Hao for Enjoyim Wei for Ting Raonem Samting
FOR samfala pipol, disfala wei for tingting gud raonem information hem big samting tumas. Maet olketa tingim datwan hem hard samting bikos man need for barava tingting gud raonem samting wea hem readim. Olketa hia maet feel guilty tu bikos olketa no duim datwan, especially from olketa savve hao hem barava important for duim datwan. (Philippians 4:8) Bat for ting raonem olketa tru samting wea iumi lanem abaotem Jehovah, olketa naesfala fasin bilong hem, olketa maeti samting wea hem duim, wanem hem laekem iumi for duim, and nambawan plan bilong hem, hem naesfala wei for iusim taem bilong iumi. Why nao olsem?
Jehovah God hem Ruler long universe wea hae winim evri nara ruler and hem busy for fulfillim nambawan plan bilong hem. (John 5:17) Nomata hem busy, hem interest for savve long tingting bilong each worshiper bilong hem. David wea raetem psalm savve long diswan and holy spirit muvim hem for raet olsem: “O Jehovah, iu lukluk gud insaed long mi, and iu savve gud long mi. Iu nao savve long taem wea mi sidaon and taem wea mi standap. Iu luksavve long tingting bilong mi from farawe.”—Psalm 139:1, 2.
Firstaem, maet toktok bilong David mekem man feel wikdaon. Maet hem ting olsem, ‘Nomata God stap “farawe,” hem savve long evri nogud samting wea mi tingim.’ Bat hem gud samting for iumi savve hao hem savve long datwan. Diswan savve helpem iumi for aotem olketa nogud tingting wea iumi garem. Taem iumi garem olketa nogud tingting olsem, hem savve helpem iumi for talem long God, from iumi sure hem bae forgivim iumi long faondeson bilong faith bilong iumi long ransom sakrifaes bilong Jesus. (1 John 1:8, 9; 2:1, 2) Bat long semtaem, iumi shud savve tu hao Jehovah hem lukluk kam for helpem olketa wea worshipim hem. Hem interest taem iumi ting abaotem hem witim feeling for tinghae long hem.
Bat, maet iu laek for savve, “Waswe, Jehovah really interest long evri gudfala tingting bilong plande million pipol wea worshipim hem?” Barava nao. Jesus mekhae long wei wea Jehovah interest long iumi taem hem talem hao nomata olketa smol sparrow, Jehovah tinghae long olketa and hem sei moa: “Iufala barava important winim plande bird.” (Luke 12:6, 7) Olketa sparrow no savve tingim Jehovah. So sapos Jehovah kea for olketa, bae hem barava kea and hapi long iumi taem iumi ting abaotem hem! Tru nao, iumi savve talem sem prea olsem David, wea sei: “Mi laekem . . . samting wea heart bilong mi ting raonem for mekem iu hapi, O Jehovah wea iu nao Rok bilong mi and Datwan wea baem mi bak.”—Psalm 19:14.
Toktok wea holy spirit muvim profet Malachi for raetem hem nara pruv wea showimaot Jehovah interest long tingting bilong olketa loyal worshiper bilong hem. Taem hem story abaotem taem bilong iumi, hem profesi olsem: “Long datfala taem Jehovah gohed for interest and lisin taem olketa wea fraet long hem story long each other, each wan witim fren bilong hem. And olketa raetem wanfala buk front long hem for rememberim olketa wea fraet long Jehovah and olketa wea tingim nem bilong hem.” (Malachi 3:16) Wei for rememberim hao Jehovah gohed for “interest” taem iumi ting abaotem hem savve mekem iumi enjoyim wei for ting abaotem God. So iumi agree witim toktok bilong man wea raetem psalm, wea sei: “Mi bae ting raonem evri waka bilong iu, and evri samting wea iu duim mi bae interest long hem.”—Psalm 77:12.