Hao Nao Young Pipol Long Skul Savve Sei ‘No’ Long Sex?

“Evriday, olketa pikinini tok abaotem sex.Olketa gele bat askem olketa boy, and olketa duim sex barava insaed long skul.”—Eileen, 16.

“Olketa homosexual long skul bilong mi duim olketa rong samting long eye bilong olketa nara pikinini and nating warim nomoa datwan.”—Michael, 15.a

WASWE, olketa classmate bilong iu tok abaotem sex evritaem? Waswe, samfala tok abaotem and duim tu? Sapos olsem, maet iu garem semkaen feeling olsem wanfala teenage gele wea markem taem man stap long skul, olsem “taem man waka long wanfala movie abaotem pipol wea duim sex.” For tok stret, plande taem olketa young wan kasem hevi for story abaotem and duim sex long skul.

Maet iu herem samfala classmate iusim toktok, “hooking up.” Hem wanfala toktok wea minim olketa duim sex bat no interest for fren or marit. Samfala young wan duim diswan witim man wea olketa savve lelebet nomoa long hem. Samfala narawan meet for durong witim man wea olketa nating savve long hem, wea olketa meetim nomoa long Internet. Nomata wanem, goal bilong datwan hem for duim sex bat no lovem each other. Danielle wea 19 year hem sei: “Hem no for eni nara samting moa bat for satisfaem feeling nomoa.”

Dastawe, hooking up hem main topic for storyim insaed plande skul. Wanfala 17 year gele hem raet olsem insaed niuspepa bilong skul: “Bihaen evri weekend, olketa skul fren story abaotem datkaen samting wea happen, and nius abaotem datkaen samting wea happen long weekend flae olobaot insaed olketa hall.”

Sapos iu trae for followim olketa Bible standard, bat iu stap witim olketa pipol wea story abaotem sex plande taem, bae iu feel olsem iu no wanfala long olketa. And sapos iu no joinim olketa bae iu kamap isi wan for olketa tok spoelem. Iumi shud no sapraes long diswan, from Bible talem finis, taem man hem no minim wei bilong iu, olketa maet ‘tok nogud abaotem iu.’ (1 Peter 4:3, 4) Nomata olsem, no eniwan laek for olketa tok spoelem hem. So taem iu long skul, hao nao iu savve sei no long sex, and gohed for hapi abaotem datwan? First samting, hem important for minim why nao wei for laek durong hem barava strong.

Savve Long Iuseleva

Taem iu kamap teenager, body and feeling bilong iu hem gohed for change kwiktaem. Long datfala taem, feeling for laek duim sex hem barava kamap strong. Iumi mas remember diswan hem normal samting nomoa. So sapos iu barava laekem narawan insaed long skul, no tingse wei bilong iu hem nogud or iu no strong for keepim iuseleva for garem klin fasin. Iu savve garem klin fasin sapos iu disaed strong for stap klin!

Taem iu teenager iu mas stragol witim olketa feeling, and iu mas keakea long narafala samting tu. Hem nao from evri man laek for duim rong samting bikos olketa no perfect. Nomata aposol Paul tu hem sei: “Mi lukim tu hao nara law stap insaed long mi wea faet againstim law bilong mind bilong mi and wea leadim mi for kamap prisoner long law bilong sin wea insaed long mi.” Paul hem sei wei wea hem no perfect mekem hem feel “iusles.” (Romans 7:23, 24) Bat hem winim datfala faet, and dastawe iu tu savve win!

Minim Olketa Classmate Bilong Iu

Olsem iumi storyim finis, olketa classmate bilong iu maet tok abaotem sex evritaem or tokplas abaotem wei wea olketa duim sex. Iu shud careful long nogud wei bilong olketa, nogud hem spoelem iu. (1 Corinthians 15:33) Bat no ting long olketa classmate bilong iu olsem enemy. Why nao olsem?

Olketa classmate bilong iu garem sem kaen feeling wea iu garem. Olketa garem feeling for laek duim rong samting tu. From olketa “lovem hapitaem winim wei for lovem God” olketa no olsem iu. Maet olketa kam from famili wea “no garem love wea olketa long famili shud garem for each other.” (2 Timothy 3:1-4) Samfala classmate bilong iu maet no kasem gudfala discipline and training from parents wea lovem olketa.—Ephesians 6:4.

Olketa classmate bilong iu maet no savve long nogud samting wea kamaot from wei for followim feeling nomoa, bikos olketa no garem nambawan samting for kasem wisdom wea iu garem—Word bilong God, Bible. (Romans 1:26, 27) Hem olsem sapos mami and dadi givim wanfala niu baesikol long olketa, bat no teachim olketa hao for raedem. Olketa pikinini tekem go antap long hill and speed go daon long hill. Datfala raed hem mekem olketa hapi tumas for shortfala taem nomoa, bat trabol nao long end. So, wanem nao bae iu duim sapos olketa classmate bilong iu start for story abaotem sex taem iu stap or sapos olketa trae for switim iu for duim olketa samting saed long sex witim olketa?

