minute hia, press hem print and draem ink and mekem pepa cold for hem savve foldim for kamap olketa magasin. Nara samting karem olketa magasin and putim insaed olketa case for sendem go long olketa kongregeson. Olketa nara press gohed for printim olketa page for mekem buk, wea olketa muvim kwiktaem go for hipimap long wanfala ples for keepim olketa go kasem taem olketa muvim go long bindery wea hem ples for mekem buk. Computer nao kontrolem evri samting hia for waka gud tugeta long semtaem.

Olketa visitor lusim ples for print and go insaed bindery. Olketa machine long hia wakem olketa buk wea garem strong kava and olketa deluxe Bible, samfala taem olketa wakem 50,000 buk long wanfala day. Evri page wea olketa printim finis, machine hipimap followim order, putim tugeta, and katem saed bilong olketa. Then hem putim kava long olketa page hia. Olketa buk wea redi finis go stret insaed long case. Machine hem satem case, putim nem and address, and putim witim olketa nara case redi for man kam tekem. Narafala ples tu hem for wakem olketa buk wea garem soft kava wea olketa machine savve putim samting olsem 100,000 buk insaed olketa box long wanfala day. Staka machine tu long hia—olketa motor, olketa samting for karekare seleva, olketa gear, olketa wheel, and olketa belt—evri samting barava muv fast tumas taem olketa mekem Bible literature.

Olketa barava niu kaen machine hia wea fast tumas and waka gud tugeta, hem mekem man barava sapraes. And tu, iumi bae lukim hao diswan hem showimaot pipol bilong God garem love, faith, and fasin for obey. Bat, why nao olketa muvim printing waka from Brooklyn, New York, go long Wallkill?

Wanfala main reason hem for mekem printing waka and waka for sendem olketa buk and magasin hem isi. For duim datwan, evri waka mas kamap long wanfala ples nomoa. For staka year nao olketa printim buk and sendem from Brooklyn, and olketa printim and sendem magasin from Wallkill. For duim evri waka long wanfala ples bae katem daon haomas pipol for waka, and diswan mekem olketa savve iusim selen from contribution for waka bilong God long samfala nara samting. And tu, olketa baem tufala niu MAN Roland Lithoman press from Germany bikos olketa press long Brooklyn old nao. Tufala press hia barava big tumas winim printery wea hem factory for wakem buk and magasin long Brooklyn.

Jehovah Sapotim Datfala Waka

Goal bilong printing hia hem for spredim gud nius abaotem Kingdom bilong God. Wei wea Jehovah blessim datfala waka hem showaot klia from taem wea disfala printing hem start. From 1879 go kasem 1922, samfala company nao printim evri buk bilong iumi. Long 1922, olketa rentim wanfala six-story building long 18 Concord Street long Brooklyn and baem machine for printim olketa buk. Long datfala taem, samfala daotem wei wea olketa brata fit for duim datfala waka.

Wanfala long olketa wea daot hem president bilong company wea printim staka long olketa buk bilong iumi. Taem hem visitim printery long Concord Street, hem sei: “Iufala garem olketa barava naes machine for print, bat no eniwan long disfala ples savve hao for iusim olketa. Evri samting bae brekdaon insaed sixfala month nomoa; and bae iufala savve hao pipol wea fit for printim buk bilong iufala nao hem pipol wea duim datwan firstaem wea bisnis bilong olketa nao for printim buk.”

Robert J. Martin, overseer bilong printery long datfala taem hem sei: “Datwan hem here stret lelebet, bat hem no tingim sapot bilong Lord, wea hem stap witim mifala evritaem. . . . No longtaem bihaen datwan mifala mekem olketa buk.” Insaed 80 year bihaen, Olketa Jehovah’ Witness printim staka billion difren literature long olketa printing press bilong olketa seleva.

Then long October 5, 2002, long meeting bilong Watch Tower Bible and Tract Society of Pennsylvania wea savve kamap wanfala taem evri year, olketa talemaot hao Governing Body hem appruvim wei for muvim printing waka bilong United States branch go long Wallkill. Olketa orderim tufala niu press wea olketa expectim for arrive long February 2004. Olketa brata mas planim and mekem printery for kamap moa big and mas redi for olketa niu press hia insaed 15 month. Then, insaed naenfala month bihaen datwan, olketa mas redim niu bindery and ples for hipimap evri pablikeson for sendem aot. Taem samfala herem, maet olketa daotem evri samting bae redi long olketa date hia—luk olsem hem hard for olketa duim datwan. Bat, olketa brata savve Jehovah bae blessim diswan and olketa waka hia bae hem finis long date olketa markem.

