Ronem Firstaem, Acceptim Bihaen

TU-THRI year go finis, Santiago and waef bilong hem Lourdes muv go long Huillcapata, wanfala taon long Peru wea luk naes tumas, for sharem message bilong hope from Bible witim pipol long there. Bat no longtaem nomoa, wanfala priest from Cuzco arrive and hipimap evri pipol long datfala taon. Datfala priest warnim evriwan hao sapos Olketa Jehovah’s Witness stap, bae big trabol kamap, bigfala snow bae foldaon and killim dae buluka and spoelem kaikai bilong olketa.

Staka bilivim datfala “profesi,” and for winim sixfala month, no eniwan acceptim invitation bilong Santiago and Lourdes for studyim Bible. Wantaem, governor bilong disfala taon ronem Santiago and Lourdes followim road and sutim tufala witim ston. Bat evritaem tufala showimaot peace, olsem Christ hem duim.

Gogo, samfala pipol long disfala taon acceptim Bible study. Miguel tu changem tingting bilong hem. Hem start for study witim Santiago, hem stop for drink tumas, and kamap man wea laekem peace. Bihaen, Miguel, waef bilong hem, and tufala dota bilong hem acceptim truth from Bible.

Distaem, wanfala strongfala kongregeson bilong Olketa Jehovah’s Witness stap long disfala taon. Miguel hapi tumas from staka long olketa ston wea hem sutim long Santiago and Lourdes no kasem tufala, and hem tinghae long nambawan example bilong tufala for showimaot peace.

[Piksa long page 32]

Wei wea Santiago and Lourdes (antap) showimaot peace hem changem heart bilong Miguel (long raet saed)