Rejectim Dirty Toktok

Sapos olketa classmate bilong iu start for story abaotem sex, maet iu laek for lisin and join insaed story bilong olketa abaotem sex, for mekem iu no difren from olketa. Sapos iu duim olsem, hao nao olketa bae ting long iu? Waswe, wei wea iu interest long story bilong olketa hem showimaot iu laek for kamap olsem olketa?

Wanem nao iu shud duim sapos seke nomoa, iu insaed wanfala story wea tan go for story abaotem sex? Waswe, bae iu standap and go? Hem barava stret! (Ephesians 5:3, 4) Bible hem sei: “Man wea wise hem lukim trabol and protectim hemseleva.” (Proverbs 22:3) So taem iu go from datfala story, hem no minim iu no kaen long olketa fren bilong iu, bat iu wise.

Hem barava stret for iu no feel shame from iu go from wanfala dirty story abaotem sex. Staka kaen story wea iu savve go from and iu no need for feel shame long olketa hem stap, especially sapos iu no interest long olketa or sapos iu no laek for join insaed. For example, sapos samfala classmate bilong iu story abaotem wanfala plan for iusim gun for steal, waswe, bae iu stap and lisin long plan bilong olketa? Sapos iu stap, bae pipol tingse iu insaed datwan tu. So, from iu wise, iu bae chus for go from datwan. Duim sem samting taem story tan go for story abaotem sex. Samfala taem, iu savve faendem wanfala wei wea no mekem iu luk olsem iu stret tumas and mekem hem isi for olketa no tok spoelem iu.

Hem tru, maet evritaem hem no isi for go from wanfala story. For example, olketa young wan wea olketa teacher markem for sidaon klosap long iu insaed class, maet trae for mekem iu story abaotem sex witim olketa. Sapos olsem, talem olketa stret long kaenfala wei for no disturbim iu. Sapos olketa no lisin, duim samting wea Brenda duim bifor. Hem sei: “Long careful and kaenfala wei mi askem teacher for muvim mi for sidaon long nara ples.”

Garem Fasin for Luksavve

Gogo, bae samfala classmate bilong iu laek for savve why nao iu no join insaed dirty story bilong olketa. Sapos olketa laek for savve abaotem fasin bilong iu, mas careful taem iu ansa. Samfala maet ask nomoa for mekfani long iu bat nating want for savve long tingting bilong iu. Bat sapos man wea askem iu barava honest and want for savve, storyim gud olketa samting wea iu bilivim. Wanfala buk wea staka young wan iusim hem Questions Young People Ask—Answers That Work, for helpem samfala classmate bilong olketa for savve long gud samting wea kamaot from wei for followim standard bilong Bible.b

Disaed Strong

Wanem nao bae iu duim sapos wanfala student no fraet and trae for holehole or kissim iu? Sapos iu letem hem for duim datwan, iu strongim hem for gohed for duim datkaen rong samting. Bible hem story abaotem wanfala young man wea letem wanfala woman wea garem nogud fasin for kasholem hem and kissim hem. Hem letem datfala woman for story long hem, long wei for mekem hem laek for duim sex. Wanem nao happen? ‘Seke nomoa datfala young man ran followim datfala woman, olsem wanfala buluka wea go for olketa busarem.’ —Proverbs 7:13-23.

Tingim hao Joseph deal witim semkaen samting bat long difren wei. Waef bilong masta bilong hem trae for switim hem evritaem, bat hem strong for rejectim toktok bilong datfala woman. Gogo, datfala woman trae for kasholem hem, hem disaed strong and hem ranawe.—Genesis 39:7-12.

Maet iu bae need for strong for duim samting olsem Joseph, sapos wanfala classmate bilong iu or eniwan wea iu savve long hem trae for holehole nogud long iu. Eileen hem sei: “Sapos wanfala man trae for holehole kam, mi talem hem for stop. Sapos hem no stop, mi singaot big for hem no tasim mi.” Eileen sei olsem moa abaotem olketa boy long skul bilong hem: “Olketa bae no respectim iu sapos iu no mekem olketa respectim iu.”

Olketa classmate bilong iu bae respectim iu, taem iu stap klia long wei for lisin long dirty story bilong olketa, explainim klin fasin bilong iu taem hem fitim, and disaed strong for rejectim olketa dirty fasin. Nara gud samting, hem wei wea iu bae feel gud long iuseleva. Barava important samting hem wei wea Jehovah bae appruvim iu!—Proverbs 27:11.

[Footnotes]

SAMTING FOR TINGIM

◼ Wanem nao iu savve talem for go from wanfala dirty story?

◼ Wanem nao bae iu talem and duim sapos wanfala classmate trae for switim and story nogud long iu?

[Piksa long page 21]

Sapos story hem abaotem sex, lusim datfala ples

[Piksa long page 22]

Disaed strong for rejectim olketa dirty fasin