“Evriwan Hapi for Waka Tugeta”

Olketa brata startim datfala project from olketa savve pipol bilong Jehovah bae willing for givim olketa seleva. (Psalm 110:3) From waka hem big tumas, hem needim staka man winim olketa wakman bilong olketa department bilong construction long Bethel. Winim 1,000 brata and sista wea savve for build from United States and Canada, willing for waka for wan week or go kasem thri month long wanfala temporary volunteer program. Olketa narawan from international servant program and volunteer program kasem invitation for waka long datfala project. Olketa Regional Building Komiti barava help tu.

Staka wea volunteer long Wallkill project need for spendem staka selen for travel and lusim waka bilong olketa for selen for lelebet taem. Nomata olsem, olketa hapi tumas for mekem olketa sakrifaes olsem. Olketa long Bethel famili garem chance for help long datfala project thru long wei for lukaftarem and feedim olketa volunteer. Winim 535 member bilong Bethel famili long Brooklyn, Patterson, and Wallkill waka long datfala project evri Saturday, nomata olketa duim normal assignment bilong olketa tu. Bigfala sapot bilong pipol bilong God for disfala important waka hem kamap bikos Jehovah hem sapotim datfala project.

Samfala givim help saed long selen. For example, olketa brata kasem wanfala leta from Abby wea hem naen year. Hem raet olsem: “Mi barava hapi tumas long evri waka wea iufala duim for mekem olketa naes buk. Maet mi klosap for kam. Dadi sei next year! Bae mi werem badge card mekem iufala luksavve long mi. Diswan hem 20 [US] dollar for datfala niu press. Hem selen bilong mi wea dadi and mami givim, bat mi laek givim for iufala olketa brata.”

Wanfala sista raet olsem: “Plis acceptim olketa crochet hat hia, hem present bilong mi wea miseleva nao wakem. Mi laek for givim olketa hat hia for olketa wea waka long Wallkill project. Wanfala buk sei dis year cold season bae barava cold tumas. Maet olketa tok tru or nomoa, mi no savve tu. Bat mi savve klosap evri waka long Wallkill bae long aotsaed, and mi wantem olketa brata and sista bilong mi for protectim hed bilong olketa from cold. Mi no garem savve wea olketa brata lukaotem, bat mi savve crochet, so mi disaed for iusim disfala savve for help long wei wea mi fit for duim.” Hem sendem kam 106 crochet hat!

Datfala printery hem finis long barava taem wea olketa markem. Overseer bilong printery, John Larson sei: “Evriwan hapi for waka tugeta. Hu nao savve daotem hao Jehovah hem blessim disfala waka? Evri samting barava muv kwiktaem tumas. Mi remember long May 2003, mi standap insaed mud and lukluk taem olketa brata wakem faondeson bilong disfala building. No wan year yet bihaen, mi standap long sem ples and lukluk long press gohed for print.”

Dedication Program

Program for dedicatem datfala niu printery, witim thrifala nara building for accommodation, kamap long Wallkill long Monday, May 16, 2005. Bethel long Patterson, Brooklyn, and Canada Bethel tu, iusim video for lukluk and lisin long datfala program. Namba bilong olketa wea barava enjoyim datfala program hem 6,049. Theodore Jaracz, wanfala member bilong Governing Body bilong Olketa Jehovah’s Witness hem chairman and hem story lelebet abaotem history bilong printing waka. Tufala Branch Komiti member, John Larson and John Kikot showim video and interviewim samfala brata abaotem history bilong datfala construction project and printing waka long United States. John Barr, nara member bilong Governing Body givim last tok for dedicatem datfala niu printery and thrifala nara building for accommodation long Jehovah God.

Insaed week bihaen, olketa Bethelite from Patterson and Brooklyn kasem chance for tour insaed datfala niu printery. Evriwan wea visit long datfala taem hem 5,920.

Hao Nao Iumi Ting Long Disfala Printery?

Long tok for dedicatem olketa building hia, Brother Barr remindim evriwan wea lisin long hem hao nomata disfala printery hem spesol, hem no olketa machine nao wea mekem disfala printery for important. Samting wea important nao hem pipol. Pipol kasem gud samting long laef bilong olketa from literature wea iumi printim.

