Kwestin From Reader
Psalm 102:26 sei earth and skae “bae finis.” Waswe, datfala toktok hem minim earth bae finis evribit?
Man wea raetem disfala psalm hem prea long Jehovah and sei: “Longfala taem bifor iu wakem faondeson bilong earth, and iu wakem skae witim hand bilong iu. Olketa bae finis, bat iu bae gohed for stap olowe; and bae olketa evriwan kamap nogud olsem old kaleko. Olsem kaleko bae iu changem olketa, and taem bilong olketa finis nao.” (Psalm 102:25, 26) Olketa nara verse long disfala chapter hem showimaot hao olketa verse hia story abaotem wei wea God hem stap for olowe, and hem no abaotem wei wea earth bae finis evribit. Hem showimaot tu why disfala important truth hem comfortim olketa servant bilong God.
Man wea raetem disfala psalm maet hem stap long prison long Babylon and hem startim disfala story abaotem olketa problem bilong hem. Hem sei laef bilong hem short “olsem smoke.” Bigfala wari spoelem body bilong hem, mekem olketa bon bilong hem “barava hot olsem fire.” Hem taed, gogo body bilong hem “drae olsem grass nomoa,” and feel lonely “olsem wanfala bird wea stap seleva antap long ruf.” Olketa problem bilong hem mekem hem no want for kaikai, and olketa day bilong hem fulap long sorre nomoa. (Psalm 102:3-11) Nomata olsem, man wea raetem disfala psalm no lusim hope bilong hem. Why nao olsem? Bikos Jehovah hem promis for duim samting long Zion, wea hem nao Jerusalem.
Nomata Zion hem finis evribit, Jehovah hem promis for olketa bae buildim bak moa. (Isaiah 66:8) Dastawe, long wei wea showimaot hem barava bilivim diswan hem sei long Jehovah: “Bae iu showimaot mercy long Zion, from hem nao taem for favorim hem, bikos datfala taem wea set finis hem kam nao. Bikos Jehovah bae barava buildim Zion moa.” (Psalm 102:13, 16) Man wea raetem disfala psalm start moa for story abaotem wei wea hem safa. Hem tingse sapos paoa bilong God savve buildim bak moa Jerusalem wea distroe finis, Jehovah barava fit for aotem trabol wea kasem hem. (Psalm 102:17, 20, 23) And nara samting moa muvim hem for barava trustim Jehovah. Wanem nao datwan? Wei wea God hem stap olowe.
Wei wea Jehovah stap olowe hem barava difren tumas from wei wea laef bilong man wea raetem disfala psalm hem short tumas. Hem sei long Jehovah: “Olketa year bilong iu stap thru long evri genereson.” (Psalm 102:24) Then datfala man wea raetem psalm hem sei moa: “Longfala taem bifor iu wakem faondeson bilong earth, and iu wakem skae witim hand bilong iu.”—Psalm 102:25.
Nomata earth and skae stap for longtaem, hem no semsem witim wei wea Jehovah hem stap olowe. Man wea raetem disfala psalm sei moa: “Olketa [earth and skae] bae finis, bat iu bae gohed for stap olowe.” (Psalm 102:26) Earth and skae savve distroe. Bat long olketa nara scripture long Bible, Jehovah sei olketa bae stap olowe. (Psalm 119:90; Ecclesiastes 1:4) Nomata olsem, earth and skae savve finis evribit sapos datwan hem plan bilong God. Bat for God, hem kanduit dae. Only samting wea mekem olketa creation wea iumi savve lukim “stap olowe,” hem bikos God keepim olketa. (Psalm 148:6) Sapos Jehovah hem finis for mekem olketa creation hia kamap niu evritaem, then “bae olketa evriwan kamap nogud olsem old kaleko.” (Psalm 102:26) Jehovah savve stap longtaem winim creation bilong hem—sapos hem chus for duim datwan, olsem wanfala man laef longtaem winim kaleko bilong hem. Bat, iumi savve hao olketa nara scripture sei datwan hem no will bilong hem. Word bilong God promisim hao Jehovah hem disaedem finis disfala earth and skae bae stap olowe.—Psalm 104:5.
For savve Jehovah hem stap evritaem for fulfillim olketa promis bilong hem, hem wanfala comfort. Nomata wanem kaen trabol kasem iumi, taem iumi kolem hem, iumi savve sure “bae hem mas lisin long prea bilong olketa wea lusim evri samting, and no ting daonem prea bilong olketa.” (Psalm 102:17) Hem tru, promis bilong Jehovah wea stap long Psalm 102 hem strong go moa winim earth wea iumi stap long hem.