Wanfala long olketa niu press hia savve printim wan million tract insaed samting olsem wan hour nomoa! Nomata olsem, wanfala tract nomoa savve barava affectim laef bilong wanfala man. Example nao, long 1921, olketa man for repairim road bilong train long South Africa, waka followim part bilong wanfala road long there. Wanfala long olketa, wea nem bilong hem Christiaan, lukim wanfala pis pepa andanit long wanfala iron bilong datfala road. Datfala pepa hem wanfala tract bilong iumi. Christiaan readim and hem barava laekem tumas. Hem ran go long son-in-law bilong hem and hem barava hapi and sei: “Tuday mi faendem truth nao!” No longtaem bihaen, tufala raet for askem samfala information moa. Branch long South Africa sendem go samfala Bible literature. Tufala man hia study, baptaes, and sharem truth from Bible witim nara pipol. Gogo, staka nao acceptim truth. Kasem tu-thri year bihaen year 1990, winim wan handred pikinini and granpikinini bilong tufala nao kamap olketa Witness bilong Jehovah. Evri samting hia kamap nomoa from wanfala man faendem wanfala tract long road bilong train!

Brother Barr sei literature wea iumi printim helpem pipol for kam insaed truth, keepim olketa insaed truth, muvim olketa for serve witim moa strong, and mekem olketa brata and sista garem wan mind. Winim evri samting, literature, wea iumi share for givimaot, givim glory long God bilong iumi, Jehovah!

Hao Nao Jehovah Ting Long Disfala Printery?

Brother Barr askem audience tu for tingim wanem nao tingting bilong Jehovah abaotem disfala printery. Jehovah no need for depend long datwan. Hem savve mekem ston for preachim gud nius! (Luke 19:40) And tu, hem nating ting long disfala machine olsem hem spesol, nomata hem speed, size bilong hem big, garem staka didifren part, or wei wea hem savve duim evri samting seleva. Hem nao creatim universe! (Psalm 147:10, 11) Jehovah savve long staka wei for mekem literature wea moabeta, olketa wei wea no eni man planim or tingim yet. So, wanem nao Jehovah lukim wea hem barava tinghae long hem? Tru tumas, taem hem lukim disfala printery hem lukim olketa nambawan fasin bilong pipol bilong hem—love, faith, and fasin for obey.

For showimaot hao love hem insaed long diswan, Brata Barr iusim disfala tokpiksa. Wanfala gele wakem wanfala cake for parents bilong hem. Luk olsem mami and dadi bae barava hapi tumas. Tru nao, nomata datfala cake bae gud or nomoa, samting wea mekem mami and dadi hapi hem love bilong pikinini bilong tufala, wea showaot long wei wea hem duim datwan. Long sem wei tu, taem Jehovah luk long disfala niu printery, hem no lukim nomoa building and olketa machine. Main samting hem lukim nao, hem love wea iumi showimaot for nem bilong hem.—Hebrews 6:10.

And tu, long sem wei wea Jehovah ting long ark olsem samting wea showimaot faith bilong Noah, hem ting long disfala printery olsem kliafala pruv wea showimaot faith bilong iumi. Faith long wanem? Noah garem faith hao samting wea Jehovah talem bae hem happen. Iumi garem faith hao iumi stap long olketa last day, hao gud nius nao barava important message for talemaot evriwea long earth, and hao hem important for evriwan mas herem. Iumi savve message bilong Bible savve sevem laef.—Romans 10:13, 14.

Iumi sure Jehovah ting long printery olsem samting wea showimaot iumi obey. Olsem iumi savve finis, will bilong hem nao for gud nius mas kasem evriwea long world bifor end hem kam. (Matthew 24:14) Disfala printery and olketa narawan long samfala part long world, bae sapotim wei wea datfala waka hem fulfill.

Hem tru, love, faith, and fasin for obey wea showaot long wei for kasem inaf selen, for build, and keepim evriting hia for waka gud hem showaot tu long strong bilong pipol bilong Jehovah evriwea taem olketa gohed for talemaot truth long evriwan wea willing for herem.

[Box/Olketa Piksa long page 11]

PRINTING WAKA LONG UNITED STATES HEM KAMAP MOA BIG

1920: Firstfala rotary press printim olketa magasin long 35 Myrtle Avenue, Brooklyn.

1922: Printery muv go long wanfala six-story building long 18 Concord Street. Olketa start for printim olketa buk.

1927: Olketa muvim printery go long wanfala niu building wea olketa wakem long 117 Adams Street.

1949: Printery kamap tu-taems moa big taem olketa buildim naen-story moa long hem.

1956: Narataem moa printery long Adams Street kamap tu-taems moa big taem olketa buildim nara niu building long 77 Sands Street.

1967: Olketa buildim wanfala ten-story building mekem olketa nara printery fit for join tugeta, wea mekem hem kamap ten-taems moa big.

1973: Olketa buildim extra printery long Wallkill, for olketa magasin nomoa.

2004: Evri waka long United States for print, wakem buk, and sendem aot, kamap long Wallkill.